¹ Gaa ɓuruk gya gyo ɗaŋ cigha ghǝmmbǝli ɗaŋ monsǝ tǝ yel gyal mǝn dǝn wasǝŋ tǝǝ kǝǝm ɓuruk tǝ luushi. Taa fi gin nǝ durghǝ tu sǝm Cogn tǝ giɗkǝn tǝ naai nǝ ngǝtnngǝ kemaskǝn hŋ. ² Monsǝ yo ɗaŋ tǝǝ yir mǝn dǝn mǝn caaghǝn raa tǝǝ kemas shi hŋ duryo tu cinǝ yestǝ. A bamvi gi, tǝ fishi laa mǝn nyaŋ nyaŋ. Duryo tu mǝn dǝn gya gyo ɗaŋ caa cigha laa wasǝŋ cinǝ mǝn laaɓkǝn mǝn suughǝn beɗ. Kuuɓarǝn a kon ngǝrshi gya gin. ³ Kǝn ya naa tu gon caa giɗ ngǝrshi gon mari ɗaŋ a kaɓ sǝǝɗkǝn vi wopm gyo ɗaŋ taa caa vwa woshi hŋ, yan nǝ vi Daadǝn wopm Yesu ɗaŋ nǝ Ɓorghǝnni. Gaatǝ tu tǝǝ kaɓ giɗkǝn ɗaŋ caa tlǝǝr nǝ kǝ laaɓkǝn Cogn hŋ. ⁴ Dashi gi citǝ mbitǝ gaam a yisǝŋngǝn hŋ. A bamvi gi, mbǝrǝghǝn kaar tǝ ɗakkǝn a dulgam vi cini ɗaŋ gonngǝn ɓastǝ. konngǝn gya gin caa lǝǝr kashi tǝ shisherghǝn raa, tǝ vyaarghǝn tǝ tlyaaghǝn raa kǝ kuushi, tǝ ⁵ wutlǝŋngǝn mel mel a dlei zarsǝ mǝn raa ɓuutli. Taa gyaai a jom jomni. Caa ɓital ɗaŋ tu laaɓkǝn nǝ tǝpm tuughǝn. ⁶ Ɗaŋngǝni laaɓkǝn tǝ dlǝǝrghǝn a ngǝtn yo ɗaŋ mǝ yir nǝ dǝllǝk tughǝn. ⁷ Duryo tu mǝǝ man ɗǝgn tǝ ngǝtn hŋ. Maa ɗya mǝ nywal tǝ ngǝtn won hŋ. ⁸ A bamvi gi, mǝǝ dlǝǝr a ngǝtnngǝ cighǝn tǝ lǝŋsǝ. ⁹ Gya gyo ɗaŋ caa suu tǝǝ naai nǝ mǝn tughǝn caa ndai a ɗiiɓkǝn, a giɓlapm. Caa ndaaɗ a giɓ dǝghǝrsǝ tǝ kusǝŋsǝ ngǝtn ɗaŋ caa lǝǝr vuughǝn ɗi kǝ ngǝtnngǝ mbighǝn raa monda, tǝ giɓ ko nii mari ɗaŋ caa ndalar zarsǝ a giɓ malarghǝn tǝ datsǝghǝn. ¹⁰ Duryo tu suughǝn wurɓa ghuŋ cinǝ daɗighǝ ko kuskǝ ngǝrshi gyo. Zarsǝ a caaghǝn raa tǝ ndǝr tǝ ŋal gamawasǝŋ raa jii mǝnɗi. ¹¹ Beɗ tǝ gi kyan, zaarghǝ Cogn, ɓǝǝlghǝ tǝ ngǝrshi gya gin. Ŋal mbuni tǝ kaaɓkǝn Cogn, tǝ suughǝn, tǝ dluughǝn vwaa.. tǝ mbutarghǝn gaam. ¹² Fi manndǝ mbuni kǝ caaghǝn raa. Ngaɓ raai kǝ mbyeɗi gi ɗaŋ tǝǝ taa cimngǝ ghayi. A ta yi ni a dulgam gin ghuŋ kǝ ta tlya zha a kenngǝ mbuni. ¹³ Mya kon gin a ken Cogn, gyo ɗaŋ ca caa ɗeɓaɗ ngǝtn caa sǝǝ, tǝ ken Yesu ɗaŋ nǝ Ɓorghǝnni, gyo ɗaŋ a ta kon ngǝtn yo ɗaŋ yi jom jomi a Bilatu Babunte. ¹⁴ Laaɓ mborki ɗa giiri, tǝ caaghǝn vii hŋ, hal she Daadǝn wopm Yesu ɗaŋ nǝ Ɓorghǝnni ya mbwaaɗi. ¹⁵ Cogn wo giɗ mbwaaghǝn wos ɗi a kili yo ɗaŋ a ndara Cogn murghǝ shiɗshiɗi, yan ngǝn nǝ murghǝ vartǝi, Guŋ yo ɗaŋ ca fi guŋndu, Daadǝn murghǝ guŋndǝ. ¹⁶ Yan ngǝtn wos ɗaŋ ca mǝs hŋǝi, murghǝ tsǝtnngǝ a lǝǝɓ yaali yo ɗaŋ gon caa ɗiighai hŋ. Gon ca yeltǝ hŋ ko tǝ ɗyaa tǝ yeltǝ ɗi paraɗ. Luughǝ nǝ gos tǝ vartǝ nǝ kǝ ndok ndoki. Tǝ naa cik ¹⁷ Fuu mǝn tughǝn ɗǝghǝn tǝǝ ɗuu gǝǝɓ hŋ, tǝǝ ndǝr tǝ gaa raagha tughǝn hŋ, gya gyo ɗaŋ kǝrǝŋ kǝrǝŋ hŋ. ¹⁸ A bamvi gi, tǝǝ gaa raagha Cogn. Caa vǝrmi ɓuruk tughǝn kǝ jom jomni mǝ wum wusni wos. Fuushi tǝǝ fi mbuni, tǝ naa nǝ mǝn vǝrghǝn tǝ suughǝn tǝ ɓǝǝl. ¹⁹ A tǝpi gi, taa ga nǝ durghǝ gamawasǝŋ daɗi mbuni kǝ ngǝtn yo ɗaŋ wo man, duryo tu tǝǝ ngaɓ ɓwaaghǝn raai. ²⁰ Timoti, yaal ɗa nǝ ngǝtn yo ɗaŋ tǝ vǝrghǝ. Ɓǝǝlghǝ tǝ vi ɗǝghǝr tǝ konngǝn vi yo ɗaŋ yer wasǝŋ maan namboŋ hŋ kǝ mbyerni yo ɗaŋ caa cimtǝ tu yisǝŋngǝtn. ²¹ Zarsǝ gya gon caa kon ngǝrshi gya gin durghǝ gi taa gaa caaghǝn raai. Gaa gyal tǝ naa tǝ kyan.