¹ Muwe awa kuluka nene, ndivino nenji ne kaluka wa Kristu. ² Nomba nenji nkhutumvya mwemwe umulandu mukanjizuka mu vilivyonsi. Nkuwatumvya umulandu mulemansizye umwambo ndivino napile woliwo kwe mwemwe. ³ Nomba nkhulonda mwivwichisye ukuti Kristu a mutwe wa munthu wensi, kuno umonsi a mutwe wakwe mwanachi, swinya kuno Leza a mutwe wakwe Kristu. ⁴ Aliwensi umonsi wino ukupepa pamwi akunenela nu mutwe wakwe awuvwimbe asichindika umutwe wakwe. ⁵ Ukuwa aliwensi umwanachi wino akupepa pamwi akunenela nu mutwe wakwe nanthi kuvimba asichindika umutwe wakwe. ⁶ Amuno achilichonga ndi umutwe wakwe awupele. Amuno ndi umwanachi asakuvimba umutwe wakwe, afwile apele inyele zifupile. Ndi acha nsoni ukuti umwanachi ukuti apele inyele zakwe pamwi awe nu lupala, muleke avimbe umutwe wakwe. ⁷ Amuno umonsi atatele awe nu mutwe wakwe uwuvimbe, amuno weni a chikolanio nu wuchindame wakwe Leza. Kweni umwanachi awuchindame wa monsi. ⁸ Amuno umonsi atelewuzile ukufuma ku mwanachi. Mu malo mwakwe, Umwanachi apanzilwe ukufuma ku monsi. ⁹ Amuno pasi umonsi alewuzwile ukuwa wa mwanachi. Mumalo mwakwe, umwanachi alewuzwile ukuwa uwa monsi. ¹⁰ Achino fwandi umwanachi afwile awe ni chimanyisyo cha nsambu pa mutwe wakwe, pa mulandu wa wangelo ¹¹ Naponye, mwakwe Mfumu, umwanachi atanga ayimilile pe wenga ukufuma ku monsi, nu monsinye atanga ayimilile pe wenga ukufumwa ku mwanachi. ¹² Amuno ndi vino umwanachi akufuma ku monsi, acho nu monsinye akufuma ku mwanachi. Swinya ivinthu vyonsi vikufuma kwe Leza. ¹³ Uyipingule wemwenecho: Chilichete ukuti umwanachi apepe kwe Leza nu mutwe wakwe nanthi kuvimba? ¹⁴ Wuzye ni chilengwanye ichenecho chisi sambilizya mwemwe kuno ndi umonsi ali ni nyele inthali, ach nsoni kwe weliwe? ¹⁵ Wuzye ni chilengwanye chisi sambilizya mwemwe kuno ndi umwanachi ali ni nyele inthali, awuchindame wakwe? Amuno inyele zyakwe zyapwa kwe weliwe ngati achakuvwimba. ¹⁶ Kweni ndi wumwi akulonda ukukana ivya choo, tutawa nanthi achakusambilila chinji, nanthi aviwanza vyakwe Leza. ¹⁷ Ukuwa mukukonkha amasundo, nenji nthakukutumvya. Amuno pano mwiza apaliponga, asakuti chiwe chizima kweni chiwe chiwipe. ¹⁸ Amuno pakutalichila, nenji inkhwivwa kuno pano mwiza apaliponga muchiwanza, pali ukhwankhana pakasi pakwe mwemwe, swinya katichi nkhusuwila. ¹⁹ Amuno pafwile swinya pawe imbali zyakulekana pakasi pinu, alyakuti wawo wano wazumilizwa wangamanyikwa pakasi pinu. ²⁰ Amuno pano mwiza apaliponga, asa chakulya cha manguzi icha Mfumu chino mukulya. ²¹ Pano mukulya, aliwensi akulya ichakulya chakwe pano awanji wachili ukulya ichakulya chawo. Wenga ali ninzala, swinya wunji awa mukolwe. ²² Wuzye mutili ni ng'anda izyakuti mulyele nu kung'wa mwenemo? Wuzye mutwimvya ichiwanza chakwe Leza nu kusozya insoni wawo wana wasi nanthi chimwi? Wuzye ningati chani kwe mwemwe? Wuzye imbatumvye? Nenji nthalitumvya mwemwe muno choo! ²³ Amuno napochezile ukufuma ku Mfumu chino nenji naninye navipululizya kwe mwemwe. kuno i Mfumu Yesu, pa wusiku wuno walemesilwe, wasenzile umukate. ²⁴ Lyo weni asalifya, amonthola nu kuti, ''Woo a muwili wane, wuno awa mwemwe. Muwachita choo pakwizuka nene.'' ²⁵ Munzila yiliyonganye weni wasenzile ulupindi lyo walya, swinya weni atili, ''Ulupindi loo achilayano ichipya mu wazi wane. Muwachita choo imphindi zyonsi pano mwemwe mukung'wa chenecho, ukuti munjizuke nene. ²⁶ Amuno imphindi zyonsi pano mukulya umukate woo nu kung'wa ulupindi loo, mukuwizya imfwa ya Mfumu ukufika weni ayize. ²⁷ Achaleka, wensiwino, akulya umukate pamwi ukung'wa ulupindi lwa Mfumu mu musamu ali yononela umuwili swinya uwazi wakwe Mfumu. ²⁸ Lekani umunthu ayiyezye wenga pakutalichila, nga munzila yoyonye lekani alye ku mukate swinya ang'we ku lupindi. ²⁹ Amuno weni wino akulya nu kung'wa sita kwivwichisya umuwili akulya nu kung'wa kukuyipanzya wenga. ³⁰ Achilichino awavule mwakwe mwemwe awafoke swinya awalwale, swinya wanji mwakwe mwemwe walazile utulo. ³¹ Ukuwa ndi twayiyezya swenga, tutalipanzwa. ³² Kweni pano twapanzwa ni Mfumu, tukayichindika, alyakuti tutakasulwe ponga ninsi. ³³ Achaleka, wanawitu, pano mwiza ponga mukulya, muwalindililana. ³⁴ Ndi wumwi ali ninzala, muleke alye ku ng'anda, alyakuti pano mwiza ponga litize liwe alipanzyo. Swinya pa vinji ivinthu mwawalika, ndiwalanganizya pano niza.