¹ ŋle djidjíwɔ bé miádodji asɔ axin sukúdjedjeviȡé. Vɔ ɛɛ, mido dji, asɔŋ ! ² Ðo ŋ huannu mi kúȡo nuhuan kɔkɔɛ, ȡo ŋsɔ mi agɔ nɔn ŋsu ȡéká, bé nɛ ma sɔ mi afia Kristo shigbe tugbedjɛ tsi le axoé yí ŋtsi kɔ. ³ Vɔ, ŋvɔn shigbe letsi edan ble Eva to yo ayédjédjé me lɔ, miá súsúwó ŋgbe yi djidjixoé so djime kɔkɔ tsi miȡo nɔn Kristo gbɔ o. ⁴ Enuyi ŋtsi lɔ, nɛ amɛȡe va nu Yesu bu yo nyɔn nɔn mi tsi tovo so etsi mixɔ gbɔ alo agbenya bu tsi tovo so tsi mixɔ gbɔ lɔ, mi sɔ nyi nyuiȡé. ⁵ Enuyiŋtilɔ, nyɛnŋdé súsú le ŋȡé kpikpi mɛ, bé ŋ hoé sɔ wú apostolowó tsiwó súsúnɔn bé yewó nyi apostologanwó. ⁶ Vɔ tsi ŋnyi amɛ manyanu le nuxo xoxo mɛ tsan, nyɛn ŋdé nyi le sidjédjé mɛ o. Le nuwó keŋkeŋ mɛ, yí ȡo mɔn vovowó dji lɔ, mi ȡi sɔ fia mi. ⁷ Nuvɔn yí ŋwoa tsi ŋbɔbɔ ȡekinyɛn bé ma kɔmi ȡo dji, etimɛ ŋȡé gbefan Mawu yo agbe nyɔn nɔn mia? ⁸ ŋ xɔnu le tsɔtsi buwó shi bé ne ma sɔ súbɔ mi. ⁹ Yí gatsimɛ ŋle mia gbɔ le hianhian mɛ lɔ, nyɛn ŋdé nyi agban nɔn amɛȡéo. Enuyiŋti nɔnvi Makedoniatɔwó ȡo axun hianhianwó ŋti. Yí le mɔnwó keŋkeŋ dji lɔ, ŋlé ȡokinyɛn nyɛ ŋda nyi agban nɔn mio, yí nyɛn ŋda nyi tsan ! ¹⁰ Etsi Yesu yo nyaotótó le lanmɛ nu lɔ, wó ŋdateŋ tsi adégbexoxo yɛ nunu le Akaí yo nutowó mɛ o. ¹¹ ŋdé ŋti yɔ? Enuyiŋti lɔ nyɛn ŋdé lɔn mio woa? Mawu nyan bé ŋlɔn mi. ¹² Vɔ ŋdé woawɔ yí ŋle, na woɛ le esome tsan, bé né maȡé taflatsɛ dodo le amɛtsiwó sɔ mi sɔ le sɔsɔwɔ le enuxɔnwó mɛ, tsi nyi adegbexoxo nɔn wó. ¹³ Enuyiŋti lɔ, amɛxɔnwó nyi apostolo nyɔnwomatotɔwó, dɔwoatɔ tsiwó blé nɔn amɛ, amɛtsiwoé trɔ wo ȡéki shigbe Yesu yo apostolowó. ¹⁴ Yí tsɛ ŋdé woa ya o, enuyiŋti lɔ, abosanŋ ŋtɔ tsan trɔnɔn yeȡekí shigbe kɛnklɛn yo dɔla xa. ¹⁵ Eyɛ ŋdé nyi nutsi woa ya ganȡé nɛ yió subɔviwó tsan trɔ nɔn wó ȡéki shigbe djɔdjɔɛnyinyi yo súbɔviwó. Wó nuwuwu lanɔn shigbe wó dɔwoawoa xá. ¹⁶ ŋgbe le nunuiwɔ bé, amɛȡé ŋgbe súsú be ŋbu súsúȡéȡé ŋnyɛn o, yí nɛ nyi nɛnɛn lɔ, mí xɔm shigbe numanyɔatɔ, bé nɛ nyɛn tsan maxo adégbe le