¹ Nomba pano kwacha, awa simapepo wakulu wonsi na wa songo wa wanthu awivwana ukususya Yesu ukuti wamukome. ² Awamunyepa, awamusenda, nu kumulemeka kwe Pilato e kalolechesya. ³ Ngapano Yudasi, wino walemesile weliwe, waweni ukuti Yesu azanwa nu mulandu, atontholosile nu kunyosya indalama amakumi yatatu ya siliva kwe simapepo mukulu na wa songo, ⁴ nga atili, ''Nawembuka pa kukutilila uwazi wa kayele wuno wusi nu mulandu.'' Kweni watili, ''Achani chocho kwe sweswe? Ulole muno ungawombela.'' ⁵ Ngapano asumba pansi indalama zya siliva mwi tempeli, nga afuma penepo, nu kuya kunzi nga wayinyonga. ⁶ E simapepo mukulu asenda indalama zya siliva nga atili, ''Asa lisundo ukuti tuwike zyoo mu nsawo umulandu achilipwa cha wazi.'' ⁷ Awavwanzania ponga ilyasi, nga awakala ni ndalama ichalo kamata wa nsontha chino wakazichila awalendo. ⁸ Pa mulandu woo ichalonye chocho chitwa, ''Ichalo cha Wazi'' ukufika nilelo. ⁹ Ngapano chocho chino chavwanzilwe nu Yeremiya kasesema chafisilwe, atinji ''Wasenzile amakumi yatatu ya ndalama zya siliva, ichilipwa ichipangwile weliwe na wana wa Izirayeli, ¹⁰ nga awapa chenecho ku chalo cha kamata wa nsontha, ndivino Imfumu yalanjizizye nene.'' ¹¹ Nomba Yesu ayimilila paminso ya kalolechesya, nga e kalolechesya wakolowozizye weliwe, ''Wuzye we Mfumu ya wa Yuda?'' Yesu atolelela weliwe, ''avyo ukulanda.'' ¹² Ukuwa pano wamupa umulandu wa simapepo wakulu na wa songo, atavwanzile nanthi chimwi. ¹³ Ngapano Pilato atili kwe weliwe, ''Wuzye utakwivwa imilandu yino wakupa wewe?'' ¹⁴ Ukuwa weni nanthi kutolelela izwi na lyonganye, alyakuti e kalolela azunguka nkhaninye. ¹⁵ Nomba pa masika yalinji a miwele yakwe bwanamukulu ukusapula uwavingololo wonga uwa kusolwa ni wumba. ¹⁶ Pa mphindi yilyanye walinji nu wavingololo umuwipe nkhaninye witwanga Barabasi. ¹⁷ Achaleka pano wawungine ponga, Pilato atili kwe woliwo, ''Wuzye mukulonda mbasapulile weni? Barabasi, pamwi Yesu wino akakwitwa Kristu?'' ¹⁸ Wamanyilenye kuno wamulemesile Yesu kwe weliwe umulandu wa wuzuwa. ¹⁹ Pano wachilinji wikazile pa chilimba chi panzyo, umuchi atuma izwi kwe weliwe nga atili, ''Utakati uchite nanthi chimwi nu munthu musita mulandu weyo. Amuno ntchuzile sana ilelo umulandu wa chilota chino nalinji nacho ivya weliwe.'' ²⁰ Lelo awa simapepo wakulu na wa songo awa pepelezya iwumba ukuti lilenge Barabasi, nu kuleka Yesu akomwe. ²¹ E bwanamukulu awuzya woliwo, ''Wuzye weweni pa wawili mukulonda mbasapulile mwemwe? Awati, Barabasi.'' ²² Pilato atili kwe woliwo, ''Wuzye ntchite chani nu Yesu wino akakwitwa Kristu?'' Awatolelela wonsinye, ''Mupamanthilani.'' ²³ Ngapano atili, ''Ngafwandi, amulanduchi wuno wachita?'' Ukuwa awapunda umwa kupongomoka, ''Mupamanthilani.'' ²⁴ Achaleka pano Pilato waweni kuno atani achite nanthi chimwi, kweni mu malo mwakwe imphokoto yatalikanga, asenda aminzi, asamba ku makasa pankholelo pi wumba, nga atili, ''Nsi nu mulandu pa wazi wa munthu wee. Nawalechela.'' ²⁵ Awanthu wonsi awati, ''Lekani uwazi wakwe wuwe pakwe sweswe na wana witu.'' ²⁶ Ngapano wasapuzile Barabasi kwakwe woliwo, ukuwa wamuvwapuzile Yesu nu kumulemeka ukuti wamupamanthile. ²⁷ Ngapano awa vita wakwe bwanamukulu awasenda Yesu ukuya ku wukulu wa boma nu kuwunganika awa vita wonsi. ²⁸ Awamuzula nu kumuzwika umwinjilo uwuwenzu. ²⁹ Awaluka ichisote cha myunga nu kumuzwika ku mutwe, awa mulemeka insonzo kwi kasa lya ndilo. Awa sokowala pansi pankholelo pakwe weliwe swinya awamwalangania, watinji, ''Wukali, Imfumu yawa Yuda!'' ³⁰ Awamuswilila, swinya awasenda insonzo nu kumuponkhola pa mutwe wanyosya swinya wanyosya. ³¹ Pano wamwalangania, awasenda umwinjilo ukufuma kwe weliwe nu kumuzwika ivizwalo vyakwe, nga awamukolela ukuya mukumupamanthila. ³² Pano wafumila kunzi, awazana umunthu ukufuma ku Sayirini witwanga Simoni, wino wamupatichizizye