¹ Tel ayi me ku nkul a bini,me ayi we ani manda ma ngol to maken lin le mwe me manda ma insi-nswi mama nziem. ² Me bo tsid nemme ayab we nto ilo imo mutel akele me mu nked a bini,kyele na Yesu Klistu,wun wu ba kwem yabnghe nkulusi. ³ Me si bo kele andi bini mu yuun,mu buum,ani mu manda ma maghan-maghan ma fhun. ⁴ Manda ma me ani imbang i me,bi kele we bilo be bimpal mu maken,si bikele mu isuu mpev-a-santu andi ngol a nde. ⁵ Mu mpil ne likwikil li bini li ka kal mu maken ma imud,simu ngol ye nziem. ⁶ Tel li li kel mu imo manda ma maken mu nked a ba iwud,si kel we ne maken ma ntod yi,munda ina ke ya lud. ⁷ Si li kel mu imo mu maken ma ins-nswi ma nziem,ibini ke liswele nziem ke likened nde Munda likum li bis. ⁸ Nto ngil mo we ye ina ki iyeb maken man,munda kid ne ake ba yab mu tel liso lin,ba ni mukom we Mfum ya nghe nkulunsi Munda likum. ⁹ Bun bu ba swen "bilo bi ba wun mono nto tswi limo liyu we,nto mud mumo si akwi we mu itiemen,mu bilo bin be yili nziem munda bad ban ba muzolo nde. ¹⁰ Bio bin bi kel bilo be liswo nziem mu mayel ma nde,Munda mayel ma yaba bilo bio biso nto ku mbwun ye nziem. ¹¹ Munda wun wo yaba mantiemen ma mud,kyele na mayel ma nde? Kobun nto mud mumo we wu yeb nked ye nziem kid ne na mayel ma nde ngako nziem. ¹² Si bis li wel we mayel ma ntod yi,si na mayel ma nziem,Munda bis li yab mu isse kio iso bilo be liwi nziem. ¹³ Bilo bi li bi mo ku munwa bibi kel ne maken ma kwi we mu iku bilong,si na mpev-a-santu i lilongo,mpev-a-santu ibamana manda ma nziem ani maken ma nziem. ¹⁴ Mud a musun akwi we mu izwa bilo bibi kel ani mpev ye nziem,munda ku kel nde bimek amon ne lel,nde akwi we mu iku bi yab,munda ba bi asemese mu mpil ye inziem. ¹⁵ Mud wo inziem,asemese bilo bio biso,si akodo we mu lisemes bad ba nkim. ¹⁶ Na kwi mu iyab mpev-a-santu nziem munda imulong? Si bis li kel ani mpev ye Klistu.