ȡékinyɛn mɛ viȡé. ¹⁷ Enu tsi nuwɔ ŋle le kankanȡodji tsi ȡɔ kú goyíyí lɔ, yɛ ŋde so axoétɔ lɔ gbɔ, vɔ ŋ xo nuxo shigbe sukunɔn. ¹⁸ Tsi amɛ sugbɔ xonɔn adegbe le ŋtilan mɛ lɔ, nyɛn tsan na xo adegbe. ¹⁹ Mí da nɔn ashi ȡo adjeȡaȡawó dji, miɔn tsi nyi amɛn dje nunyanwó. ²⁰ Midanɔn ashi ȡo ameȡe dji, gatsime, yí sɔ mi sɔ wa kluviwó, nɛ nyi bé é man miá dome, nɛ xɔ viȡe so miágbɔ, nɛ é dovlo mi, alo é xo mi. ²¹ Enu kpɛnŋ bé ma nu eyɛ, ȡo mi gbɔdjɔ le me vayi. ɛ ɛ, ȡo nɛ amɛȡé le yéȡéki dowɔ ȡodji lɔ, ŋ xo nɔn nuxo shigbe hanɔn nɛnɛ, nyɛn tsan ŋdo nɔn ȡékinyɛn ȡo dji. ²² Hebritɔwó yí wó nyia? Nyɛn tsan ŋnyí. Izrɛlyɔwó wó nyia? Nyɛn tsan. Abraham yió djidjimevíwó wó nyia? Nyɛn tsan ŋnyí. ²³ Kristo yió subɔviwó wó nyia? ŋle nuxoxowɔ shigbe mɛtsi tame da nɔn xá, ŋ nyi wú, le dɔwoawoawó mɛ, ŋ nyi wú le xoxowó mɛ, ŋ nyi wú le gakpamenɔnɔn mɛ, ŋ nyi wú le eku yo afɔkuwó mɛ. ²⁴ So yudatɔwó gbɔ, ŋ xɔ " xoxo ȡéka to le éka me " zé atɔn. ²⁵ Zétɔn wó xom kú éba, wó xo kpeŋ zéȡéká. zé étɔn ŋ nyrɔn tsi shi mɛ. ŋwoa zan ȡéká kú ŋkéké ȡéka le ahlui mɛ. ²⁶ ŋ zɔn mɔn édjiédji, ŋto afɔkú mɛ le axu djí, ŋ kpéfu le fianfitɔwó lɔmɛ, ŋ ȡu aya so axun dumetɔwó gbɔ, ŋ ȡu aya le maxɔsetɔwó gbɔ, ŋ ȡu aya le du me, ŋ ȡu aya le zogbedji, ŋ ȡu aya le axu dji, ŋ ȡu aya le nɔnvivɔnwó gbɔ. ²⁷ ŋ nɔn dɔ sɛnŋwó me, yí le vévésésé me, yí ŋ nɔn ezan súgbɔwó me alɔn madɔn, le shivé kúdo shikɔ tsitsi me, yí le ŋȡémaȡu mɛ, le vivɔ kú aman aman nɔnɔn mɛ. ²⁸ Yí le nuxɔnwó keŋkeŋ yo ŋgbedome lɔ, amewó sɔnɔn axua ȡo ŋtinyɛn gashiagame, ȡo bélelé nɔn tsɔtsiɛwó ŋtsi. ²⁹ Mɛȡe nyi gbɔdjɔgbɔdjɔtɔ, yí nyeɛ nyɛn da nyio? ³⁰ Nɛ nyi bé woa xo adegbea, axun gbɔdjɔgbɔdjɔ ŋti naxo adegbe so. ³¹ Mawu tsi nyi etɔ nɔn miá xoétɔ Yesu, yí nyi yayratɔ so mavɔ me yi mavɔ me lɔ, nya be nyɛn ŋdé le núsúkánwɔ. ³² Le Damasko lɔ, areta yo dume djiȡutɔ djɔ Damaskotɔwó wó du ŋti bé yá leŋ. ³³ Vɔ wó sɔŋ, sɔ ȡiȡi to flɛsɛ nu, le kíshí mɛ, to egli ŋtí, yí ŋshí le yó alɔ mɛ.