¹ Jonsa Josue bayek napabuli karka aboni Israel kuchuala najiremami echona Siquem ali bayeli echi ba'cha ochérami, echi o'wéla bacha isírami, echi o'wéla kar'la achinka ra'ichka na'kúrami, ali aboni bachámi jabli mapo'ona asali echi RIOSI. ² Josue jeaneli karka su'waba ralamuli: ''Je'na jeriká aní echi WALUBEALA ONORUAMI, ECHI RIOSI mapu Israel najati, jeani: yencho echi o'wéla jawami, Aliko Josue jeanei:'chabe ki'ya, echi bacha ocherami ko bo'onta echi wa'lu komich Eufrates pireali, echi Taré, echi Abraham ali Nacor onola, aboni amachika pireli auche jare riosi''. ³ Chopi nije yurkin muje onola echona Eufrates jonsa mina Canaan aniliwachi kawirl, ali nije yaki Isaac mapurika wika kuchma. ⁴ Ali Isaac yakin okua kuchi echi Jacob ali Esau. Echi Esau pe uchi kawi yakin echona rabotachi Seir aniliwachi mapuria binoi iníma, chopi Jacob ali binoi Kuchuali simibli minám Egipto. ⁵ Nije julki echi Moises ali Aron, we omonli yakin echi wiká namuti mapu we risú nilkuami jiti echona Egipto Pireami, Jonsa, nije mi ku machi pakin echona jonsa. ⁶ Nije mina yurkin echi chabe baçha ocherami echona Egipto jonsa, ali echona wa'lu bakoch muchuli. Echi Egipto pireami, echi okua ralekm torok tabl jiti niwarami kasek ali kawe kasek simibli najatsia, echona wa'lu bakoch mapu ba'wi sitana manili jonsa najatli. ⁷ mapali echi chabe ocherami ku'wirli tanli echi WALUBEALA ONORUAMI, BINOI ali kie machich niwali echona nasip mapona yemi muchuli ali echi egito pireami. BINOI nakiwili mapu echi aboni si'lika suwimea echona wa'lu bakoch rujuisa. Yemi echirika a riwali mapu NIJE olakin echona Egipto. Jonsa yem wi'li pireali echona Kawirli satebo. ⁸ NIJE ko yem yurkin echona amorreos kawiwalachi, mapu bo'onla Jordan pireami nili. Aboni nakoli yemi sayerka ali nije mi ku'wirkin. Yemi ma chapisli echi kawíli ali, ali NIJE karra suwabkin yem riwirk. ⁹ Jonsa echi Balac mapu Zipor ranal ju, echi Wa'lula rey echona Moab, wilisli ali sayerli echi Israelchi pireami. Binoi júli ali ku'wirl tali echi Balaam jiti, Beor ranal, mapurika yem kie kanila pirelma. ¹⁰ Chopi NIJE kie namkin echi Balaam. Chopi, binoi kala kanila pirelma nakili yem. Echijiti ayena ku'wirkin. ¹¹ Yem simarli nasipi wa'lu bo'wech echona Jordan ali Jericó isili. Echi o'wéla bachá nulami wika oberla sontoal yuka nakosli yemi sayerk, echona Jericó, echi amorreos, echi ferezeos, echi cananeos, echi hititas, echi gergeseos, echi heveos, ali echi jebuseos. NIJE yem ku'wirkin mapurika yemi omerma na'ura. ¹² Nije julkin echi napal yemi yuwa bachami, wabe mika ulunli najatka wikisk. Yem kie newaleli echi wili piya o echi awa. ¹³ NIJE mi yakin kawi mapona yem kiesi kalirali mapona wika rijoachi nili kiesi yem kalirali ali jipi ko yemi echona pirie. Yemi kowa echi uba rakala ali mapu iki ichiruta jawi echi olias aniliwami mapu kiesi yem ichali. ¹⁴ Jipi kala majasi echi WALUBEALA ONORUAMI ali ne bichiwali nira nijewisi ali ne kie sine riwebo nijewika olá; Chaken ulusi echi auche jare riosi mapu kie bichiwali ju echi mapu amachika piréli minian Eufrates ali echona Egipto, chopi ku nijewika olasi echi WALUBEALA ONORUAMI. ¹⁵ Yemi ke kanilsa echirika WALUBEALA ONORUAMI nijewika pirelkua, jipi rawe chapisu yemi aboni jiti, chikia nije wika pirelbo, jare wika riosi echi mapu amachika piréli chabe pireami echona bo'onta echi komichi Eufrates, wecho jare wika riosi echi amorreos iníl, echi kawi mapona yemi piré jipi ''Chopi nije ali nije kuchuali najiremka, bilepi WALUBEALA ONORUAMI yuka nijewika pirelbo tamuje. ¹⁶ Echi ralamuli echona Israel pireami ku nijewili ali jeanili: '' Tamuje kie sine riwebo echi WALUBEALA ONORUAMI, kie sine jare wika riosi najatbo, ¹⁷ echi ju BINOI WALUBEALA ONORUAMI tamuje iníl RIOSI