¹ Kobun nze,mwan a me,kal ngol mu lizol lin lili kel andi Yesu Klistu. ² Bin bio biso be ywi nze mu nkwum a me ku madis ma ba mbangi ba fhun,bi wa ku kel bad ba bwed,baba kwi si mu ilong ku kel bad ba nkim. ³ Mon mpas ani me bun bu kel Suda mu bwed wo Yesu Klistu. ⁴ Kel we ani Suda wo bada manda ma lizing, kid ne nde akwi awa isse wun wo mu swen. ⁵ Mud ako bun ba muwa imfum,kid ne nde ake nween bun bu ba mu swi. ⁶ Ilwim ne mud wo sala mangwun asal ku nkul a ika mbud. ⁷ Yab nki mio me nkel mu imo,munda mfum Yesu ayi wu wa mayel mu bilo bio biso. ⁸ Nze mutiemen Yesu Klistu,wo fi mu kaan le David,wo futumuk mu nked ye bad baba fhi,bun bu mwe nda Nziem. ⁹ Munda nde wun me nkel mu imon mpas,ti kun ku ba nked mishi amon ne mud mubi.Si nda Nziem ba ikes we. ¹⁰ Itsin kio kin me nkel mu ikas mbwun itsin bad baba pwen,mu mpil ne bo si ba wol liguluk lin lili kel mu Yesu Klistu,ani likum le mvul ani mvul. ¹¹ Nda yi ikel ye ibini: Kid ne bis li fhi andi nde,bis si li zing andi nde. ¹² Kid ne bis li kes mbwun,li bi-bial si andi nde; kid ne bis li mu mee,nde si ali mi-mee. ¹³ Kid ne bis likel bad baba wun ta masong, nde akel mud a masong munda nde akwi we mu iku bi ma nde ngako. ¹⁴ Tiemen bilo bi,mu ilol ku kel Nziem,li kyi mu manteden ma lifhu,ma tswala tel lo liso mu ibebes ku kel ban baba ywile. ¹⁵ Sa ngol mu iku bisu ku nkul Nziem amon ne mud wu kel mu ngieb,mud a isal wun wo win nda ye imo, wo bud kaba imbe-imbe nda ye Nziem. ¹⁶ Bad mu manda ma win mfun ani ma bi zob munda ban baba kide mo ba kwe tel lo liso ku nkul mu bi mpwisi,manda ma bo si ma stwa amon ne minkulu. ¹⁷ Mu ibwil kin ba kel Hymenee ani Philete. ¹⁸ Baba wi mukud ku masong, ba mo ne bad ba futumuk ikwil ani ibwis likwikil le bad ba nkim. ¹⁹ Kyi,itsin ke Nziem ikel tel lo liso mikid, andi manda ma nde ma ba mu shil idiim; Mfum Nziem bud yab bad ba nde, mud nde so wo mo nkwum ye mfum Nziem,akyi mu bi mpwisi. ²⁰ Mu nked a nzo mo ye nen,ikel we ne na bikaa be wool ani bibi nzim bwun,si kel si ani bilo be miti ani bibi maan,bibi mo bi kel bikaa be likum,bibi nkim bi kel bin bibi selele na mbal mo. ²¹ Kid ne mud abi kebe ku ibwed,mu ibud ku bi kebe mu bilo bi,akal amon ne ikaa ke likum,ki ba sakumun,mfun ku kel mfum a kio,ke ibwed mu bisal bi bwed bio biso. ²² Bad mabanz ma bikii,kod mu isa masong, likwikil, lizol, ngemb, andi ban baba yemene Nziem mu mukil mu bwed. ²³ Kyi mu manteden ma ngol ani mama win mfun,yab ne ma koo mubal. ²⁴ Kyi,ifeen we ne nsad mu mo wo mfum Nziem akal mu manteden, nde akal mud wo ma kaan mo maso,akal liked mu ilong,a will ani ikas mbwun. ²⁵ Nde aba fudul andi bike-bike bio biso ba mbeen,mu likwikil ne Nziem aba fu-fudul likwikil munda ne ba to mu iyab masong. ²⁶ Tel ba fudu mu mpil a bo ye mbwed,ako yan ya ba kyi bo mu mied me Satana wo kwed mu nked a bo munda ne bo ba selele lizol li nde.