¹ Anedu,mbi nugama mudu mu gindumbu,anu hadu a kimpeve,nufana gumu dwala mu pwede. ² Giebugenu anu beni,mu mwila gugonda gubwa mu muhedu. Sendenu lemu yenwe yenu ye mugio,anu munu gagugisa musigu u Klistu. ³ Mu gio mbi mudu ununga mbi yeyi ena hoshi yo wa zola yeyi gukala,dangu diena yeyi gima gipamba,yeyi ena mugu difuda ye beni. ⁴ Konso mudu alongogi isalu yenzi,mu gio yeyi magesiya mu yigi yeyi afana gudi sigisa,mu gugonda gudi mega ye mudu mwega. ⁵ Mu mwila konso mudu aga senda lemu dienzi beni. ⁶ Mudu yo waba gulonga ndaga yi Nzambi,yeyi ufana gunu ngila mudu yo uba gwalonga. ⁷ Anu nugonzi gudifuda,lo gwena ye mudu ufana gusema ye Nzambi.Konso yo iguna mudu,yeyi maga bogula kega. ⁸ Mu mwila konso yo uguna ndumba mu mwila gifudji gi masumu,yeyi aga bogula lufwa.Ha konso yo uguna mu mwila mpeve ivedila,yeyi aga bogula luzingu lugonda suga lu gimpeve. ⁹ Adu dugondenu guhela mu gusala mapimbu,mu mwila dangu didula,adu mudu gabogula mbi lo duhela. ¹⁰ Mu mpila yo,dangu diduzwa mpila,duselenu mapimbu gwena mudu mukima.Duselenu mapimbu sila gwena hadu o ena mu gimvuga gimosi yadu mu gadji ga lugwigila. ¹¹ Dalenu muganda uneni,ami iga nusoni gididi gu miogu miami beni. ¹² Aho azola gusala mapanzi mapimbu mu gimusuni,munu gunuganda mbuga mu gugonda gugwigila,mu mwila owu agonzi gumega mana mu mbuga yi nkulusi yi Klistu. ¹³ Mu mwila ata oho aga gwigila mbi lo adula mu mpila yi gugieba misigu,ha owu mbi azola lugwigilu mugu digumisa mu gimusuni giowu beni. ¹⁴ Yoyi igonzi gutudila mi mugu disi gisa,mbi lo yena mu mbuga yi nkulusi yi fumu Yisu Klistu.Gwena mu mbuga yedu gifundji giga dega manini,muu mwila miye ami mu mwila gifundji. ¹⁵ Mu mwila ata hadu agonda lugwigila ata ena ye lugwigila gimosi lo,ha ayo ihida mfunu,gwena isalu yi mpa. ¹⁶ Gwena o akima agazinga mu misigu mio,wega mbi ngemba ye kenda zikadi ye owu ye Isaledi yi Nzambi. ¹⁷ Giebugenu,mudu umosi lo ufana gutwala mu gubiya,mu mwila ami iga senda mu mwila wami beni gidimbu gi Yisu. ¹⁸ Wega mbi madonzi ma fumu wedu Yisu Klistu zikadi ye mpeve yenu apangi ami.Amena.