nbtt-oks_mat_text

Ẹpan 5

¹ Ọgbọna Ijisọs gbọọ akpẹ abẹ na a kpọ yọ ọrẹ osi. Ọgbọna a ma na, yọ e égbenurun mẹka ṣa tọ ẹ. ² E jin yọ owo e te ba, a gẹ ka, ³ Okurubile a wa nọ ẹnanẹ eme su ẹfunwẹnfunwẹn na ka bọ ẹkẹrẹ a wọ Osibina ẹṣẹn. ⁴ Okurubile a wa nọ ẹnanẹ e yi na, ka be ke fun bi be. ⁵ Okurubile a wa nọ ẹnanẹ eme guwe na, a bẹ e ke jọ ẹrọ ẹkẹrẹ. ⁶ Okurubile a wa nọ ẹnanẹ awọn a sẹ aka ebi ọkọrẹ a sẹ a nọ ọṣẹrẹ iwu na, be ke fe ba. ⁷ Okurubile a wa nọ eyiro ka kabẹ a ka gbọ eyi. ⁸ Okurubile a wa nọ ẹnanẹ bọ uloko wọn na, abẹa ka gbọ Osibina. ⁹ Okurubile a wa nọ ẹnanẹ e guru ẹga na, abẹ be ke ki yọọ Osibina eègben. ¹⁰ Okurubile a wa nọ ẹnanẹ be ke kurujanyẹn ubaka na bẹ ẹka awọ Osibina ẹṣẹn. ¹¹ "Okurubile a wa nẹ wọ ọgbọna ero e wuna wọ ije bi din na fọ ekurujanyẹn je wu aka bibdina kẹ ga ẹga idudu ẹlẹla isoma ki to wu nẹ mọ. ¹² Nẹ kẹ bẹn ni din na fọ ẹ kẹ kpo, ubaka wọ ẹkẹrẹ gbodi Osibina ẹṣẹn. Ọrẹ ọnẹ ayẹ erokoro we kuruje ẹṣẹro abẹ ayẹn urun. ¹³ "Anọ a wọọ ẹrọ ọnẹ oòbu. Ama oobu aye, a nẹ yọ ọrọnrọn fuwa, gana be ke siye siyẹn ka epila rọ ma? Eme pila rọn mọ uro nọ ojije eme fura ka bi guma ẹ fura bẹ fọọ ọṣẹn kẹ dẹn ya. ¹⁴ Anọ a wọ ọsọ nẹ ẹrọ. Iken nẹnẹ wọọ́ ọrẹ osi na e din na bẹbẹ. ¹⁵ Be di ne pi ọsọ bi de wọ ugi ibe, ama da ka bi ya ka, gba ayẹn nọ ero fẹnyan nẹnẹ wọ ubowo ayẹ na. ¹⁶ Tebi wọ ọsọ a kẹ ba ero ayẹn nẹnẹ e gbe ka ka be aka kẹ gba oboro nẹnọ we siye na bi ya fọọ ugbugbodi kẹ nẹ nẹ Ẹdẹda nẹnẹ wọ apan na. ¹⁷ ''Ni me roro ka ẹ ṣa bọ ububuru sa ẹsẹro ẹka fuwa. I na ṣa ka ibe ba, ama ẹ ṣa sa ifiye ẹ. ¹⁸ Ikuwa ẹ ga nẹ nọ ka eme fura ka ososi aka ije ṣun yọ, tete yi ten e ke tiye fura ububuru, emé fura ka ẹpẹn fẹnyan fẹnyan wọ ọṣẹrẹ na. ¹⁹ Ọnẹbẹ uùba ẹfẹna fẹna a fọ ayẹn wan ọnẹ kere fọrẹ ububuru ẹnanẹ na aka edine te ero