¹ Kana umwe wenyu etchirwhisana ne hama imweni, munodhirei kwenda koo dhudza kumbuto yezvoutongi, pamberi peatongi asikazwi pane kwenda kuatswene? ² Imwimwi amuzviziyi kuti atswene atchazotonga nyika? amukoni kuyenzanisa zvimhangwa zvidhodhori? ³ Amuzviziyi kuti titchazotonga ngirosi? Kuzoti zviro zveupenyu ke! ⁴ Nekudharoko, munotonga zviro zvakaita nani zveupenyu, munozviitirei pamberi peasikatenderwhi mu kereke? ⁵ Izvi ndirikureketa kuti mutsweruke. Pakati penyu apana uneruziyo rakakwana kuti aenzanise mhangwa dzekurwhisana pakati pe hama? ⁶ Nekudharoko, Mutendi kwenda koodhudzira mutendi kumbuto yezveutongi, uye izvi zvinogadzikwa pambuto yemutongi asikatendi. ⁷ Kemuri kunonga kuri kuruza kudhai pakaoneka kurwisana ngezoutongi pakati pe makhirisitu. Ngekuti amutambudziki nezvakashata. Ngei imwimwi wene amutenderi kupandukirwa? ⁸ Munoita zvakashata nekupandukirana, ari iona hama dzenyu! ⁹ Amuzviziyi ere kuti asikazi kururama aapindi muUmbambo waMwari? Musatchengedzwe: Anoita zvitswerudzi whe useki, anonamata zvifananidzo, mahure, anakadzi anodhisana patchao, anarume anowatana ega ega, ¹⁰ mbava, anyambau, zvidakwa, nyamatswedha ne anodhiisisa, apana wao anopinda muUmambo waMwari. ¹¹ Amweni enyu akapindao nemo. Asi imwimwi makasukwa, makatcheneswa uye mo tenderwa naMwari muzina ra Ishe Djesu Khirisitu pamwepo no Mweya waMawri wedhu. ¹² Zvese zvakanaka kwendiri, asi andikurirwi nazvo. ¹³ Zvekundyia nge zvemundani, uye ndani nge ye zve kundhya. Asi Mwari utchaputsa zvese. Mumwiri ausiripi we zvitswerudzi zvo useki, asi nge waMwari. uye Ishe nge we mwuiri. ¹⁴ Mwari wakapurumutsa Ishe nesuo titchapurumutswao ne simba Rake. Imwimwi amuzviziyi kani kuti mwiri yenyu i mutezo yaKhirisitu? ¹⁵ Zvingaita here kutora mitezo yaKhirisitu kakuiyenzanisa ne hure? Azviiti. ¹⁶ Amuzviziyi here kuti anosongana ne hure anoita nyama imwe pamwepo naye? Zvitarwa zvinoti: "Ari airi anoita nyama imwe bhasi". ¹⁷ Nekudharoko; Uya unosongana naIshe anoita mweya umwe pamwepo Naye. ¹⁸ Tizai patchitswerudzi tcheuseki! Munhu ungaita tchishaishi tchimweni i kunza kwe nyama, asi munhu anoita tchitswerudzi tcheuseki anonga etchi shaishira Mwiri wake. ¹⁹ Amuziyi ere kuti mwiri yenyu i themberi re Mweya Mutswene? unogara mukati menyu, wemaka tambira kubva kuna Mwari, uye amuripi mwe patchezvenyu. ²⁰ Ngekuti makatengwa ngemutengo. Hino, ipai mbiri kuna Mwari mu nyama dzenyu.