¹ Kunima kiokio tuamana vukisua, tuabakisa vo nkumbu ya sanga kiokio yi Malate. ² Bakondua kala bangeleki yevo besiloma batoma kututambula mu lutuzitu kikilu betobawonso va mbela tiya tua nene balunga, kadi mvula yakala noka ye kuakala kiozi kia nene. ³ Kiokio Polo kanona kunku kia matiti ye watula kio vatiya, mpidi yavayika mudiambu dia tiya ye yakangama va koko kuani. ⁴ Kiokio bakondua kala bangeleki yevo besi loma bamona bulu kiazembalala vakoko, bavovana bawu ye bawu: " ludi muntu ndondo wuna m'vondi, kadi mbazia n'kanu kayi zolele kun'giambula kazinga ko, kunima vuka kuani mu m'bu. ⁵ Polo wanikuna bulu vana ntandu a tiya, ye kamona diambu ko. ⁶ Bantu bobo bakala vingila kavimba yevo kafua mu kintulumukina; kansi, kunima vingila ntangu yanda, kiokio bamona vo kampasi zimosi nkutu zin'luakidi ko, basoba mabanza, ye bavova vo wuna finzambi nzambi. ⁷ Kuakala, mukinzungidila, mintoto miavuwa kua muntu a nene mu sanga, wabokeleluanga Pibiliyusi, watutambula lumbu tatu, mumplia ya kikundi. ⁸ Se dia Pibiliyusi wakala kuna mfulu, wabela yuku yuku ye pulu pulu dia menga; Polo kiokio kayenda kuayani, wasambila, wan'tula moko, ye waniakisa. ⁹ Kunima wayenda mpe kua mbevo zan'kaka za sanga, ye wabaniakisa. ¹⁰ Tuavewa nzitusu zanene kibeni, ye, mungienda eto, tua vewa bima biobio tuakala biawu nsatu. ¹¹ Kunima ngonda tatu tuavuanda kuna, tuamanta mu masuwa ma ku Alekizandele, malutisila nsungi a kiozi muna sanga, ye makala ye sinsu kia muntu mosi mu babole ban'longo(couple). ¹² Tualuaka kuna Silakise, tuavuanda ko lumbu tatu. ¹³ Tuka kuna , kiokio tua landa kuna ndambu a simu, tualuaka kuna Legio, ye , mupepe wa midi kiokio watelama muna lumbu kia landa , tuasala lumbu biole tini kiokio nate kuna Puzolesi, ¹⁴ kuna tuawana zimpangi zatulomba mukala yawu lumbu nsambuadi. Ye yiwowo tuayendela kuna Loma. ¹⁵ Kuna Loma mu kuiza kutana yeto, nate kuna lututakanu lua Apiusi ye kuna saba yayi tatu, kuatuva bampangi bawa nsangu zeto bayiza muwawana ye beto. Kiokio Polo kabamona, wavutula matondo kua Nzambi, ye wabaka kibakala. ¹⁶ Kiokio tualuaka kuna Loma, bavana n'sua kua Polo mu vuanda kua mpangi ani kintuadi ye kesa dimosi mu kun'kengela. ¹⁷ Kunima lumbu tatu, Polo wabokelesa ngudi za nganga za bayuda; ye kiokio bavuanda mu lukutakanu, wabavovesa mpova ezi: " luzimpangi zame bantu, kondua kua vanga diambu didiete nkangu yevo kisinsi kia mase meto, ya tulua muboloko kuna Yelusalemi ye kuna yayekulua kua besi loma. ¹⁸ Kunima kungiuvula, bazola kungiambula, kadi mu mono kamuakala diodio difuene lufua ko. ¹⁹ Kansi bayuda kabazola ko, ye yasala ngolo mu luaka kua Sezele, kana wuna kina vo kina ye ngindu zafunda nsi ame ko. ²⁰ Tala kuma yalombele yalumona ye kulu vovesa, kadi yimudiambu dia vuvu kia Isayeli mvuatidi nsinga wasengu wuwu. ²¹ Bamvutula: " Katusidi tambula tuka ku Yuda nkada wutadidi mambu maku ko, ye katu tambudi ata mpangi yimosi yayiza kututela nsangu yevo mambi maku ko. ²² Kansi, tuzolele wa kuangeye mosi momo wuta banza, kadi tuzaye vo fidibundu fiofio kafita zolakana ko muawonso. ²³ Bakanga lumbu, ye bayingi bayiza kummona muna suku kakala lekanga. Polo wabalongela kimfumu kia Nzambi, mu mvaninu a kimbangi, ye musosa, mu nzila n'siku mia Mose ye muna mim'bikudi, kubasiamisa mu momo matadidi Yesu. Mbokena zakala tuka n'suka nate nkokela. ²⁴ Ban'kaka bakuikila mu momo kakala vova, bankaka kabakuikila ko. ²⁵ Kiokio bakala kuenda bavambana, Polo wakudika kaka mambu ema: " yi mulunungu Mpeve a N'longo, kiokio kakala vova kua mase meno mu nzila ya m'bikudi Ezayi, kavovela: ²⁶ " wenda kua nkangu wuwu, ye vova: lutawa mu matu meno, ye kalusinga bakisa ko, lutatala mu meso meno, ye kalusala mona ko. ²⁷ Kadi n'tima wan'kangu wuwu wukumini watadi, bakangidi matu mawu ye bazimi meso mawu, mpasi vo kabamoni mu meso mawu ko, ye kabawe mu matu mawu ko, Kababakusi mu n'tima awu ko, kabaviluki ko, ye kibaniakisi ko. ²⁸ Luzaya vo luvuluzu lulu lua filua kua bapakanu, ye si ban'gua. ²⁹ kiokio kamana vova momo, bayuda bayenda, bakala nuanisa mabanza yawu ye yawu. ³⁰ Polo wazinga mvula zole muna nzo kafutilanga. wakala tambulanga bawonso bayiza kun'talanga. ³¹ Wakala longelanga kimfumu kia Nzambi ye longa mu momo matadidi Mfumu Yesu Klisto, mu kimpwanza kiawonso ye kondua kua nkakumusu.