obuba akọ e si ye siyẹ na ayẹ aka wọ ẹfẹna wọ urun ro Osibina ẹṣẹn. Ama ẹfẹnẹ fẹna e siyọ utun e di ne ki te ba ayẹ be ke ye ka e gbodi Osibina ẹẹsẹn. ²⁰ Amẹ ẹ ga nẹ nọ ka eme fura ka i nọ ọṣẹrẹ fọrẹ Isikraib aka Ẹfarisiro ẹka, eme su ọgba nẹbu di na fọ mọ Osibina ẹẹṣẹn na. ²¹ '' Ọ wọ akọ bi si ya gẹ esuba ka, 'Uma wan nọ oro aka, Ẹfẹna fẹna a wan nọ oro na, eke wọ ayẹn nọ ọrọnrọna nẹnẹ wọ ẹkarẹ ọṣẹnṣẹn na. ²² Ama ẹ ga nẹnọ ka ẹfẹnẹfẹna a ka kaniwu to yọ ọda na, 'ka yẹ e ke wọ ayẹn nọ ọrọnrọna nẹnẹ eke wọ ẹkarẹ oṣẹṣẹn na; aka ẹfẹnẹfẹna a ga nọ yọ ọda, Awọ orokoro gbogba ọnẹ!' ka yẹ e ke wọ ayẹn nọ ọrọnrọna nẹnẹ eke wọ ọpa eka na; ẹfẹnafẹna aka ga ka 'Awọ abẹyẹ ọnẹ e ke wọ ayẹn nọ ọrọnrọna nẹnẹ wa ẹra ibe ẹka na. ²³ Uùba, wa fọ ọwa kẹ nọ Osibina iyọ akpa u mi wọ ẹfẹnẹbẹ yẹn ka anọ aka wọ ọda ama. ²⁴ Tebi wọ ọwa wọ iyọ akpa ẹrẹn, ọ yọ wọ ọrẹ. Oṣoro guru aka wọ ọda, ṡana u pila ṣa fo wọ ọwa nọ Osibina. ²⁵ Guru aka wọ ebero kiyakiya ọgbọna ne bike kẹ yọ ẹkarẹ ubo na, sa wọ ebero a fọ wọ a dọn mọ ọṣẹnẹkarẹ uba, aka ọṣẹnẹkarẹ ayẹ a fọ wọ e wọọ́ ẹnwan. ²⁶ Ikuwa ẹ ga nẹ wọ, we ke di we ṣa ẹfẹnẹbẹ eme fura ka u duna ikiba fẹnyan fẹnyan nẹnẹ uje na. ²⁷ '' Nẹ wọ ka bẹ gẹ ka, ume buwe ọtẹtanuba.' ²⁸ Ama ẹ gá ẹ nọ ka ẹfẹnẹfẹna a fọ ayẹn balẹ iyarọ amabuwe ọre na ayẹ tọmẹ a siye buwe ọtẹtanuba iyọ uloko. ²⁹ Ada ka wọ ayẹn ojijen ayẹ aka fọ wọ falẹ polẹ ha ve ṣa ọ nẹ ya fuwa. Aka rọn nẹ wọ ka ẹfa ọyẹrẹ iwo iwu e fu be fuwa fọrẹ ka bẹ nẹ wọ iwu fẹnyan fẹnyan wọ ẹra. ³⁰ Ada ka wọ uba ojijen oya aka wọ rẹ wọ falẹ, ṣẹn ya ọ nẹ ya fuwa. Aka rọn nẹ wọ ka ẹfa ọyẹrẹ iwo iwu e fu be fuwa fọrẹ ka bẹ nẹ wọ iwu fẹnyan fẹnyan wọ ẹra. ³¹ Bi din na gẹ ka, 'Ẹfẹnẹfẹna e gu yọ oworo furọ ubobna, tebi oro ayẹ a fọ ẹwọrẹ oyuru wọ ije nẹ ya.' ³² Ama ẹ ga nẹ nọ ka ẹfẹnẹfẹna e yuru