¹ Ami iba gwisa gwena nu mu mbala isadu,mapanzi makima duga solula gu mesu ma ambangi mbadi mbi lo sadu. ² Dangu diga kedi o mu mbalu yi mbadi,ami miga nwambididi tama,ye mwanonu dingonda mi,ami iba guhosa gwena o aga sadidi masumu gumesu manu ye gwena amoshi,mbi ami ngiesa guginziga gu nwena nu,ami lo iga sala ata gima. ³ Mu mwila anu nuba gugamba gidimbu gi mapanzi mo magunga mbilanga Klistu,yeyi lo ahela gu mesu menu,ha yeyi agu zinganga mu ngolu zi Nzambi;ha ena ngolu mu gadji dienu. ⁴ Mu mwila yeyi aga saga manini awulu nkulusi mugu gonda gikesa gwenzi,ha yeyi agu zinganga mu ngolu zi Nzambi;adu kega dwena awa guhela gu mesu menzi,ha adu duga zinga ye yeyi mu ngolu zi Nzambi mu mwila mugu sala gumesu menu. ⁵ Digodu lulenu anu beni mu mwila gudala mbi anu nwena mu gadji ga lugwigilu;dibingi senu anu beni.Anu lomnwisi mbi Yisu Klistu wena mu gadji dienu?Mu gio inunga anu nukadi mu gadji ga gagidi. ⁶ Ha ami inunga mbi adu dugonzi gukala mu gudilesa. ⁷ Dangu di adu dwena mu gusamba Nzambi mbi anu nugonzi gusala mabi,lo mbi mu mwila adu gumbudi adu beni,ha mu mpila mbi anu nusadi amo mena pimbu ye adu,dukadi mu gagidi. ⁸ Mu mwila adu lo dwena ye ngolu gu mesu ma gagidi;adu dwena mu gadji ga gagidi. ⁹ Adu dugukalanga mu kiesi mu dangu di dugonda gikesa,mu mwila anu nwena ngolu;ye amo medu gulombanga mu mbuga yi isambu yedu,gwena mbi anu nusobugi. ¹⁰ Mu mwila gio ami iba gusoniga mapanzi ma mu gugonda gwami,mu mpila mbi mu dangu dingiena ami beni yanu,ami lo ifana gukala muzima gugola,nga giena giyega giga pedi Fumu mu gunusadisa ye lo mbi mu mwila gunu bebisa. ¹¹ Mu yo isala anedu,anu nukadi mu migembu.disadisenu,dilonga ganenu,nukadi ye mabanza mamosi,nuzingi mu pwede;ye Nzambi u luzolu ye u pwede magakala yanu. ¹² Hana ganenu mbodji yenu ye yenu mu beze di gisantu. ¹³ Asantu akima anu dumisa mbodji. ¹⁴ Wega mbi ngolu zi Fumu Yisu Klistu,luzolu lu Nzambi,ye lusadisu lu mpeve ya longo,lukadi ye anu akima!