¹ Ẹsẹro iṣoma ẹka abẹ ṣa to ero ạbẹ, akà otitero iṣoma ẹka abẹ ka abẹ áka ṣa to nu. Bè éke tu pẹpẹpẹ tọ otite ofutu ẹka dọn ni nu ṣa, bè éke yuru ọga ayẹ nẹnẹ nyin ba na. Bo fofu, áka ṣana ni ba ṣa. ² Ero ọyọyọ í bo osiye gbọgba bà áka kpẹrẹ ka ero abẹ a ga ẹlabọ ki to ikuwa Oòrikpokpo ayẹ. ³ Bà áka wọrẹ nọ je í bọ ọwọwọrẹ aka aworẹ ẹẹ̀ga. Bọ ọṣẹnbije fon nẹnẹ e we à á ṣa na, bọ ofufu éke diye buwe. ⁴ Ubaka Osibina e me tebi angeli abẹ nẹnẹ luwe na wuje. Àmá a tebi ba wuje wo Ẹtatarọsi ka bẹ fọ ba wo ẹṣẹkẹṣekẹ jen e re ọṣẹnẹkarẹ Oògba na. ⁵ Ka ẹgan, e me diye tebi esubu ẹẹ̀rọ wuje. Àmá e tebi Inowa, nẹnẹ jọmọ nọ ọṣẹrẹ na akà ero ufọnbọrẹ ẹbẹn ọ́gbọna nẹnẹ a fọ ẹbi ọra fu ẹrọ ọnẹ nẹnẹ e me jọmọ no Osibina na. ⁶ Osibina diye sẹ iken nẹ́nẹ bè e ye Isodomu akà Igomora ṣina ewurun a ṣen ba ije no ofufu akọ ọmanyẹn nẹ ẹro abẹ nẹnẹ e èke jọmọ nẹ ya ayẹ na. ⁷ Ama nẹ Ẹlọti osiya Osibina na, e je oya éro nẹnẹ e è me din Osibina uùba na ubaka bo osiye gbọgba ẹẹ̀ga na. ⁸ Ọnẹbe uùba ọṣẹrẹro ayẹ, nẹnẹ à á ma í be etin isubisubu na, è é je oya í yẹ uṣi ọnwọnwọn ubaka ẹkẹna abẹ nẹnẹ à á gba akà nẹnẹ e diya wọ na. ⁹ Idu din ako, e de siy se na ọsiyakosibinaro abẹ fan fura ọmabale abẹ na, e diye din ako e de siye se abẹ nẹnẹ e è ne siye ọṣẹrẹ na duna nẹ bọ osiye gbọgba ẹ́karẹ ọṣẹṣẹn isuba na. ¹⁰ Ọnẹ wi ikuwa na abẹ nẹne à á ma su uba jọmọ í bo inini osisiye na aka abe nẹnẹ à á ma tọmẹ ẹpan nạ (authority) na. Abẹ nẹnẹ gbolokona nẹnẹ diye siye abẹ ẹbẹba ibopin, bi ma sọn mọrọrẹ ka bẹ ga ẹlạbo to ugbugodiro abẹ na. ¹¹ Angẹli abẹ su ogbigben aka iwogbigben okeka, àmá í bo osisiye bà á fọ ẹkarẹ ọṣẹṣẹn etun ẹka ṣuwa ba ídu ẹẹ̀rẹn. ¹² Ama ero ẹnanẹ, akọ ẹnẹ abẹ nẹnẹ e è roribe na, i bẹ ma ba kạ bẹ sẹ ba akà ka bi fo ba gbọgba. Bi me din ẹkẹna nẹnẹ bà a kpare utun abẹ na. Ófufu í bà áka ṣe abẹ ẹbẹba fu. ¹³ Bà áka na abẹ ẹbẹba ẹẹ̀kere no osiye ǵbogba. Bi roro ka (Authority). Aṣẹrẹ akà ebẹfuwa abe aye be wa. Bi de je bi iṣomaro osisiye ẹẹ̀rọ ọgbọna nẹnẹ bà a ma ọ ki je ejemẹ na. ¹⁴ Ba anyẹn abẹ fe no onọsẹsẹ; iluwe è é re ba amọ. Bi da wọrẹ ka ero abẹ nẹnẹ e me jọmọ oborọ na ka bi siye gbọgba gbọgba, bi diye re abẹn ọ́larẹ osisiye. Egben abẹ nẹnẹ bi ṣuwa adan na ayẹ bẹ wa! ¹⁵ Bi tebi orikpokpo ọṣẹrẹ wuje ke, bi ne fura orikpokpo ako Ẹbalamu ibeori oògben, nẹnẹ su unini no oduduna rẹ ẹkẹna nẹnẹ a ma wa ọṣẹrẹ na. ¹⁶ Àmá be ma ẹ ga ubaka yo oṣukuru (Authority) oṣowo gbogba nẹnẹ fo orokoro ohun à á ga ega na ayẹ a ṣe ẹsẹro ayẹ irọyọyọ jọmọ nẹ. ¹⁷ Ero ẹnanẹ wa ọsowa abẹ nẹnẹ e è me su ebi na, bi diya wa urima nene è é bila ẹpan na. Ẹfa ọṣẹṣẹ ésiri nẹnẹ run na ayẹ bi guru wuje ne ero ẹnanẹ na. ¹⁸ Bi da fo ọkẹkẹrẹ gbọgba kẹ ga ẹga. Bẹ fọ iwukpe uninikunini kẹ wọrẹ ero. Bi da worẹ ero abẹ nẹnẹ nẹrẹ bè é ni ka bi bila fura ero abẹ nẹnẹ à á ma úsukuru na. ¹⁹ Bi da ron ọfẹfan oòwo ne ero abẹ, àmá abẹ ẹbẹba wa ọvan obibe. Ubaka orokoro wa ovan no ẹkẹna nẹnẹ fọ ẹ ba ke na. ²⁰ È é gbe ka bẹ fan ẹrọ ọnẹ obibe abẹ í ti idu akà onaafanro Ijesu Ikristi uùba ọrẹ nẹnẹ bi mi diya sẹ tọ ba ámò, bimi da forẹ tọ na, ọnẹbẹ uùrunba sina ẹkẹna nẹnẹ, wa odudu fọra ọgba oṣooro nẹ. ²¹ Ebana a kẹsẹ nẹ ba ka bime tayi din ọṣẹṛẹ ọọ̀rikpokpo fora ka bẹ tayi din ya bi mi de bila fura ububuru ọnwọnwọn nẹnẹ biya dọn bu uba na. ²² Utite ọrẹ wa iduwa nẹ ba: "uwo eila wo ayẹ ẹbẹba ọbẹbẹ, aka ọnọma nẹnẹ bi fora ebi na eila wo agbẹ."