¹ No maererano o zviro zvewaka tara: "Zvirinani kuti mwanarume asatswase mwanakadzi". ² Asi, nge ndaa yezvitswerudzi uye yemuedzo, mwanarume umwe ngaagare ne mukadzi wake, uye mwanakadzi ngaagareo no mwamuna wake. ³ Mwanarume ngaapase mukadzi zvinodhikanwa mumutchato; uye, zvimwezvoo, mwanakadhi ngaaitireo mwamuna. ⁴ Mwanakadzi aatongi mwiri wake, asi unotongwa ne mwamuna. Zvimwezvoo, mwamuna aatongi mwiri wake, asi mukadzi. ⁵ Musazvirambire umwe kuno umweni, pamweni kana munga tenderana pa imweni nguwa, kuitira kuti mudzipereke mumunamato. Hino mungapedza izvi, dzipindireizve. Mungadharo Sathani aazomu edzi ngondaa yekuti amuzi kuzvirana. ⁶ Nekudharoko inini ndinomubvunzai zviro izvi se maonerere angu zvisiripi zvemutemo. ⁷ Inini ndaidha kuti mwese mugare hingana inini; asi umwe neumwe uno tchipo tchake tchaakapaswa naMwari, umwe netchimwe umwenio netchimwenio. ⁸ Ndinobvunza asikazi kutchata uye akafirwa kuti garai musikazi kutchata hingana inini. ⁹ Asi, mungakonerwa kuzvibhata, tchatai. Ngekuti zvirinani kutchata pane kuzvipira mukudhiisisa. ¹⁰ Hino kuno akatchata ndinoapasa mutemo uyu, andisiripi inini, asi Ishe: "mukadzi ngaasa siane ne mwanarume wake". ¹¹ Asi iyena angasiya mwanarume wake, ngaagare asikazi kutchata, kana kuti ngaazopindirane kaku whirirana naye. Ndizvoo" mwanarume ngaasasiane nemukadzi wake" ¹² Asi kune amweni, ndinoti inini, asiripi Ishe, kana hama iwe inohama isikatendi, asi kana iye ari fara kugara naye, iyena ngaasamusiye. ¹³ Kana mwanakadzi umwe ano mwamuna asiripi mutendi uye arikufara nekugara naye, iyena azviiti kumusiya. ¹⁴ Ngekuti mwamuna asiripi mutendi unotcheneswa nge ndaa yemukadzi, uye mukadzi asikatendi ano tcheneswa ngendaa ye murume mutendi. Kunze kwazvo, ana awo aidha kuita hingana okuswipa, nanguse atswene. ¹⁵ Asi, kuti shamwuari isiripi mutendi ingayenda, isiye iyende. Panyaya iyi, hama adzizi kusungwa pazvidho zvayo. Mwari akatidhainza kuti tirarame nerugare. ¹⁶ Ngekuti, se zvemunoziya, mukadzi, utchaponesa murume wako ere? Kana zveunoziya, murume, utchaponesa mukadzhi wako ere? ¹⁷ Munhu ngararame upenyu bhasi upenyu waakapaswa naIshe uye waakadhainzirwha. Izvi ndizvo zvendinotumira kuma themberi ese. ¹⁸ Pane munhu wanga aka tchekerwha paakadhainzwua pakutenda? Iyena ngaasaedze kuwhandisa utchekeri. Anga ari munhu akatchekerwha ere paakadhainzwua pakutenda naMwari? Iyena adhikani kutchekerwha. ¹⁹ Nekudharoko, kana kutchekerwha kana kutama kutchekerwha azvina bhasa. ²⁰ Mumwe ne mumwe ngaagare paakadhainzirwa na Mwari kuti atende. ²¹ Wanga uri musenzi pewaka dhainzwua naMwari? Usanetseke nazvo. Asi ungasiya kuita musenzi, unoita zvakanaka. ²² Kune munhu wakadhainzwua naIshe ari musenzi, unhu uyu wakasununguka munaIshe. zvimwezvoo, uya wakasununguka paakadhainzwua kuti atende, Musenzi waKhirisitu. ²³ Imwimwi makatengwa nemutengo, musaite asenzi eanhu. ²⁴ Hama, sezvoo kuti umwe neumwe wedhu zvaangaari petaka dhainzwua pakutenda, ngatishingirire takadhai. ²⁵ Hino, nge maererano e anhu asikazi kumbotchata, inini andina murairo waIshe. Asi ndinopa maonere angu se munhu, wekuti wakathembwua panyasha dzaIshe. ²⁶ Nekudharoko ndino funga kuti, ngendaa yekunetseka ke mazuano, zviri nani kuti mwanarume agare akadharo. ²⁷ Iwewe wakabhatana nemukadzi? Usaedze kumusiya. wakasununguka ere pamukadzi? usamutswake. ²⁸ Asi, ukatchata, usaite tchishaishi. Uye kana mwanakadhi asina kutchata angatchata, iyena aiti tchishaishi. Asi uya utchatchata unonga ane nyaya pakurarama, inini ndaidha kumu nunurai paizvi. ²⁹ Asi, paizvi ndinoti hama: nguwa yasara idhoko. Kubva zvino kwenda mberi, siyai aya anorarama neakadzi hingana asina. ³⁰ Anotchema hingana asikatchemi; anofara, hingana asikafari, anotenga hingana asina tchiro; ³¹ uye aya anotengesera zviro munyika, hingana apana tchaanotengesa; ngekuti zviro zve nyika ino zvaaku guma kuma perero. ³² Inini ndaidha kuti musununguke paku kanakana. Mwanarume asikazi kutchata ano rangarira zviro zvaIshe, pakufadza Iyena. ³³ Asi mwanarume akatchata ano onerera zviro zvenyika, kuti afadze mukadzi wake. ³⁴ Iyena wakadhimburwha. Ndizvoo, kune mukadzi asikazi kutchata kana kuti chiri kadzi ino onerera zviro zvaIshe, pakuita mutswene panyama uye pamweya. Asi mukadzi wakatchata uno onerera zviro zve nyika ino, kuitira kuti afadze murume wake. ³⁶ Asi kana munhu etchifunga kuti aripi kubhata chirikadzi yake nemadhikaniro azvo, uye iyena etchidharika nguwa yekutchata, kudhai zveidharo, ita zvaanodha. Iyena ashaishi, ngaatchate. ³⁷ Asi kuti iyena asimba mumoyo make uye asiripi mukumanikidhika, asi unobhata zvidho zvake, uye afunhga mumwoyo make kuita izvi, kugara asikazi kupindira chirikadhi yake, anoita zvirinani, ³⁸ Hino, uya unotchata ne chiri kadzi yake unoita zvakanaka, uye uya unotsanangura kutama kutchata, unoita zvakanakisisa. ³⁹ Mwanakadhi wakaungana ne murume wake kana iyena etchirarama. Asi, murume wake angazofa, iyena kana kutchata newanodha, asi munaIshe. ⁴⁰ Ndeirambira muku tonga kwangu, iyena waizorambira mukufara kudhai agara akadharo. Ndinofunga kuti ndino Mweya Mwari.