¹ Caa yi mǝn var hŋ. A bamvi gi, sǝǝɗ tǝ vii ɗaŋ tu a taa yinǝ daa. Sǝǝɗ vi tlǝɓǝrtǝ ɗaŋ tu tǝǝ taa yi nǝ yestǝ. ² Sǝǝɗ vi guɗ varaŋshi ɗaŋ naktǝ, tǝ mǝri guɗi ɗaŋ watsaktǝ, tǝ ɓuruk ndzǝkkǝni. ³ Luu guɗi yo ɗaŋ gya tuur wasǝŋ taa mǝǝshi, ɓwaaghǝn guɗi gya gyo ɗaŋ gya tuur wasǝŋ taa mǝǝshi. ⁴ Beɗ tǝ gi kǝn yan gǝɗ yo ɗaŋ turwos a mǝshi ko gya jiɗ, gaashi tǝǝ kuuɓ giɗkǝn luughǝn a giɓ dǝn wasǝŋ keni. Gaa shi tǝǝ fi gya mǝn ɓwaaghǝn wasǝŋ mǝn ɗaŋ gyo ɗaŋ tǝ fishii mǝn, duryo tu caa pol Cogn ghai a gin. ⁵ Beɗ tǝ gi ɓwaaghǝn gǝɗ yo ɗaŋ turwos a mǝshi taa gaa tǝ ɓuruk ngǝtn wos. Caa caaraa fyeɗi wos a Cogn. Ko dzaŋnyi gyo caa mbǝrtǝ a ceɗkǝn tǝ karaghǝn Cogn beɗ kaviɗ tǝ dzaŋ. ⁶ Beɗ tǝ gi, gǝɗ yo ɗaŋ caa suu tsǝtnngǝn wumngǝn wusni cinǝ mǝskǝn.. ko ɗaŋ tu ɗyaghas tǝ gwaam. ⁷ Kon ngǝrshi gya gin duryo tu taa naa nǝ mǝn maalggǝn hŋ. ⁸ Beɗ tǝ gi kǝn gon won ya jwaam nǝ zarsǝ wo hŋ, ɓannɗǝŋ gya gyo ɗaŋ cinǝ mǝn giɓdǝn wos hŋ, a nyaŋngas caaghǝn raa, a kuus moɓ muryo ɗaŋ cigha laaɓkǝn hŋ. ⁹ Gaa tǝǝ kon gǝɗ nǝ gyo ɗaŋ turwos a mǝshi guo ɗaŋ a ɗaɗ a voni tashi lim hŋ, gǝɗ kǝ tuur namboŋ. ¹⁰ A naa ciɓ tǝǝ yisǝŋ ti tǝ fighǝn mbuni, ko nǝ gyo ɗaŋ caa yaal ɗa nǝ mǝri, ko nǝ gyo ɗaŋ caabkaɓ sǝmmbǝrsǝ, ko nǝ gyo ɗaŋ caa coɓ yaasǝŋ mǝn laaɓkǝn mǝn, ko nǝ gyo ɗaŋ caa som mǝn buŋngǝn ɗa ko nǝ gyo ɗaŋ caa mbǝrtǝ a fighǝn ko laa mbuni gyo. ¹¹ Beɗ tǝ gi a dulgam mǝri guɗi ɗaŋ gya turwasǝŋ taa mǝǝshi ɗaŋbtaa dwatsǝ hŋ kwaanǝn shighai ɗa giɓi hŋ. Duryo tu kili yo ɗaŋ caa nda gha ngǝtn mbiighǝn raa kǝ dlii ɗaŋ caa gaa gǝǝɓ tǝ Ɓorghǝn kǝ Cogn, taa suu tǝ kaaɓ tuuri. ¹² A tǝpi gin caa yisǝŋ maalghǝn wasǝŋǝi duryo tu taa tsal mbighǝn a raa wasǝŋ kǝ keni. ¹³ Raaghǝ shaaɓ a ndashi a dlii. Caa tlǝ tǝ yi ngyelaŋ dǝn dǝn. Nǝ shaaɓ ngǝnwos kǝn caa fi hŋ, beɗ tǝ gi taa ndǝr tǝǝ naai nǝ mǝn gǝskǝ vii tǝ mǝn lǝǝghǝn lǝǝɓ. Caa kon ngǝtn yo ɗaŋ a ndara tǝǝ kon hŋ. ¹⁴ Nǝ durghǝ gi mya suu mǝri guɗi tǝǝ kaɓ tuuri, tǝǝ ɓwaa mǝri, tǝ paŋ dǝn, duryo tu tǝ vǝr Shetan dǝǝl caaghǝn wopm nǝ fighǝn kuskǝ ngǝtn hŋ. ¹⁵ Duryo tu ɓanndǝŋ gya gon taa sushi washi a Shetan. ¹⁶ Ken gǝɗwon ɗaŋ a caa raai yir guɗi gya gyo, ɗaŋ gya tuur wasǝŋ taa mǝǝshi, gaa tǝ somshiɗa, duryo tu tǝǝ laaɓ vin ladi gyaŋ hŋ, duryo tu wo som ɓwaaghǝn guɗi gya gi ɗaŋ turwasǝŋ taa mǝǝshi ɗa. ¹⁷ Zarsǝ varaŋshi gya gyo ɗaŋ caa fi guŋndu ndarara taa luushi hal tǝpm mbǝtlǝm, ɓanndǝŋ gya gyo ɗaŋ caa fi laa tǝ gǝgn tǝ zhiɗkǝn hŋ. ¹⁸ Duryo tu vi Cogn wultu, ''Yan ngogn gaal cigha daɓtsǝghǝn waa, caatǝ zuŋtuŋ mǝn hŋ.'' tǝ ''Murghǝ laa a kǝǝm tǝǝ vǝrtǝ bamvi wos.'' ¹⁹ Kaɓ caaghǝn vi dulgam zaarghǝ var hŋ she yan mǝn tlyaghǝn zha caa fi mbǝtlǝm ko maayi. ²⁰ Ndǝr mǝn kusǝŋsǝ ngǝtn a ken ko nuu duryo tu ɓances tǝǝ ci vǝrtǝ. ²¹ Mya fuughǝ naa jom jomni a ken Cogn tǝ ken Yesu ɗaŋ nǝ Ɓorghǝnni tǝ gya zhipti mǝn shinngǝn wasǝŋ ɗaŋ tǝǝ bwaashi, tu a gaa konngǝn gya gin tǝ nyaŋngaskǝn hŋ, a fi suughǝn gaam hŋ. ²² Fi motl motli nyomngǝn taas gon hŋ. A nga usǝŋsǝ ngǝtn gon hŋ. Gaa gama tǝ ndzǝkkǝnni. ²³ A man tlya zhaŋngali ɗa hŋ. A bamvi gi, tlya zhak darndu dǝn njwatn nǝ durghǝ vwa tǝ durghǝ gonngǝn wa mel mel. ²⁴ Kuskǝ ngǝtn zarsǝ gya gon yigha dadǝǝl, taa ndashi ken a tlǝghǝn nǝ ɗǝǝlghǝn vi. Beɗ tǝ gi kusǝŋsǝ ngǝtn gya gon caa laaɓ ɗa kaari. ²⁵ Cikkǝn, laa mbunighǝ gya gon nǝ yisǝŋngǝn a dadǝǝl, beɗ tǝ gi gyaa gon wasǝŋ caa waaɗ hŋ.