¹ Xani, wa gepi chininri pamole ksuru, walenwa Gadar ksuru chigka, Pamole mapa gogne chininri wale ksuruko, wa pogirchi gitakanru tokanchi poyagkakalurupa ga wa yinuwaka poyagkakletanutkaluna, wale gogneko Gotiyone gayegixachine wanna galukmaklu wanna girukotyapna, seyni gi wane rixanna. Seyni Gotiyoneko kanashkatanna wannako girukotanna wa rayegixjenni. ² Ga wa Gotiyone gapatjetatkalu gipokchikakna psolpotuko prowinsya wa pogirchi Gaswero chijne, ga wa gimyo rutakyapna mugletu galuka kamrerenatachine. Gike gimkata yostaletlu, gi rixanu rujruka pikletanatkana wannani psol-pokchiyako. ³ Pejnuruneko prowinsya gajene tsru gitakalune, ga wa pokchi girukotane ga wa tsru gitakalune pogirchi gitakanune, Gotiyone gipxakanatachine gi rixanu Martokeyo pikle wanna-yma rujrukanatka. ⁴ Gi rixanu tsrunitkani Martokeyni pogirchi-pjiya, psoluko prowinsya poshalpiranamtatka, gi rixanu wale yineru Martokeyo tsernapotumta. ⁵ Ga wa Gotiyone giylatanatkana rayegijxennina wa yoglolewapi-yma, ruylamkanna ga wa nikatamkanna ga wa wanna galukyawaka rixkanna wa rayegijxenni. ⁶ Ganikajpokchi potu wa Sosa, Gotiyone giylatanna ga wa nikatkanna pamyo pacha jejinni. ⁷ Wanna giylatanru Parsandata, Dalfon, Gaspata, ⁸ Porata, Gataliya, Garidata, ⁹ Parmasta, Garisayi, Garidayi, Wayzata ¹⁰ ga wa pamolni Gaman gwenenni ga wa Hamedata gwenenni koxa, wannanwa Gotiyone gayegixachine. Seyni gi wa rujtuka gejnugkatetkana. ¹¹ Wale gogneko yantankanna Sosa giylatikalunni, wale pokchinwa pogirewatyawaka, ga wa rugkakatka pogirchi. ¹² Wa pogirchi wane chinro pguro Gistila: "Gotiyone giylatanna pamyo pacha jejinni Sosa pokchiya, wane koxa rawamtanna pamole Gaman wgenenni. ¿Kluneru kamrutna wanna pimri pogirchi pokchiya? Xani ¿Girni wa panjitanru? Ga wa peneko pixa. ¿Girni wa panjire? Ga wa peneko." ¹³ Gistila wane china: "wa pogirchi gigleretiniplu", Puchichanru Sosa gwachine Goteyone wanna koxa towutka poyagkakyapluna chinikolna yechikawapa, ga wa puchichanru Gaman wgenenni mane chikalunepni ga wa rostunojitikolupna." ¹⁴ Wane rixa towutleta pogirchi ga wa poyagkako chinyawaka. Sosa pokchi rutakikatka tokanchi poyagkakanrupna, ga wa chikakanatkana pamole Gaman wgenenni. ¹⁵ Sosa rawanatatkana Gotiyone wane rapatyana pamole gepkomkoje gogne walenwa Gadar ksuru, ga wa Sosa ruylatinikanna mapa pacha jejinni seyni gi wa rustuka gejnugkatetkana. ¹⁶ Ga wa pimrine Gotiyone pogirchi prowinsyate gwanatachine wanna koxa gapatjekaka yostatyapluna ruwekinrina, ga wa rapnanutna rayegixyeneye-yna ga wa ruylatkanna payokgipre mole pamyo rayegixenni, seyni gi wa rustuka gejnugkatetkana. ¹⁷ Wa tye giknoga mapamole mapa gogne Gata ksuru. Pamole gepkoxamkoje gogne chininri rapnanutna ga wa wale gogne kamrutluna tsru niklewlu ga wa rumjikna. ¹⁸ Seyni Gotiyone Sosa gwanatachine wanna koxa gapatjeta pamole mapa ga wa pamole