¹ Ngapano wuzimachi wuno awa Yuda wali nawo? Swinya muli wuzimachi mu kulembwa? ² Achikulu mu nzira yiliyonsi, Ukutalika mu vyonsi, awa Yuda wasuwizilwe ni wumbuliko ufuma kwe Leza. ³ Amuno chingawa wuli ndi wamwi awa Yuda walinji awasita suwilo? Wuzye uwu nthasuwila wawo wungamazya ukusuwilwa kwakwe Leza? ⁴ Chitakatele chiwe! Mumalo mwakwe, muleke Leza awe chisinkha, napano umunthu aliwensi amufi. Ndivino chawalikwa, ''Ukuti ungaloleswa ukuwa mulungamane mu mazwi yako, swinya ukuti ungachimvya pano wiza mu wupinguzi.'' ⁵ Ukuwa ndi uwu nthalungamana wukulolesya uwu lungamane wakwe Leza, tungati chani? Wuzye tungalanda ukuti Leza asa mulungamane pakwiza nu wukali wakwe pakwe sweswe? (Nkhuwomvya ukususania kwa wanthu.) ⁶ Chitakatele chiwe! Amuno nomba Leza angapingula wuliwuli insi? ⁷ Ukuwa ndi ichisinkha chakwe Leza ukupitila mu wufi wane wukupa ukutumvya ukuvule ukwa weliwe, wuzye muno chani nkhupingulwa ngati ne muwembu? ⁸ Munochani mutanga muti, ndivino wakutuwipila ukufi, swinya ndivino wamwi wakuzumila ukuti tukuti, ''Lekani tuwombe iviwipe, alyakuti uwuzima wungiza''? Ukupingula pakwe woliwo akulungamane. ⁹ Achani nomba? Wuzye tukuyetetela swenga? Awe na katichi. Amuno twapingula kali ponga awa Yuda na wa Griki, wonsi mwe woliwo, ukuwa pansi pa luwembu. ¹⁰ Choo chili ndi vino chawalikwa: ''Pasi nanthi wenga umulungamane, nanthi wenga. ¹¹ Kusi nanthi wenga wino ukwivwichisya. Kusi nanthi wenga wino akuvwambilizya Leza. ¹² Wonsinye wafutatila. Wonsinye ponga wawa awavye nanthi ntchito. Pasi nanthi wumwi wino akuwomba uwuzima, awe, nanthi wenga nye.'' ¹³ ''Iminkholomila yawo a nkhungwe insamvuchile. Indimi zyawo zya wipa uwufi. Insalile zya nzoka zili mumbali ya milomo yawo.'' ¹⁴ Imilomo yawo yizula nu kutipa swinya uwulumila.'' ¹⁵ ''Amatamba yawo yakusamalila ukuzwisya uwazi. ¹⁶ Ukumongolania nu kuyimba vili mu nzila zyawo. ¹⁷ Waa awanthu watamanya inzila ya mutende.'' ¹⁸ Mutawa nanthi akutina kwakwe Leza pankholelo ya minso yawo.'' ¹⁹ Nomba twamanya kuno chilichonsi isundo likuvwanga, chikuvwangwa ku wawo wano wali pansi pi sundo. Choo achakuti umulomo wonsi wungafumpha, swinya insi yonsi yitolelele kwakwe Leza. ²⁰ Choo amulandu kusi umuwili wuno wulilungamana ni milimo yi sundo mu kulola kwakwe. Amuno ukupitila mwi sundo kukwiza ukumanya uluwembu. ²¹ Ukuwa nomba ukufumyako isundo uwulungamane wakwe Leza wamanyikwa. Chawisilwe uwukamboni ni sundo swinya awatumwa, ²² akulikuti, uwulungamane wakwe Leza ukupitila isuwilo mwakwe Yesu Kristu kwe wonsi wawo wano wakusuwila. Amuno pasi nanthi kupusania. ²³ Amuno wonsi wawembuka swinya wapotwa ukufika pa wuchindamane wakwe Leza, ²⁴ swinya walungamikwa pavye mu nkhumbu yakwe ukupitila mu kupusukwa kuno kuli mwakwe Kristu Yesu. ²⁵ Amuno Leza wapa Kristu Yesu ngati akutetelwa ukupitila mwi suwilo mu wazi wakwe. Apile Kristu ngati akusimichizya ipanzyo lyakwe, umulandu wakusulania uluwembu lwa kali ²⁶ mu wutonthe wakwe. Vyonsinye vyoo vyachisilwe ukulanjizya uwulungamane wakwe pa mphindi yoo. Chalinji wowonye alyakuti ayisimichizye wenga mulungamane, swinya ukuti alanjizye ukuti akalungamika aliwensi umulandu wi suwilo mwakwe Yesu. ²⁷ Kulikwinye nomba ukuyikwezya? Nakumwi. Mwisundochi? Mu milimo? Awe, kweni mwi sundo lyi suwilo. ²⁸ Tukumalizya nomba ukuti umunthu akulungamikwa ni suwilo sita imilimo yi sundo. ²⁹ Pamwi wuzye Leza we Leza wawa Yuda watupu? Wuzye asa Leza wakwe na makandinye? Amolimo, na makandinye. ³⁰ Ndi, amolimo, Leza ali wenga, ali lungamika ukuputulwa mwi suwilo, swinya sita kuputulwa ukupitila mwi suwilo. ³¹ Wuze nomba tukumazya isundo ukupitila mwi suwilo? Chitakatele chiwe! Mumalo mwakwe, tukuzumilizania ni sundo.