ukuti aye na woliwo alyakuti angatwika uwuchingane wakwe. ³³ Awiza pa masyo yano yitwanga Gologota, lino likusula, '''Amasyo ya Mafupa ya ku Mutwe.'' ³⁴ Awamupa ipala ukuti ang'we lino lyasanzinkhine na kaluzya. Ukuwa pano walyelezya, lyakana ukuti angang'wa. ³⁵ Pano wamupamanthila, awankhania ivizwalo vyakwe pawomvya amayele, ³⁶ nga awikala nu kumulola ukuti atakasamale. ³⁷ Papela pa mutwe wakwe awawika ichimanyilo, chatili, ''Wee we Yesu, imfumu yawa Yuda.'' ³⁸ Awa kapoka wawili wapamanthilwe na weliwe, wenga ku ndilo yakwe swinya wenga ku kamani. ³⁹ Wawo wano wapitanga awamutuka, awapuzya imitwe yawo ⁴⁰ nga awatinji, ''Wewe wino walinji mukumongolania i tempheli nu kulizenga amanda amanda yatatu, yipususye wenga! Ndi we mwana wakwe Leza, zanga pansi ukufuma pa wuchingane!'' ⁴¹ Mu nzila yoyonye wa simapepo wakulu awamwalangania, ponga na wakawalika na wasongo, nga watili, ⁴² ''Wapususyanga awanji, kweni atanga ayipususye umwenecho. Amfumu ya Izirayeli. Lekani ayike pa wuchingane, nga apano tuli musuwila. ⁴³ Weni asuwila , lekani Leza amutule nomba, ndi Leza angazumilizya ukuti amusapule. Amuno nawe atili, ''Nene ne Mwana wakwe Leza.'''' ⁴⁴ Munzila yoyonye wakapoka wano wapamanthilwe na weliwe nawonye wamutukanga. ⁴⁵ Nomba ukufuma pi ola lya mutanda infizi ayiza munsi yonsi ukufika i ola lya mufundikambali. ⁴⁶ Papipi ni ola lya mufundikambali, Yesu apunda nizwi kulu nu kuti, ''Eli! Eli! lama sabakitani?'' Chino chikusula, ''Leza wane, Leza wane, ngachani chino wanthaya?'' ⁴⁷ Pano wamwi wano wimilizile palyanye wivwa choo, awati, ''Akwita Eliya.'' ⁴⁸ Paponapapo wumwi uwakwe woliwo asamala nga asenda pamba, atumphika mwipala, amuwika kunsonzo yitete kunsongo, nga apa weliwe ukuti ang'we. ⁴⁹ Awanji mwakwe woliwo awati, ''Mulekani wenga. Zanji tulole ndi Eliya angiza amutule.'' ⁵⁰ Ngapano Yesu apunda swinya nizwi ikulu nga awulechelezya umuzimu wakwe. ⁵¹ Lolani, ichimwenda cha mwi tempeli achilepuka pakasi ukufuma papela ukufika pansi, ninsi ayiyingana, ni mfuzi azilepunkhana. ⁵² Inkhungwe aziyuka, ni miwili ya wanthu awatele wano walazile utulo awakatuswa. ⁵³ Awafuma mu nkhungwe pansizi ya kuzyulupuka kwakwe, awinjila mu musumba uwutele, nu kulolechela ku wavule. ⁵⁴ Nomba pano e kenturiyo na wawo wano walindililanga Yesu awalola ichizumanzi ni vinthu vino vyachitisile, awawa ni nthete nga awati, ''Nakawuzyenye wee alinji we Mwana wakwe Leza.'' ⁵⁵ Awanachi awavule wano wakonsile Yesu ukufuma ku Galileya ukuti wamusunjilile walinji palyanye walolanga nu pawutali. ⁵⁶ Mwakwe woliwo mwalinji Mariya Magadaleni, Mariya unyina wakwe Yakobi nu Yosefe, nu nyina wa wana wakwe Zebediya. ⁵⁷ Pano kwalinji amanguzi, akwiza umunthu umukankhale ukufuma ku Arimatheya, witwanga Yosefe, wino nawenye walinji a musambilizi wakwe Yesu. ⁵⁸ Ayile kwe Pilato nu kulenga umuwili wakwe Yesu. Apano Pilato ⁵⁹ Yosefe asenda umuwili, awuvwimba mu mwenda uwutelepe, ⁶⁰ nu uwulambalika mu nkhungwe yakwe imphya yino imvile muliwe. Ngapano akunkhulusya iwe ikulu pa mulyango wa nkhungwe nu kufuma penepo. ⁶¹ Mariya Magadaleni nu Mariya winji walinji palyanye, wisile wulunga ni nkhungwe. ⁶² Uwanda wakonsilepo, wuno walinji awanda Wakusengania, e simapepo mukulu na wa Farisi wawungine apaliponga nu Pilato. ⁶³ Awati, ''Bwana, twizuka ukuti pano weyo uwawufi alinji amumi, atili, 'Ndi papita amanda yatatu alikatuka swinya.' ⁶⁴ Achaleka patilichizyani kuno inkhungwe yisungwe ichete ukufika pa wanda wa chititatu, amuno awa sambilizi wakwe wangiza nu kumwiwa nu kuti ku wanthu, 'Akatusile ukufuma ku wafwe,' nga uwufi wa kupelelechezya wuliwipa ukulusya uwa kutalika.'' ⁶⁵ Pilato atili kwe woliwo, ''Sendani wakalindilila. Yanji mukiyalile ichete inkhungwe.'' ⁶⁶ Achaleka wayile nu kulindilila inkhungwe, awamatilila iwe nu kuwika penepo e kalindilila.