yọ oworo na, eme fura ka a wa ka e siye amabuwe gbagba, sẹ ya ṣina nọ ọtẹtanuba. ³³ ''Bila mọ, nẹ wọ ka be gẹ yọ eésubu ka, uma ba ọpẹn isoma ẹka, ama nẹ fọ nọ ọpẹn je ne tọọ idu. ³⁴ Ama ẹ ga nẹ nọ ni me si bọọ ọpẹn otuntun sa nẹ fọ ososi bọọ ọpẹn ubaka ayẹ awa Osibina; eme di na wọ ẹrọ ọnẹ, ka aya a wa yọ ọ fọ ọṣẹn yẹrẹ; ³⁵ eme di na wọ Ijerusalem, ka ayọ wọ iken nọ ọkẹka nọ obin nẹnẹ fọrẹ ẹka. ³⁶ Eme dina wa ka ọ fọ ẹpan bọ ọpẹn ka we di na sẹ ẹpẹn nọ ọyẹrẹ i wọ ẹpan ṣin nọ okukuru sa oririn. ³⁷ Ama tebi ya ka wọ ẹga ewo ẹka a wa ka 'En, en,' sa 'Ehe, ehe'. Ọnẹ na oduduro ọrẹ e we ve ṣa. ³⁸ ''Nẹ wọ akọ bi si ye gẹ na ka, 'ayẹn nọ ayẹn aka irun nọ irun'. ³⁹ Ẹ ga nẹ wọ, u me mune nọ ẹfẹna e siye yọ odudu na. Ọnẹbẹ urun, ẹfẹnẹfẹna e kuru wu ẹbayẹn aṣiṣin ojinjen na, bi lọọ ọọboro nẹ ya. ⁴⁰ Ẹfẹnẹfẹna é éke roro ka ayẹ ṣe nẹ ẹwọra nẹ wọ ẹkarẹ ubo na, edi ne ni ka ayẹ na wọ alẹgbẹ yọọ́na, tebi wọ ewuru nẹ yọ bile amọ. ⁴¹ Ẹfẹnẹfẹna afọ iwogbigben wuna wọ jinjen nọ emali ọyẹṛ na, yẹrẹ ya yọ emali ẹbọrẹ. ⁴² Fa nọ ẹfẹnẹfẹna ẹ ṣin iwọ uba na, ume di ne bila urun nọ ẹfẹna eni ka ayẹ bọwọ iwọ uba na. ⁴³ ''Ọwọọ́ ka bi si ya kọ ga ẹ, 'u ni wọ ọbawọ ama u goli wọ ebero'. ⁴⁴ Ama ẹ ga nẹ wọ ka, ni wọ ebero ẹga udine siye adura kẹ nẹ ẹnanẹ e siye ekuru jayẹn nẹ wọ na, fọ okurubile nọ ẹnanẹ e ṣuwa wọ adan na, siye oboro nọ ẹnanẹ goli wu na. ⁴⁵ Udi da ogben nẹ nẹ Ẹdẹda nẹnwȯ ososi na. Uba ka ayẹbe ji nọ eyi e wọ́ odudu akọ oboro ẹẹpan, ayẹ edina ṣa osi e wọ ẹnanẹ e siye ọṣẹrẹ akọ ẹnanẹ eé siye ọṣẹrẹ na. ⁴⁶ Ka we nọ ẹnanẹ ni wọ ẹga na, ẹkẹrẹ ọọ́ na wa ka gba aá? Me seyi ka ẹnanẹ a nọ amana na ka bẹ e siyẹẹ? ⁴⁷ Ada ka ọ gan wọ ọda abẹ ayarẹ, ẹna u siye fọrẹ ero ubub? Me seé ka kọ ikuwero abẹ e siyẹẹ́? ⁴⁸ Ọnẹbẹ uùba we ke gbadọ gule, akọ nẹ ososi siye gule na.