¹ Ila pano imyaka kumi na yini yasila nanyochezile swinya ku Yerusalemu ne Barabasi asenda nu Tayitasi apita nawe. ² Nayile umulandu uwakuwumbulika nukuwika pa woliwo ilandwe lino kuwizya kuwa makandi nanenezile pambali kwe wano awakulondekwa, ukuti indolechesye ukuti nthasamalanga pamwi nthasamazile vye. ³ Kweni nu Tayitasi nye wino walinji na nene wino wa linji amu Giriki, awamupatichizya ukulembwa uwu silamo. ⁴ Awanyina waufi wizile umwasita kumanyikwa ukuti walolechesye umutende wino twalinji nawo mwe Kristu Yesu. Wakumbwanga ukuti tuwe swe wazya, ⁵ kweni tutawatonthezile nnthi katichi ukuti ukusimichila kwi landwe zima lisyale na mwemwe. ⁶ Ukuwa wano walolekanga ukuti wanankholelo (monsinye muno wawezile visi nanthi chimwi kwenene, e Leza asipusania)- wano, nati, wawanga ngati awakulondwa watatela wonjelezye chimwi kwe nene. ⁷ Umwakupusania, waweni kuno nawasuwilanga ni landwe zima kwe wano waputulwa. ⁸ Pakuti e Leza wino wawombanga mwe Peturo muwupositole kwe wano waputulwa, swinya na kwe nene kuwa makandi. ⁹ Pano yakobi, Kefasi, nu Yohani, wano walinji nimbili ngati awamutunji, ukumanyisisya inkhumbu zino zyapika kwe nene, awapa ikasa lye ndilo ukuwombela ponga e Barabasi na nene. Awazumilizyania ukuti tuye kuwamakandi apano weni waye kuwaputulwe. ¹⁰ Walenzilenye kuno twizuke awapina, chochonye achino navwambanga nkhani ukuwomba. ¹¹ Walile pano Kefasi waya ku Antiyochi, imukanuzya umulandu wawifizye. ¹² Ala pano awanthu wamwi watani wize ukufuma kwe Yakobi, e Kefasi walyanga nawamakandi. Wala pano awathuwa wiza, wizile leka nukufuma kuwa makandi. Watinanga kwe wano wavwambanga ukuputulwa. ¹³ Apo swinya awa YUda wamwi awawa ponga muwufi. Ne Barabasinye wamusovyizye muwufi wawo. ¹⁴ Ala pano nalola imiwele yawo watakonkhanga ichisinkha ichilandwi zima, lalanzile kwe Kefasi pa nkholelo pakwe woliwo, '' Ndi we mu Yuda kweni ukwikala ndivino e makandi musi ngati amu Yuda, nga mungawapatichizya wuli wa makandi ukuti wakwikala ngati awa Yuda?'' ¹⁵ sweswe twakwatwa ukuwa swe wa Yuda tusi swe wamakandi wakachita waluwembu; ¹⁶ ukuno muno tumanyile kuno kusumunthu wino akulungamika ku milimo wi sundo kweni mulisuwila mwa kwe Kristu Yesu. Naswe twasuwila mwe Kristu Yesu ukuti tulungamikwe nulusuwilo mwe Kristu asakuchita ukulonda kwa masundo. ¹⁷ Achaleka fwandi pano tukulonda ukulungamikwa mwe Kristu, naswenye twazanwa kuno swe wawembu, wuzye Kristu amuwomvi wa wawembu? Nakatichi! ¹⁸ Amuno ndi ningazenga swinya ivinthu vino nonona, nazana kuno nkhuchila amasundo. ¹⁹ Amuno ukupitila mu masundo nafwile kumasundo, alyakuti imbe nuwumi kwa kwe Leza. ²⁰ Nemupamnthilwe ne Kristu. Insi nu wumi nenga, ukuwa we kKristu wino ali mwe nene. Uwumi kanonzi wuno indi nawo mumuwili kwikala mulusuwilo mu Mwana wakwe Leza, wuno wankhunda nukuyipa wenga kwe nene. ²¹ Nthakufumyamo inkhumbu yakwe Leza, nanthi ukulungamikwa umulandu namasundo lyo e Kristu wafwile apavye.