TE K'OP TA SWENTA KUXINEL. ¹ Te jo'otike ja la jts'ibubeytik sk'oplal ta atojolik te mach'a ay ta xjajch'ibale, te ja la jkaiybeytik stojol te sk'ope, sok te la jkiltik sok te jsitike, melel la jna'beytik sba te bi yilele, te ja la jpiktik sok te jk'abtike, te ja te k'op te ya yak' te kuxinele. ² Ak'ot ta ilel te kuxinele, sok jkilojtikix, sok testigootik yu'un. Te jo'otike yakotik ta yalbelex te sk'oplal te kuxinel sbajt'el k'inale, te ja ay ta stojol te Tatile, sok te ja la yak' sba ta ilel ta jtojoltike. ³ Ya me jkalbeyex te beluk la jkiltike sok te beluk la jkaiytik stojole, jich me junax ya xk'ootik ta jpisiltik. Ja me juybatik sok te Tatil sok te snich'an te ja te Jesucristoe. ⁴ Janix jich la jts'ibubeyex spisil in to swenta yu'un junax me ya sbujts'naj jkot'anik yu'un. ⁵ Jai k'op to ja la yak'botik jnoptik te Kajwaltik Jesuse, ja yu'un te ya jkalbeyex awaiyike: Te Diose ja sakil k'inal stukel sok te banti ay te Diose mayuk ik'al k'inal le'a. ⁶ Teme ya jkaltik te joybatik sok te Diose, jauk me to teme ayotik to ta ijk'al k'inale, yakotik ta lot abi, sok ma jauk ya jch'uuntik spasel te beluk smelelile. ⁷ Jauk me to teme ayotik ta sakil k'inale, jich te bit'il ay ta sakil k'inal te Diose, jich me junax ya xk'ootik abi, sok te xch'ich'el te Snich'ane te ja te Jesuse ya me spokbotik lok'el spisil te jmultike. ⁸ Teme ya jkaltik te mayuk jmultike, jo'otik nix me yakotik ta jlo'laybel jbatik sok te smelelile ma me ayuk ta jtojoltik. ⁹ Jauk me to teme ya jkaltik ta jamal te jmultike, te Dios te toj stukele ya me spasbotik perdón yu'un te jmultik sok ya me spokbotik lok'el spisil te beluk ma lekuk ta pasele. ¹⁰ Teme ya jkaltik te mayuk jpasotik te mulile, yakotik me ta yalel te ya spas lot te Diose sok ma me k'oem ta jkot'antik te sk'ope.