¹ Ku ban baba shiel ba kuun li sama munda bis mu mpil nda ye mfum yi kwe ani iwol likum bun bu ikel ku kel bini. ² Mu mpil ne bis likal ba gu guluk ku kel bad ba bi ba mghan munda bo baso ba kel we andi likwikil. ³ Mfum akel wo masong,ali wu wa ngol ani iku likel ku kel bad ba bi. ⁴ Bis li kel,ku nkul a bini andi lizol lin mu nkwum a mfum,ne bini li sal bi likwi bini mu isal,bilo bin bi li luumo bis. ⁵ Mfum a tsweles ma mbwun ma bini mu lizol li Nziem ani mu ikas mbwun mu Klistu. ⁶ Bis li lilwim ba kuun,mu nkwum ye mfum a bis Yesu Klistu,mu ibad ba kuun ban bo baso baba zighe mu maghan-maghan,kel we ne mu malong ma li zwi bini ku kel bis. ⁷ Li yeb bin ba ngako isi nki li kwi mu iku li kuun bis,munda bis li zing we mu nked a bini mu maghan-maghan. ⁸ Bis li di we mampa ma mud mama nkaam,si mu bisal bi bis ani mu iniokam i bis,li kele mpyib ani mwil mu isal mu iwun kal mu bilud be mud mu mo mu nked a bini. ⁹ Kel we ne ikele mu nswa ye bis ba ngako,si bis li zwele ne li bi suu mbaan bis ba ngako. ¹⁰ Munda tel li kele bis ku kel bini,bis li nuliele mu lizol,kid ne mud azwel isal,a kaan idia fudu. ¹¹ Kyi bis aka li yuu ne mu nked a bini kel andi ban baba zighe mu maghan-maghan, ba sala we si ba tala na manda ma bizob. ¹² Bis li ba yemen bad ban ani iku ba bwene mu nzil ye mfum Yesu Klistu,mu idia ma mpa ma bo ba ngako,mu isal mu lizol lo liso. ¹³ Si munda bini ba kuun,liyuun we mu ikid ma mbwed. ¹⁴ Kid ne mud mu mo a lemfuk we mu man ma li mwe bis mu mukaan wu,li mu tal,li kaan mu ifhun andi nde,mu mpil ne nde abol nswen. ¹⁵ Li kaan iku mutal amon ne mbeen,si li mu liel amon ne mukuun. ¹⁶ Mfum wun wo ngemb,ali wa nde ngako ngemb mu tel lo liso,mu mpil yo iso,mfum a kal andi bini bo baso. ¹⁷ Me li wi mbwed me ngako Pol ku kuu li me,likel amon ne kuu li me mu mikaan mi me mio miso,iko bun bu nswen me. ¹⁸ Lizol le Mfum a bis Yesu Klistu likal andi bini bo baso.