¹ Nga nomba tungati chani kuno Abrahamu, u tatakulu witu ukulingana na ku muwili, wazanile? ² Amuno Abrahamu wapanzizwe ni milimo, weni wanga wawe nu mulandu wakuyitumvya, ukuwa asa paminso yakwe Leza. ³ Amuno achani chino amawaliko yakulanda? ''Abrahamu wasuwizile Leza, nga chawelengelwa kwe weliwe ngati a wulungamane.'' ⁴ Nomba kwe weni wino akuwomba, chino akulipwa chisiwelengelwa ngati achawila. ukuwa ngati chino wachiwombela. ⁵ Ukuwa kwe weliwe wino asi womba kweni mu malo mwakwe akasuwila mwakwe wenga wino akapanzya wano wasi nu leza, isuwilo lyakwe likawelengelwa ngati awulungamane. ⁶ Davide nawenye akupunda amapepo pakwe munthu kwe wino Leza akapenda uwulungamane nanthi amilimo. ⁷ Weni akati, ''Awapepwe a wawo wano wunthasundwa watetelwa, swinya wano amawembu yakupichilwa. ⁸ Amupepwe umunthu wino Imfumu yitaliwelenjela uluwembu.'' ⁹ Nomba wuzye ukupepwa koo kukawizwa penga pe wawo awa lembwe uwusilamo, pamwi na pe wawonye awa sita wusilamo? Amuno tukuti, ''Isuwilo lyawelenjelwa kwe Abrahamu ngati awulungamane.'' ¹⁰ Wuzye lyawelenjelwa wuliwuli kwe weliwe? Wuzye palinji apa nkholelo pamwi pisinda pa wu silamo? Patali pisinda kweni pankholelo! ¹¹ Abrahamu wapochezile ichimanyikwilo cha wusilamo ngati achisimichilo cha wulungamane wuno walinji nawo mwi suwilo pano wachilinji asa mulembwe uwusilamo. Chio chalondekanga achakuti wamuwike weliwe awe amukwasi wakwe wonsi wano wakusuwila kweni watalembwa uwusilamo, alyakuti uwulungamane wowo wungawelengelwa kwe woliwo. ¹² Weni awili swinya tata wakwe awalembwa uwusilamo wano asa kulembwa uwusilamo wenga kweni wano wakapita swinya mu matamba ya suwilo lino e tata witu Abrahamu wapitanga pano wachili ukulembwa uwusilamo. ¹³ Amuno ilayizyo kwe Abrahamu na ku nkhwatwa yakwe kuno aliwa a mphyani ya munsi yitizile ukupitila mwi sundo kweni ukupitila mu wulungamane wi suwilo. ¹⁴ Amuno ndi wawo wano wakwikala mwi sundo waliwa amphyani, isuwilo nanthi chimwi, swinya ilayizyo a lyavye. ¹⁵ Amuno isundo lukuleta ivya wukali, kweni kuno kusi nanthi alisundo, kusi nanthi kuchilania. ¹⁶ Pa chifukwa choo amwisuwilo, alyakuti ilayizyo lingikala pa nkhumbu nu kuwa chisuwilo kwe wonsi awa nkhwatwa yakwe Anbrahamu -- asa kwe wawo wenga wano wali pansi pi sundo, kweni swinya ku wawo wano ponga mwi suwilo lyakwe Abrahamu, Weni awili we tata wakwe sweswe swensi, ¹⁷ ndivino kuwalisilwe, ''Nene nkhuwisile uwe we tata wa maluko ayavule.'' Abrahamu walinji pa minso pakwe wino wasuwizile, akulikuti, Leza, wino akupa uwumi ku wafwe swinya akwita ivinthu vino visiko viweko. ¹⁸ Mu kuchetekela weni wasuwizile ukususyania ukuchetekela, kuno aliwa e tata wa maluko ayavule, ukuyana na vyo wamunenile, ''Avyo uluko lwako luliwa.'' ¹⁹ Sita kuwa amutonthe mwi suwilo, weni wawisile umuwili wakwe umwenecho ngati wufwile (umulandu walinji ni myaka papipa umwanda uwasongo), nu wufwe wa wula wakwe Sara. ²⁰ Ukuwa umulandu wi layizyo lyakwe Leza, Abrahamu nanthi kuzimba mwi suwilo. mu malo mwakwe, weni wasimphizwe mwi suwilo nu kutumvya Leza. ²¹ Walinji nu kusimichila kuno chino Leza walayizizye, weni alinji nako ukuti angakwanisya. ²² Achaleka choo nachonye ''Chawelengelwa kwe weliwe ngati awulungamane.'' ²³ Ukuwa amazwi ''Chawelengelwa kwe weliwe'' yatawalisilwe kwakwe weni wenga. ²⁴ Yawalisilwe nakwe sweswenye, swinya chiliwelengelwa kwe sweswe wano wasuwila mwe weliwe wino wakatusya Yesu Imfumu yitu ku wafwe. ²⁵ Wee awili wenga wino wapilwe ku kuchilania kwitu swinya wakatusizwe ku kupanzwa kwitu.