¹ Jich yu'un, ya sk'an ya jkijk'taytik te sneelal k'op ayej ta swenta te Cristoe sok aka yijubukotikix. Ma jauk nax ya jnopilaytik te ya jsut jkot'antik yu'un te beluk ya yak'otik ta lajele sok te ayuk xch'uunjel jkot'antik ta stojol te Diose, ² sok snopel sk'oplal te ich' ja'e, skajanel k'abil ta stojol te yane, te cha' kuxel yu'un te mach'a lajemikixe, sok te bit'il ya jkich'tik likbeyel jmultik ta swenta sbajt'el k'inal. ³ Te jo'otike jich me ya jpastik teme jich ya sk'an yot'an te Diose. ⁴ Melel teme la yijk'teyik xch'uunel te Dios te mach'atik la yilikix jun buelta te sakil k'inale, sok te la yaiybeyikix sbujts' te majt'anil te la yak' te Diose, sok te la yich'ikix te Ch'ul Espíritue, ⁵ sok te la smulanbeyikix te yutsilal sk'op te Diose sok te yu'el te ya xchiknaj tel pajel-chaweje, ⁶ jauk me to teme yoloj ya yijk'teyik xch'uunel te Diose ma me stak'ix ta sujt'esel xan te yot'anike. Jich me k'oem te bit'il la cha' yak'ik ta jijp'anel ta cruz te Snich'an te Diose, sok ta komon sitil la yak'ik ta k'exlal. ⁷ Melel te lum k'inal te ya yuch' te ja'al te ya xch'ay tel koel ta stojole, jich ya xch'i tel te awal-ts'unubil te ya xtuun yu'unik te mach'atik at'ejik ta sk'inalike, jai k'inal to ya yich' bendición yu'un te Diose. ⁸ Jauk me to teme ja ya xch'i tel te ch'ix sok te ch'ix-itaj mayuk stulal ya xk'ot, sok ma me lekuk sk'oplal ya xk'ot. Le' me nopolix a te ya yich' chik'ele. ⁹ Jauk me to te jo'otike xch'uunej jkot'antik te lek ayatike, ja'ex te k'uxex ta jkot'antike, melel jna'ojtik te awich'ojikix te kolele, manchuk me jich ya xk'opojotik to. ¹⁰ Melel te Dios te toj yot'an stukele, ma xch'ay ta yot'an te awat'elik sok te xk'uxul awot'anik te awak'ojik ta ilel ta sbiil te Jkajwaltike, jich bit'il te at'ejatik ta stojol te ch'uunjeletike sok te yakatik to ta at'ele. ¹¹ Jauk me to ya jk'antik ta atojolik ta tulutul te ya awak'beyik yipal ja to ta slajibal k'aale, swenta yu'un ya me ataik te beluk yakalex ta smaliyele. ¹² Jich me te ja'exe ma xch'ajubex a, pajbeyaik stalel te mach'a ay xch'uunjel yot'anik sok te ay smalib yu'unik te beluk ya yich'ik ak'beyel yu'un te Diose. ¹³ Melel te k'alal albot yu'un Dios te Abraham te ay beluk ya yak'beye, ja la yal ta jamal ta sbiil stukel, melel mayuk yan te mach'a kajal ay yu'une. ¹⁴ Jich la yal: '' JO'ON YA ME JKAK'BAT BAYAL BENDICIÓN, SOK YA ME S-ESMAJ TE ATS'UMBALE.'' ¹⁵ Jich te Abrahame la sta te beluk albil jilele, ja yu'un te jun yot'an la smaliye. ¹⁶ Jich te ants-winiketike ja ya yak' ta testigo te mach'a kajal ay yu'unike. Ta slajibal te sk'op yaiyejike, ya me yak'ik testigo jich me melel ya xk'ot te beluk la yalike. ¹⁷ Te k'alal la yak' na'el stojol te Dios ta swenta te mach'atik ya yak'bey te beluk k'axel albile, la yal te mayuk bin ora ya syantes te beluk la yale, melel jamal la yal te ma syantese. ¹⁸ Jich ay cha'ten te beluk ma stak' ta yantesele, melel ma xju' te ya spas lot stukel te Diose, te jo'otik te ay smuk'ul jkot'antik ta stojol, jich ya jtatik majt'antik teme k'axel ya jkak'batik ta stojole, junuk me jkot'antik ya jch'uuntik te beluk albilotike. ¹⁹ Te jo'otike jich me smuk'ul jkot'antik te bit'il nitil te barko sok te jun ancla-tak'in te ya xch'ojik koel ta ja'e sok te jich jun yot'an te jch'uleltike, jun jkot'antik yu'un te mach'a ochemix bael ta yutil te pak' te tsalbilixe. ²⁰ Te Jesuse la sjam ochel te jbetik ta stojol te Diose, jich k'atbuj ta muk' sacerdote ta sbajt'el k'inal, jich bit'il te Melquisedeke.