nbtt-oks_2pe_text

Epan 3

¹ Uniniro, ọnẹ a wa ikokori ọọboro nẹnẹ ẹ wọrạ nẹ nọ nẹ, ábẹ̀ ẹbọbọ ibe ayẹ ọnyẹnyẹn ma ka e ṣura nẹ ẹyẹ ikuwa ẹka kpo ² Ubaka ni di nyẹn ẹga abẹ nẹnẹ ẹsẹro ọnwọnwọn abẹ ga ùrun na akà ti Idu akà Onaafanro uùburu nẹnẹ biya nẹ tọ àpostolu abẹ uba ọọ̀re na. ³ Tayi din ọnẹ kẹ, ka ọsiro abẹ akà ṣa ìsubu ọmunurun abẹ. Bè èke siye osi bè èke diya ta yẹ èba yẹ ẹrẹn kpẹnẹkpẹnẹ akọ bo onini abẹ siye wa na. ⁴ Bà àka ga ẹ ka, "Ẹta ọrọnmọwọ nẹ yo opilaṣa ma na? Kaba ọgbọna nẹnẹ tẹ ẹda abẹ nẹ buwẹ na ẹpẹn fẹnyan ki wa akọ bi siyẹ wẹ na, kaba akọ ọma ẹrọ ọnẹ wẹ tọ mẹ na". ⁵ ẹ ṣẹrẹ anyẹn luwanyẹn ka ogba ofifun wurun Òsibina ẹẹ̀ga uùba ọrẹ ayẹ biya ma ososi abẹ akà aluja ṣa e wamo wo ebi ibe ṣa akà ebi uùba ọrẹ, ⁶ yu uba ọrẹ ògba ẹnabẹ ayẹ bi wẹ fu ẹrọ ọnẹbẹ nẹ, akọ siye gbe ka ebi dẹsẹ ya na. ⁷ Ẹga ọrọọrẹ ayẹ uùba ọrẹ ayẹ biye tẹbi ososi abẹ akà aluju wujẹ nẹ ẹra, akọ esiyẹ gbe ka bi tẹbi ba wujẹ nẹ ẹkarẹ ọsẹnsẹn iìsubu akà nẹ ẹmẹsiyakosibinaro àbẹ na ọfufu. ⁸ E mẹ gbadọ furu nu, uniniro, ka isubu ọọrẹ nọ Osibina è é wẹ akọ ẹnyẹn asẹn, akà ka ọnyẹn asẹn è é wẹ akọ isubu ọọrẹ. ⁹ Idu è é wuna yu urun yẹrẹ yo ọwọrọrọn abẹ, akọ ẹro ẹbẹn siye à á balẹ osisiniwu ka e siyẹ wa na. Àmá e ki su ọlọn yẹrẹ nẹ ẹpan, ubaka e mẹ ni ka e su ẹfẹna nẹnẹ èke fu ì ni iwu na, àmá a fọ ọgba wujẹ nọ ọrọribebila. ¹⁰ Kẹgạnkẹgan, Idu isubu àka ṣa aka oyiri na: ososi abẹ èke ṣun yo àka igoloko nẹnẹ bi imu na. Bà àka fọ ẹra kẹnẹ ẹpẹn fẹnyan, aluju akà osisiye abẹ nẹnẹ wamọ na abẹ bè èke jin wujẹ nẹ ¹¹ Ako e siye gbe ka ẹkẹna ẹnanẹ bè èke biyẹ akọ fu nẹ, ero ọla ọọna a bọ k nẹ wa a? A bọwọ ka nẹ kẹ ma nẹ ẹrọ ọnwọnwọn akà osiyakosibina na ẹka. ¹² Nẹ kẹ karẹ ya ni diya lakata Osibina iìsubu ọṣẹṣa. ìsubu ayẹ, bẹ èke fụ ososi abẹ àkạ ẹrạ, akà ẹpẹn abẹ bà àka fọ ogugula ọkẹka tana nẹ. ¹³ Àmá kpẹnkpẹnẹ akọ e siye rọnmowo na ti wo ọkẹkarẹ nọ ososi abẹ ȯwọwo ayẹ akà aluju owowo ayẹ, ẹfa nẹnẹ ọsẹrẹ àka kẹ ma na. ¹⁴ Ọ́nẹbẹ uùba, uniniro, akọ e siye gbe ka ni wo ọkẹkarẹ nẹ ẹpẹn ẹnanẹ na, à á siwu bẹ di tọ nu ka ni mẹ su asẹrẹ akà ka u mẹ su ẹbẹ ì yẹ ẹrẹn, ìwọbẹbẹrẹ. ¹⁵ Ka ẹgan, gan ti Idu ọlọn wọ ọnaafan, kpẹnẹkpẹnẹ akọ tọ ọda Ẹpọọlu siye wura ikokori nẹ nọ na, kpẹnẹkpẹnẹ akọ ẹdanyẹn nẹnẹ biyẹ jẹ yẹ ẹji na. ¹⁶ Ẹpọọlu ga ekẹnạ ẹnanẹ abẹ eèga i̇ yi ikokori fẹnyan, ọnẹ nẹnẹ e gbẹ ka ẹbẹn numa k e yẹ ẹro na. akà ẹro abẹ nẹnẹ e è mė jọmọ ọsẹrẹ na bila e wọ ọrẹ ẹbẹn akọ bi siyẹ siyẹ nọ emumu ọnwọnwọn ibubu na, na abẹ ẹbẹba oòfufu. ¹⁷ Ọnẹbẹ uùba, uniniro akọ e siyẹ gbe ka nẹ ṣana din ẹkẹna ẹnanẹ na, nẹ sẹlẹ ni iwu e mẹ gbe ka abẹ gba nọ worẹ ni mi nẹ nọ ikuwa osisiyẹ fuwa. ¹⁸ Àmá ni ki guwẹ ì ti Idu akà Onaafanro Ijesu Ikristi eèse akà odidin. Ugbugbodi ayẹ a da yẹ ẹka ka akana akà jẹn e rẹ ota. Aamin!