¹ Melel spisil te muk' sacerdoteetik te tsabilik ta yolil te ants-winiketike, ja la yich'ik yat'elik yu'un te ya skoltay ta k'op te ants-winiketik ta stojol te Diose, jich me ya xju' yak'bey smajt'an, janix jich te milbil majt'aniletik, swenta yu'un te smulike. ² Ya xju' yu'un stojtesel sok lamal k'inal te mach'atik ma sna'ik k'inale sok nix te mach'a ch'ayemike, te mayuk yip yot'anike. ³ Jich yu'un ya me sk'an ya yak' milbil majt'aniletik yu'un te smule, jich nix te bit'il ya spas yu'un te smul te ants-winiketike. ⁴ Mayuk me mach'a jich nax ya yich' yat'el ta muk' sacerdoteil, janax me te mach'a ik'bilik yu'un te Diose, jich bit'il la yich' ik'el te Aarone. ⁵ Janix jich uuk, te Cristoe ma ba la sle ich'el ta muk' te k'alal och ta muk' sacerdoteile. Jich albot yu'un te Diose: "TE JA'ATE JNICH'ANAT ME; TA ORA TO JO'ON ME ATATON." ⁶ Jich nix te bit'il ya yal yan buelta ta sjun te Diose: ''TE JA'ATE SACERDOTEAT SBAJT'EL K'INAL, JICH BIT'IL AT'EJ TE MELQUISEDEKE.'' ⁷ Te jayeb k'aal la yich' te sbak'etal te Cristoe, ma la skom sba ta sk'oponel te Diose sok la sbik'tal k'optey ta aw sok ok'el ta stojol te Diose, te janax stukel ya xju' yu'un te ya skoltey lok'el tel ta lajele. Sok aiybot sk'op yu'un te la yich' na'bel yobolil sbae. ⁸ Jayebuk Nich'anil a, le' la snop a te xch'uunel mantal ta swenta te bayal k'ax swokole. ⁹ Janax stukel te toj ak'ot yu'un te Diose sok ja ak' kolel k'ot yu'un spisil te mach'atik ya xch'uunbeyik te smantale, ta swenta te kuxlejal sbajt'el k'inale. ¹⁰ Ja ak'bot yich' yat'el yu'un Dios ta muk' sacerdoteil jich bit'il te Melquisedeke. YA ME JTSAJTEYBATIK YU'UN TE MACH'ATIK YA XCH'AY XCH'UUNJEL YOT'ANIKE. ¹¹ Te jo'otike bayal beluk ya jkaltik ta swenta te Jesuse, jauk me to wokol ta cholel yu'un te ja'atik ma xtojobatik ta yaiyel stojole. ¹² Melel te ja'exe ya me sk'an te yakukatikix bijubteswanej te jichuke, jauk me to te ja'atike ya to ak'anik te ya awich'ik xan bijtesel te bit'il ay ta xjajch'ibal te sk'op te Diose. ¡Te ja'exe ya to ak'anik chu'untesel jich bit'il te alale, ma to xju' awu'unik stuuntesel te tulan we'elile!. ¹³ Melel spisil te mach'atik janax ya yuch'ik te chu'ule ma sna'beyik sk'oplal te beluk toj ta pasele, melel pajal k'oem sok te chu'ul alale. ¹⁴ Jauk me to te mach'a muk'ixe ja me ya swe'ik te tulan we'elile. Jaik me te mach'atik yijubenikix te snopjibal yu'unike te ya sna'ik stsajtayel te beluk lek sok te beluk ma lekuke.