5 ¹ Rattha, athaatjiri! Munle ni ntuthuwaka mahuviho an'hala wukhumenlani. ² Mihakhu tjinhu tjiri tjowuntha ni ekuwo tjanhu tjiri tjooliya nuuvera. ³ Eworu tjinhu ni eparatha tjinhu tjiri tjoonhela ehussi, ni ehussiya enrwa okhala namonennhu, ni n'norwa oliya erutthuinhu manaa mooro. Ohossunkatja mihakhu wa mahuku oomalela. ⁴ Nyu muethikithi yaananteko ahephale n'mathani winhu, wo nyenhu n'hovukuliya vakani vakani, ankhala akhuwelaka, ni okhuwela wa yale ahepheliye etjoliya tjaiya ohiphiya n'maruni wa Apwiya aanakhotho. ⁵ N'hokhala mwinthukoni wo valhi, mwaahokhalana mihakhu tjinhu, mirima tjinhu tjaari tjooneneva nihuku ninvenhu. ⁶ N'hon'hukhumu ni n'homwinva nassariya; yena khawoluanaleni. ⁷ Vano, assulupaliyaka, nkhale oovilela npaka Apwiya wanwaya. Na maliha nowehenra ohepha wa tjoliya tjomaathani, awehenraka nuuvilela npaka wanakhelawe epula yowantja ni yoomalela. ⁸ Nyu nkhale anamavilela. Nliipihere mirima tjinhu, okhala wiiraowa wa Apwiya ori wakhiviro. ⁹ Assulupaliyaka, mwikassarane nthu niikhwawe, woo wiira n'hihukhumwiye. Nassariya rii vankhora. ¹⁰ Assulupaliyaka, nkhalane nlikaliho woovilela wo maprofeta yuulumatjale mwantjina na Apwiya. ¹¹ Phimaana enakupalihu ooreriya anvilela moohuvani. N'hinwa ovilela wa Job, ni n'hona yoomalela wa nphanthi wa Apwiya; kontha Apwiya pokiriri nuuthunku mwintji. ¹² Massi, watjithu tjootene, assulupaliyaka, n'hilaphele, n'nakhala wiirimu, ni n'nakhala vathi, n'nakhala olaphela manaana makwawe. Yakhala yoorumenliya aaye ekhale, ni yakhala mena ekhale mena; weera muhiimore moothukiyani. ¹³ Hokhala nthu rii ninhu oohawa? Hookhala ooteeliya? Mwipe etjipo. ¹⁴ Hokhala nthu rii ninhu oweereya? Mwihane mansinhau okapela, ni answalele, anthikithelaka makhura oonukhela mwantjina na Apwiya. ¹⁵ Ni eswali yowamini wnanvoniha nretha, ni Apwiya ananvussa; ni akhale ookossa, naaleveleliya. ¹⁶ Nlaphe, tjookossa nthu niinkwawe, ni nswalelane nthu nikwawe wowiira nlevelelane oswali woonthu ossariya onawinwenliya. ¹⁷ Elias aari nthu phanka hinyano, ni ahoswali wiira ehirupe epula, ni epula khayarupale miyakha miraru ni mweri siita. ¹⁸ Ni ahoswali tho, ni yahorupa epula, ni ethaaya yahoruweriya. ¹⁹ Assulupaliyaka, akhala nthu wanhu rimelale mwikwelini, ni nthu ankelihaka, ²⁰ Ntjuwele wiira nthu noonkumiha nkhala woonanara, onamopola n'nepa mookwani, ni naavuhela nphwinko wanthu ootheka.