echi mapu yurli tamuje jena'i ali echi chabe ki'ya pireami echona Egipto jonsa, mapo'ona tamuje risú rika nochartam nili ali echi mapu tamuje ayena riwaki mapu ne bichiwa nira jiwerami ju echi ali kara sineami tamuje tibuli mapali buchi isirachi tamuje, ali mapali auche jaren kawirli pireami tamuje sayerachi mapona simarki. ¹⁸ ali echi BINOI WALUBEALA ONORUAMI chaken mina u'luli mapali auche jare ralamuli echoka sirach, echi amorreos mapu jena'iba piréli. Echijiti tamuje ayenacho nijewika ka'la nawajimbo echi WALUBEALA ONORUAMI, mapujiti BINOI ju tamuje iníl RIOSI. ¹⁹ Chopi Josue Jeaneli echi ralamuli echona Israel pireami: " yem kie omerbo ka'la nijewika ola mina echi WALUBEALA ONORUAMI, mapujiti BINOI ko ju bile RIOSI ka'la bi'wím; BINOI ko ju bile RIOSI mapu kie naki auche jare nawajimbo; Binoi kie ku wikawama mapali nasobuso echi ra'ichala ali mapali chati olaso. ²⁰ Yemi kuwana ku ro'wika ku riwesa echi WALUBEALA ONORUAMI ali jare wika riosi su'wina niruami ku najatsatm, ali kó BINOI saye nirá najitama ali we risú mi olama. BINOI mi suwabma, tak jipi we ku'wirsa yem.'' ²¹ chopi echi ralamuli israel pireami ku jeaneli mina Josue:"Kie; tamuje ka'la nijewika nawajinka pirelbbo echi WALUBEALA ONORUAMI" ²² Ali jonsa, Josue ku jeaneli mina echi ralamuli echona Israel pireami:"Yemi aboni ku ju mapu machi chorika anika ra' icha jipi rawe, mapu echirika naki yem aboni, echi WALLUBEALA ONORUAMI, mapurika ka'la nijewika nawajinKa pirelbo.'' Aboni jeanili: ''Tamuje a machi''. ²³ Josue ku jeaneli: ''Jipko, Chaken banaka ulusi echi jare riosi su'win niruami mapu yem aka muchuwi, ali ku mulubensi ne pachana sulala jonsa echi WALUBEALA ONORUAMI, echi RIOSI mapu Israel iníl ju. ²⁴ Echi ralamuli echona Israel pireami ku jeaneli: " Tamuje sinibi rawe a nijewika nawajinka olabo echi WALUBEALA ONORUAMI tamuje iníl RIOSI. tamuje nambo echi ra'ichala.'' ²⁵ Josue echirika ka'lara karewali ra'ichali echali rawe. Binoi niwali mapu iki namuti nulama ali chorika oloka pirelbo rika echona Siquem. ²⁶ Josue osali je'na ra'ichali echona mapo'ona osoruta chuku echi RIOSI iníl nulalila. Binoi bile rite jusa ali sikochi achali, bilen okorli pachá mapu mulupi ilíli echi WALUBEALA ONORUAMI kalila. ²⁷ Josue jeaneli kara su'waba echi ralamuli: ''Ninasi, je'na rite jiti ku natabo mapu chorika anila tamuje. Mapu namli kara echi BINOI WALUBEALA ONORUAMI ra'ichali mapu tamuje yali. Echijiti jena'i muchuwi mapu machika tamuje sayerma, sine rawe kie nijewisa yemi echi RIOSI.'' ²⁸ Jonsa Josue kara suwaba ralamuli mina júli wabe mika, ibil ku simibli mapo'ona nareli aboni kawi. ²⁹ Jonsa ma karra sunusa jena jiti, Josue echi Nun ranala, echi mapu WALUBEALA ONORUAMI nijewika olámi nili, Mukuli, Bile siento mina makoy bamika. ³⁰ Aboni sinemka ri'le yerli otoli echomi suwe binoi kawiwalachi mapu nareli, echona Timnat Sera, echona mapu Efraín rabotachi ju, Gaas rabo mina ripar. ³¹ Israel pireami sinibi ijewika nawajinka pireali echi WALUBEALA ONORUAMI sinibi mapali echi Josue a biteachi, ali mapali echi auche jare ma ochérami a biji pireachi mapu juba suwili Josue yuwa; echi mapu ayena riwali churika echi BINOI WALUBEALA ONORUAMI ku'wirli echi Israel. ³² Echi José uchula, mapu Egipto jonsa aka sirli echi ralamuli Israel pireami, ri'le otoli echomi Siquem, echomi uchui kawirli mapu Jacob raleli echi Hamor kuchuali, echi Siquem onola. Binoi ko ralali bile ciento echi wanomi biwarami Plata aniliwami, ali echi kawi ma nochotarami nili echi Jose kuchuala yarami nima rueli. ³³ Eleazar echi Aarón ranal ayencho ma mukuli. Aboni ko ri'lé yerli otolo echona Guibeá, mapona wika rijoachi níli echi binoi ranal Finees bitelchi, mapu binoi yarami nili. Efraín ripaye rabo nili.