¹ Wapendwa waumini wezangu, siyo kila mtu anapaswa kuwa mwalimu, mkijua kwamba tutapokea hukumu kubwa zaidi. ² Kwa kuwa wote tunakosea katika njia nyingi. Kama yeyote huwa hajikwai katika maneno yake, huyo ni mtu mkamilifu, aweza kudhibiti mwili wake wote pia. ³ Sasa kama tunaweka lijamu za farasi katika vinywa vyao wanatutii, na tunaweza kuigeuza miili yao yote. ⁴ Tambua pia kwamba meli, ingawa ni kubwa na husukumwa na upepo mkali, inaongozwa kwa usukani mdogo sana kwenda popote anakotaka nahodha. ⁵ Vivyo hivyo, ulimi ni kiungo kidogo cha mwili, lakini hujisifu kwa makuu sana. Fikiria msitu mkubwa unavyoweza kuteketezwa kwa njiti ndogo ya moto! ⁶ Ulimi ni kama moto, ni ulimwengu wa uovu, umewekwa miongoni mwa viungo vya mwili wetu, ambao unaweza kusababisha tusimpendeze Mungu, na ulimi utachomwa moto wa jehanamu. ⁷ Lakin kila aina ya mnyama wa polini, ndege, kitambaacho na kiumbe cha baharini kinadhibitiwa na wanadamu. ⁸ lakini hakuna mwanadamu hata mmoja ambaye anaweza kudhibiti ulimi; ni uovu usiotulia, umejaa sumu ya kufisha. ⁹ Kwa ulimi twamtukuza Bwana na Baba yetu wa mbinguni, na kwa huo twawalaani watu ambao wameumbwa kwa mfano wa Mungu. ¹⁰ Katika kinywa hichohicho husema maneno ya baraka na laana. Ndugu zangu mambo haya hayapaswi kuwa hivi. ¹¹ Je, kisima kimoja huweza kutoa maji matamu na machungu? ¹² Ndugu zangu, Je, mti wa mtini unaweza kuzaa matunda ya mzeituni, au mzabibu unazaa matunda ya mtini? Wala chemchemi ya maji chumvi haitoi maji yasio na chumvi. ¹³ Ni nani miongoni mwenu aliye na hekima na ufahamu? Hebu mtu huyo na aoneshe tabia njema katika kazi zake kwa unyenyekevu utokanao na hekima. ¹⁴ Lakini kama mnao wivu mkali na nia ya ubinafsi mioyoni mwenu, msijivune na kusema uongo kujifanya una hekima. ¹⁵ Hii siyo hekima ile ishukayo kutoka juu, lakini badala yake ni ya kidunia, si ya kutoka kwa Roho mtakatifu, ni ya kipepo. ¹⁶ Kwa kuwa palipo na wivu na ubinafsi upo, kuna vurugu na kila matendo maovu ¹⁷ Lakini hekima itokayo juu, kwanza ni safi, kisha kupenda amani, upole na ukarimu, yenye kujaa rehema na matunda mema, bila kupendelea watu fulani, na kweli. ¹⁸ Na tunda la haki hupandwa katika amani kwa wale ambao wanatenda mambo ya amani.