1 ¹ Tiago, nanteko a Muluku ni Apwiya Yeesu Cristo, khumi na meeli okawaniyatja, kiholumiha. ² Assun'naka, nkhale tjitjo notheliya opwanhenhyu olawihiya wakhula manan'na. ³ Ntjuwele wira othehiyawinhuu mowamini onawa oweherera. ⁴ N'hiye owehereranwo omalihere ntekwenhoyo, wowira nkhale otaphowatja ni womalela, wira ehikhale emotja yowohalelatjani. ⁵ Ni thoo n'motja wa nthu aphela okhala otjuwelatja, an'vekele Muluku, ni yena navaha nfento wohimwaapa yole nlepela; Ni yena nahala wovahani. ⁶ Massi olepele ni wamini, wohanihera, kontha yole nanihera rii n'toko niwiinpi noophareya, ninethiheriya niiphiyoo niriheliyaka nphanthi nin'phathi n'kwawe. ⁷ Yoola n'thula, tho, hiwehenre wira nawakhela ethu ya Pwiya; ⁸ Nthu toko tjo nkhala ohilipa wokhalela niphirotjawe tjotene. ⁹ Mun'na massikhini haana atheliyaka wayeele erinawe. ¹⁰ Massi n'lopwana thatjiri haana atheliyaka ni mowiyevihawawe, kontha nahala orimela ntoko ethutu yan'mathani. ¹¹ Kontha ntjuwa nin'nokhuma nuviha ni malassi an'noma. Ethutu enamora, ni orerawaya onamala. Wa manan'na yayo namihakhu nahala orimela mookuminiwawe ¹² Otheliya tuule nvileloa moolawihiyani, kontha onalawihiyane, yene nahala wakhela ethuvo yekumi, ekhuluvelihiye wa yale anonfenta Muluku. ¹³ Khavo, nira athehathe hiiyavale iiraka "Kinthehathehiya ni Muluku", kontha Muluku khanthehathehiya ni yootakhala ni yena khaavo ninthehatheha. ¹⁴ Massi wakhula nthu n'thehathehiya ni tjithu tjontjivelatja, tjontjivela nompurula. ¹⁵ Vano, wanavirale wa tjothuna, enayariya etampi, ni tho etampi yaphiya muthokuthani nayariya nookwe. ¹⁶ Assun'naka ofentiya mwikhale othepiya. ¹⁷ Yovahiya yotene yorera, ni tjovahiya tjotene tjinkhuma otjulu, tjinkhuruwa wapaapa wanthukoni, yoyo khanvirikaniha wala okawaniyatja nthutji. ¹⁸ Muluku honthanla onivaha ekumi wa nulumo neekweli, wira nikhaleke ntoko mihokorokho tjopatjera wa tjotene tjumpaliyawe. ¹⁹ Assun'naka ofentiya, nhu n'natjuwela, wira khula nthu haana okhala owinwa, apatjeke wulumatja, apitjeke oviruwa. ²⁰ Kontha oviruwa wanthu khunpaka essariya ya Muluku. ²¹ Ni tho n'reele makhalelo oteene onanara ni tjotakhala tjotene, mwakheke ni wiyeviha moolumo anlaliyawe wira aweriye woopola eron'hotjihu. ²² N'khaleke ovarela nteko moolumo, n'hikhaleke owinwa passi wira n'hitjotothe. ²³ Kontha yole niiwa moolumo woohivarela nteko n'likana tooko yole niitjona ni elola. ²⁴ Yena naweha ekhoviyaweyo, narwa, ni wowakuviyatja naliyala tjariya. ²⁵ Massi yoole nethihera oratha ekethelo yotaphuwa, ni nawakulela ovara yeyo hiikhalaka owinwa passi nuliyala, yoyo nthuyo naarerihiya wa yele en'varawe. ²⁶ Akhala nthu nitjona okhala natiini, massi khamwatjera mliminawe noototha nrimaweyo, ni etiniyeyo enkhala yoohithithu. ²⁷ Etiini yorera ni yoloka vamenthoni wa Muluku ni papen'hu piila; okhavihatjera ekhwatjuni, anankweli mohuvanimwaya, nissunkaka wa tjootakhala n'tuniyani.