¹ Nomba kuwumalilo wa Sabata, pano kwatalika ukucha kupipi nu wanda wakutalika pa mulungu, Mariya Magadaleni nu Mariya wunji awiza ukuti walole inkhungwe. ² Lolani, kwalinji ichizumanji ichikulu, amuno umungelo wa Mfumu wika ukufuma kwiyulu, ayiza nu kukunkhulusya ichiliwe, nga ayikala penepo. ³ Imilolechele yakwe yalinji ngati akamesya, ni vizwalo vwakwe iviswepe ngati we susuwe. ⁴ Wakalindilila awazakaza ni nthete nga awawa ngati awanthu awafwe. ⁵ Umungelo avwanza awanachi nga atili kwe woliwo, '''Mutatina, amuno manyile kuno mukuvwamba Yesu, wino wapamanthizilwe. ⁶ Asi paa, kweni akatusile, ndivino wavwanzile. Zanji mulole amasyo pano Imfumu yalazile. ⁷ Yanji zuwa zuwa nukuwanena awasambilizi wakwe, 'Akatusile ukufama ku wafwe. Lolani, ukuwakolela ukuya mu Galileya. Kulyanye mulilola weliwe.' Lolani, nawanena.'' ⁸ Awanachi zuwa zuwa awafuma pa nkhungwe ni nthete swinya ni chimwemwe, nu kusamalila mukunena awasambilizi wakwe. ⁹ Lolani, Yesu asunkhine nawo nukuti, ''Tulamuke!'' Awanachi awiza, awalema amatamba yakwe nu kumufukamila. ¹⁰ Ngapano Yesu atili kwe woliwo, ''Mutakatine. Yanji muwanene awanyina wane ukuti waye ku Galileya. Kulyanye walindola.'' ¹¹ Nomba pano awanachi wapitanga, lolani, wamwi wa wakalindilila wayile mukaya nu kuwanena wasimapepo wakulu vyonsi ivinthu vino vyachitisile. ¹² Pano wa simapepo wasunkhine na wasongo nu kuvwanzania ilyasi na woliwo, awawapa imphiya izivule sana awa vita ¹³ nu kulanda kwe woliwo, ''Muwati kuwanji, 'Awasambilizi wakwe Yesu wizile uwusiku nukwiwa umuwili wakwe pano sweswe te tulazile.' ¹⁴ Ndi ilyasi lyoo lyamuzana e kalolechesya wa chipya, twandi tumupepelezye nu kufumya kweneko ukusakamana kulikonsi kufumeko kwe mwemwe.'' ¹⁵ Achaleka awa vita awasenda imphiya nukuwomba ndivino wasambilizizwe. Ilyasi lyoo alisata pakasi pa wa Yuda swinya likutwalilila nilelo. ¹⁶ Ukuwa awasambilizi wakwe awaya ku Galileya, ku mwamba wuno Yesu walanjizizye woliwo. ¹⁷ Pano wamuweni weliwe, awamufukamira, ukuwa wamwi watasuwizile. ¹⁸ Yesu ayiza kwe woliwo nga avwanga kwe woliwo nu kuti, ''Uwulamuliwo wonsi wapewa kwe nene mwiyulu na munsi. ¹⁹ Achaleka yanji swinya mukapange awasambilizi insi zyonsi. Mubatizye woliwo mwizina lyakwe Tata, lyakwe Mwana, ni lyakwe Muzimu Mwimichile. ²⁰ Muwasambilizya ukwivwila vonsi ivinthu vino nalamulizile mwemwe. Lolani, indi namwe lyonsi, na kumalechelezyo ya nkhulo.''