¹ Nenji nthakulonda ukuti mwemwe muwe nanthi akumanya, wanawitu, kuno awakwasi witu wonsinye walinji pansi pi wingo swinya wonsinye awapitila pe sumbi. ² Wonsinye awabatizwa mwakwe Mose mwi wingo na mu mwe sumbi, ³ swinya wonsinye walyanga chilichonga ichakulya cha muzimu. ⁴ Wonsinye wang'wanga chilichonga ichakumg'wa cha muzimu. Amuno awang'wa ukufuma kwiwe lino lyawakonkhanga, swinya iwenye lyolyo alinji we Kristu. ⁵ Ukuwa Leza atatemwizwe na wavule mwakwe woliwo, swinya ivitumbu vyawo vyasumbilwe paliponsi mu lupalang'ang'a. ⁶ Nomba ivinthu vyoo vyalinyi avisambilizyo kwe sweswe, lyakuti tutize tukumbwe ivinthu iviwipe ndivino wachitanga. ⁷ Mutakawe mwe watemwa ivikolania, ndivino walinji wamwi mwakwe woliwo. Choo chili ndivino chawalisilwe, ''Awanthu wikazile pansi ukuti walye nu kung'wa, nga awakatuka ukwizya.'' ⁸ Tutakati tuwombe uwuzelele, ndivino awavule mwakwe woliwo wachitilanga. Mu wanda wonga awanthu 23,000 awafwa umulandu wa wuzelele. ⁹ Tutakati swinya tumuwike Kristu ku vyelezyo, ndivino awavule mwakwe woliwo wononosilwe ni nzoka. ¹⁰ Na swinya mutakati mwayilizania, ndivino awavule mwakwe woliwo wachisile nga wononosilwe nu mungelo wa mfwa. ¹¹ Lelo ivinthunye vyovyo vyachisilwe kwe woliwo ngati a chisambilizyo kwe sweswe. Vyawalisilwe muno ichisambilizyo chitu--muno sweswe pakwe wano insilo ya nkhulo yifichilizile. ¹² Achaleka lekani aliwensi wino akwelengania ukuti ayimilizile awe minso ukuti atakapone pansi. ¹³ Pasi nanthi achelezyo chino chingawatalila chino chisi ku wanthu wonsi. Mu malo mwakwe, Leza a musuwilwe. Atalitela aleke mwemwe mwelezwe ukuchila amaka yinu. Pa chelezyo chonsi Leza alipa mwemwe inzila yakusamalila, alyakuti mungakwanisya ukujimba. ¹⁴ Achaleka, mwe wakundwe wane, fumaniko ku kupepa amakolania. ¹⁵ Nkhuvwanga kwe mwemwe ngati a kuwanthu wano wali nukwivwichisya, achaleka mungapingula chino nkhulanda. ¹⁶ U lupindi lwa mapepo luno tukupepa, wuzye asa kugawana mu wazi wakwe Kristu? U mukate wuno tukumonthola, wuzye asa kugawana mu muwili wakwe Kristu? ¹⁷ Umulandu pali umukate wonga, sweswe wano swe wavule swe muwili wonga. Swensi ponga tukulya umukate apaliponga. ¹⁸ Mulolechesye pa wanthu wa Izirayeli. Wuzye asa wawo wano wakalya inzuwi ponga na wano pi pembo? ¹⁹ Wuzye nkhuti chani nomba? Kuno ikolania a chimwi? Pamwi ichakulya cha nzuwi kwi kolania achimwi? ²⁰ Lelo nkhuvwanga ivya vinthu Amakandi wa nthasuwila wa zuwila, kuno wakupa ivinthu vyoo ku ma demoni asa kuli Leza. Nene nthakulonda ukuti muwe ponga na mademoni! ²¹ Mutanga mung'we ulupindi lwa Mfumu nu lupindi lwa ma demoni. Mutanga muwe pa chakulya cha Mfumu ponga na pa chakulya cha ma demoni. ²² Pamwi tukulonda tutalisye uwuzuwa wa Mfumu? Wuzye tuli na maka ukulusya Weni? ²³ ''Vilivyonsi vikazumilizwa,'' lelo asa vyonsi vikulondekwa. ''Vilivyonsi vikazumilizwa,'' Lelo asa vilivyonsi vikazenga awanthu. ²⁴ Nanthi wumwi avwambe ivizima vyakwe umwenecho. Mu malo mwakwe, aliwensi avwambe ivizima ku wapalamani wakwe. ²⁵ Mwemwe mungalya chilichonsi chino chikukazwa, nanthi kuwuzichisya mu mwenzo. ²⁶ Amuno ''Insi aya Mfumu, swinya nu wukulu wansi wonsi.'' ²⁷ Ndi e nthasuwila wakwita ku chkulya, nga wewe ukulonda ukuti uye, lyanga chilichonsi chino chili pankholelo yako nanthi kuwuzichisya amawuzyo mu mwenzo. ²⁸ Ukuwa ndi wumwi akuti kwe wewe, ''Choo chipilwe ngati anzuwi,'' Utakati ulye chenecho, pa mulandu wa weyo wino wakunena, swinya nu mulandu wa mu mwenzo wako-- ²⁹ mu mwenzo wa munthu wunji weyo, acho nkhusula, asa uwako. Amuno amulandu chani ukusapulwa kwane ku ngapingulwa ni vya mu mwenzo wa wunji umunthu? ³⁰ Ndi nkhulya ichakulya ni salifyo, wuzye achani nkhutukwa muno chino nsalifizye? ³¹ Achaleka, ndi mukulya pamwi mukung'wa, pamwi chilichonsi chino mukuwomba, muwombe ku wuchindame wakwe Leza. ³² Mutakati mupe umulandu ku wa Yuda, pamwi awa Griki, pamwi ku chiwanza chakwe Leza. ³³ Nene nkhakwelezya ukusechelezya awanthu wonsi mu vinthu vyonsi. Nene nthakuvwamba ivizima kwe nene nenga, ukuwa ivya wavule. Nkhuwomba choo alyakuti wangapusukwa.