¹ dakaningisa uye ndakaona Gwayana Rakaima pa dhunhu re Siau. Irona ranga riri ne tchuru tchemakumarongomuna ne marongomuna e zvuru, anga atarwha pameso pawo zina Rake uye ne raBhabhake. ² Ndakazwua izvi rekudhenga, izvi hingana mvura yakawanda uye hinganazve Mhene ikuru. Uye izvi rendakazwua ranga rakaitao hingana anyakuridza ngoma etchiridza ngoma dzao. ³ Awona ai emba ngoma itswa pamberi potchigaro, pamberi pezvinyama zvirongomuna zvairarama uye pe matchenjebvu. Apana waikwanisa kufundira ngoma, kunze ke zvuru ne mazana marongomuna nemarongomuna ezvuru akatengwa panyika. ⁴ Aya ndio asikazi kudzi swipisa ne anakadzi, ngekuti akatchengeka umhandara wao. Ndio wanoteera Gwayana kwarinoyenda. Awo wakatengwa pakati peararami se okutanga aMwari uye kune Gwayana. ⁵ Akuzi kuoneka kunyepa pamuromo pao; aona anotsika. ⁶ Ndakaona ngirosi imweni yetchimburuka pakati pe dhenga, anga ari ne soko risikaperi, masoko akanaka kuitira kuti awimbise anorarama panyika, kua rarami ese, dzinza, mureketero uye anyu. ⁷ Iyena waikuwa noizwi guru: "Ithyai Mwari uye Mupasei mbiri, ngekuti nguwa yeutongi Wao yaguma. Rumbidzai Uya waita dhenga ne nyika, bhahari uye muambi mwe mvura". ⁸ Ngirosi imweni yetchipiri yakateera Yetchiti: " yambwera, yambwera Babironia ikuru, yakatchengedza madzinza ese kuti amwe vinyu yezvitswerudzi zveuseki". ⁹ Yakazoateerao ngirosi yetchitatu, yeireketa no izvi guru: "Kana munhu etchirumbidza tchirombo uye nemufananidzo watcho, uye kakutambira tchidindo pameso kana pa nyara, ¹⁰ athcazomwao vinyu yo shungu ddzaMwari, yaka dhururwha pasina Shungu Dzake. Uye utchazo viringidzwua ne moto uye pakupisiswa pamberi pe ngirosi dzitswene Dzao uye pamberi peGwayana. ¹¹ Tsutsi tchematambudziko tchino kwira patchose; uye apana ruzororo, masikati uye kana usiku, anonamata tchirombo uye nemufananidzo watcho, uye ese anotambira tchidindo tchezina ratcho. ¹² Apa, pane kushingirira keatswene, ke aya anoteerera mutemo waMwari uye kutenda kunaDjesu. ¹³ Inini ndakazwua izvi rekudhenga retchiti: "Tara: Wakaropafadzwua aya wanofira munaIshe" Honde". unoti Mweya: "Aona ngaazorore mumabhasa awo, ngekuti mabhasa awo atchaateera". ¹⁴ Ndakaningisa, uye kwaka kuri ne makuta ekutchena uye, akagara pamusoro pemakuta, umwe akatodzana se mwana we munhu. Iyena anga ari hata ye siriva pamjsoro pake uye ne foisi yaka rodzerwha pamoko pake. ¹⁵ Hino ngirosi imweni yakabhudha muthemberi yei dhainzira no izvi guru kuno uya wanga aka gara pa makuta: "Bhata foisi yako uye otanga ku kotokora, ngekuti nguwa yako yaguma, zvikororwhe zve nyika zva tswuka kuti zvi kotokorwe". ¹⁶ Hino uya anga akagara kuma kuta akapinza foisi yake panyika, uye nyika kakuto kotokorwha. ¹⁷ Ngirosi imweni yakabhudha muthemberi ku dhenga, yetchiunzisao foisi yakarodzerwha. ¹⁸ Uye yakabhudha pa Aritari ngirosi imweni inosimba re moto, uye pakukuwa neizvi guru kuno iya yanga yino foisi yakaroderwha: "Tora foisi yako yakarodzerwha kuti ukotokore zvibhereko zvemuzambiringa wenyika, ngekuti muzambiringa dza tswuka". ¹⁹ Uye ngirosi yakapinda ne foisi panyika uye yika kotokora muzambiringa wemunda uye kakudzikhandira mudziwa rikuru rekutsamwua kaMwari. ²⁰ Dziwa rakatsikwua kunze kwe guta uye akazobhudha ngazi gumira pamupimo yebiza, pamupimo we tchuru nomazana manomwe emupimo.