¹ Mi kin'himia ekhweeli mwa Kristo, mi akinootha. Mupuweloaawaka onaavaha osahiti ni miivano, Muin'nepani Nttakattifu, ² wo mivano otjukula tjinene ni khunkimalela okiweria wa nrimaniwaka. ³ Phimaana mi waanokitjivela wira mi kikhale onanarihiya ni omualanihiiya mwaKristo wonifento wasun'naka, ni akhanle assimutjaaka omuiiruthuni. ⁴ Ayenatja an'nIsrael. nawakhalana, waaria, wataana, ovahiya wo Kettelo, nuuttittimihia Muluku, nukhuluvelihiya. ⁵ Wayeenatja ankala anpapehu okhalai, wa yoole Kristo n'yaraliaawe, wonayeli eruthu, ni yooyo thiri Muluku wa oteene, ni akhale Yena rii oreerihiya wohimaala. Amem. ⁶ Massi kahi wiira nuulumo na Muluku niri noovonhiya. Ni kahi wiira an'nIsrael ankhala wIsrael. ⁷ Kontha kahi nikhoto nootene na Abraao wekhweeli ankhala assanaawe. Masi, muaha wIsaqui on'hala wiihaniya nikhoto naawe. ⁸ Iyoo tiiyo, assaana omuiiruthuni khaanakhala asaana aMuluko. masi asaana okhuluvelihiya ankhala nikhotho. ⁹ Phimaana n'na tinuulumo nookhuluvelihiya: "Yooyo owakathiuuyo mi kinaawa, ni naahala ovahiya muaana Sara. ¹⁰ Ni kahii iyoo pahi, masi wa hoolo Rebeca ahorupala erukulu ya papeehu Isaque. ¹¹ Ni asanaayo yaari ahinaaya oyariya, kayaapankale ethu yoorera walanii yoottakala (wo wira othuna wa Muluku Woottanlawawe okhalelee, kihi womitteko, nlattu wa Yoole niiyana), ¹² yena ahohimeriya ila: "Owuuluvala nanvarela ntheko muaavano. ¹³ Ehanthikiya tjo: "Mi kihonfenta Jaco,masi kihon'nhoka Esau". ¹⁴ Nihimiekeni, vano? ohaavo ohinassariya n'mphantti wa Muluku? kuuvo. ¹⁵ Phimaana Yena hon'himeeria Moises: "Mi kinahala okhalana ekiriri wa yoole Mi nkelaaka omoonela ekiriri, ni kinahala omoonela othunku wa yoole mi nahalaka omoonela okthunku". ¹⁶ Phimana, iye khunphuanela wa yoole nothuna, hata yoole notthiawa, massi wa Muluku, tirina ekiriri. ¹⁷ Phimana tjolepiya tjihonhimerja faraoo: "Wo yeeyo kihonvussa, wo weero mi kuthonhihere wa wee ekurutjaka ,ni wo weero ntjinanaka nikhale nohimyatjiya etuninha yothene". ¹⁸ Vano yena hana ekiriri wo we nothunawe ,ni nanlipha we nonthunawe. ¹⁹ Vano, we onkela okirela: " Kontha esiyani Yena omotheria nthu? Tipani nokhotta Othunwawe?" ²⁰ Ovirikanatho, mlopwana, woopani onomwakhulatja Muluku? onaahala oloko wayoole omumpale: "Okuupenleni tjo?" ²¹ Namapaka ekhalako khanpanka ekhalako nuloko yooyo wo varela ethu yoontjivela, ni ekhalako ekina wo vareliya naathu oteene? ²² Muluku, aphela othonhihera otjatja wawe ni apankaka otjuweliya Ekurutjawe, hovilela tjinene ekhiyumpi tjipankaliaawe nuutjtja, othenkatjiya wokwanhuliya, ²³ aphelaka wira Yena apanke otjuweliya mihakhu wo Wariawawe ni khiyumpi tjo kiriri, wira waaria othenkatjaliaawe Yena khalaiiru, ²⁴ yaayo tihivano, ni yaale wihanaliaawe, ni kahi paahi majudeu, hata namalaponi? ²⁵ Ntoko Yena n'himerialiaawe Oseias: "Mi kinahala owihana athuaaka yaale yahari athuaaka, ni ofentiya, yaale yahafentiye. ²⁶ Ni okhala wira, nipuro nulumeliyaaya: Nhuuva khan'nkhala athuaaka" N'woo ayenatja anaahala wihaniya: "Assaana aMuluku nkumi". ²⁷ Isaias okhuwela mwaha wan'nIsrael: "Poti okhala num'meru naasaana owIsrael ntoko n'haava wopahari, nakhala m'motja owamini n'hala woopoa, ²⁸ Phimaana aPwiya anaahala omwarissela Nulumonaya etuniya yooteene, wowakuvia ni mpaka omaliheriya". ²⁹ Ni, ntoko Isaias patjenriaawe wuuluma: "Ni aPwiya anakhoto yahanihiyenre nikhoto, nanakhala ntoko Sodoma ni nanahala okhala ntoko Gomorra". ³⁰ Nin'hala ohimiani, vano? Amalaponi, yahaarwela esariya, ahophwanha esariya, esariya wowamini, ³¹ massi Israel, arweeale Ekettelo yosariya, khaphwanhale. ³² Kontha esiyani? Kontha ayenatja kharwelale eyo nuwamini, massi ni miteko. Ayenatja ahokwakwathuwa wa nlukuni nokwakwathula, ³³ ntoko tjantikhiyaaya: "Mi kinaahiya oSiao nluku nokwakwathula, mwala wooveha. Yoole n'hala okupali khan'hala opattihatiya ehaaya".