gepkoxamkoje gogne. Ga wa pamole pamyo gogne wanna koxa gapnanuta ga wa kamrutluna tsru niklewlu ga wa rumjikna. ¹⁹ Wale chinanu Gotiyone muxowakanu gwachine, chiji mashawaka gitakapjitachine, pamole gepkoxamkoje gogne wa Gatar ksuru getanatachine wanna gimjikachine ga wa tsru niklu kamrutna, ga wa niikaluru renekashkakna wanna kakluiko. ²⁰ Martokeyo yonatlu tye pirana ga wa karta yokanata pejnuruneko Gotiyone yegi wa pogirchi Gaswero prowinsyate gwachine. gewi potuko gwachine ga wa gowuka gwachine. ²¹ Pamole gogne gepkoxamkoje ga wa pamole pamyo towutpotutkana rapnanutiniri psolwalapuko. ²² Tyenwa wale gognekaka Gotiyone gapnanutinritka rayegijxene-yma ga wa giksuru wale ksuru wamonuwanatachine gimuwatachinetkani gipnamoletachine gimjiklu gogne rixatkaluna. Ga wa tsru niklu koxamka rumkata kamruretna ga wa gimjiklu ga wa genekashlu yokanatna niikaluru ga wa rupekaka genekashkakletna ga wa kamonurune genekalurupa. ²³ Giyagni Gotiyone gomkagi gimuwleta yinuwakiniko pixka, china yongatyawaka Martokeyo wanna chinanu. ²⁴ Wale gognepa, Gaman Hametata wgene, Goteyone gayegixachri, wale yanshinikanunatlu nikatyapna Gotiyone, Ga wa Pur ruknokana (rupenoklu koshpakikna), jijrukikolupna ga wa nikatikolupna. ²⁵ Seyni Gistila gapokinitka Pogirchi yegi, rixa yonretyawaklo karta towuwata mugletu ginshinikanu wa Gaman wale galuka giylaletna wa Gotiyone seyni walenuko gimtukjiwutnanwa, ga wa wugenene gimkata gixripkakota ga wa rostunojitkona. ²⁶ Wale gogne giwakaka giwakata Purim, Pur giwakatlu china yonretyawa wa karta, pejnuruneko wanna getanru wanna giknonjeru chinanu, ²⁷ Gotiyone gigitlu gerotu rixyawakapna ga wa kamrurepna. Wa tye rixyawakapna wannanukni. Ga wa pejnuruneko rapatanune wannanni. Wanna galikaka gimkata giknokakletlu rumjikinripna gepi gogne pawalapkaka, wanemka rixa giknokakletanruna wale pshinitsonnu koxa palapkaka. ²⁸ Wa tye gognekakmakni ruknokakikolu ga wa retikolupna wuklopishanepa, satkaka moletkakachine, satkaka prowinsya, ga wa papokchikaka. Wanyi Gotiyone ga wa giklopishanna gi wa retashatnawana retikolupna girukotikolupna tye gogne kaka wa Purim gajene, gi pagogneko ramtaka gishinikotanna. ²⁹ Pguro Gistila, Gabigail wgene ga wa Martokeyo wa Gotiyo wale yonatlo sato karta psol pogirewleyako ga wa rugitkatkana wa gepi chininro karta wa Purim chinanu. ³⁰ Pejnuruneko Gotiyone yokanyegitka wala karta ga wa 127 prowinsya wa Gaswero pogirewle, kigleru gwashlu rixinripna ga wa galikakpotu. ³¹ Wa twu karta purim gogne rugitatkalona rutakikolu gogne, gi rixanu wa Martokeyo gotiyo ga wa pguro Gistila wanna towutpotutanna gotiyonni. Ga wa gotiyone gigitna tye towutikolpotna wannanuko chinanupni ga wa giklopishanepa, wane pnutkoxa rugitkana rogajirewatinapna gogne ga wa kegemgalna. ³² Wa Gistila towutlewle ruknokakyapluna wa Porim chinanu, ga wa kiruka yonatluna.