nbtt-oks_1pe_text

Epan 1

¹ Ipita, Ijesu Ikristi aapostolu, nẹ́ ẹga abè nene panwara na, nene panwara na, nene bi tiye na, Ẹpontiọsi, Ẹgalatiya, Ẹkapadosiya, Esiya aká Ibitiniya. ² Ọnẹ a wa kpẹnẹkpẹnẹ akọ Osibina Ededa otayidin, Ẹfunwẹnfunwẹn Onwonwon òpuwanwon, ùutun uba ọrẹ, nọ ọtọn ọwọwo akà ni Ijesu Ikrsiti enyon ofore. Ese a da ne no, akà ka ni iwọbebẹrẹ a yere ki bile amo. ³ Uyiyeyi a da no Osibina nẹ wa Edẹda nẹ ti Idu Ijesu Ikristi! Í ye ese ọkẹka a fo ofoba owowo wo ofanyẹnyẹrẹ owẹrọ Ijesu Ikristi ọọ̀sọmapaleṣa fura ekporo uùwuru. ⁴ Onẹ wa no ogun nene e èke fu, nẹnẹ e èke su osin, akà nẹnẹ e èke diya han fuwa na. Ayẹ biye su ósosi nẹ nọ. ⁵ Be fo Osibina iìwogbigben bẹsẹ nọ ọ́nawo uùba ọrẹ nọ ọnaafan nẹnẹ kọ esa wuje ka a fọ iwu nyen ọ́gba omunurun abe na. ⁶ Ni ibe ron nẹ ekẹnẹ ẹnana, e sisi gbe ka a bọwọ akana ka nẹ gba ibe obibe ényankata ọyọyọ. ⁷ Ọnẹ wa ka biya ma nọ ọnawọ balẹ, nẹnẹ rọn forẹ igoli nẹnẹ de fu na, e sisi gbe ka bẹ fọ ẹra ma ẹ balẹ na. Onẹ sẹlẹ ubaka bi di gba ka nọ ọnawọ a sẹpan wo uyiyeyi, ugbugbodi, akà okuruno Ọgbọna nẹnẹ Ijesu Ikristi á à fo iwo nyẹn na. ⁸ ma gba ẹ gba, àmà u ni yẹ ẹga. U ma gba ẹ akana, àmà ọ na ẹ wọ u mi bẹn áka ebeben nẹnẹ e e me su ọfowo ga na, ni diye fẹ nu ugbugbodi. ⁹ Ni mi gba à à ne ni iwu akana, ọnaafan nẹ nẹ ẹyẹ abẹ. ¹⁰ Yẹrẹ ọnaafan one ẹpan, ẹsẹro abẹ nẹnẹ ga ẹsẹ nẹnẹ bọwọ ka e ni nu ṣa na ẹèsẹ, fọ ọlọn pila apen bi diye fo ba balẹ ¹¹ biye no ka bi din orokoro ọla sa ogba nẹnẹ Ikristi ẹẸ̀funwenfunwẹn nẹnẹ wo bi ibe na à à ga ogbona nẹnẹ a nu ubedin wuje yẹrẹ Ikristi oòya abẹ akà ugugbodi abẹ nẹnẹ akà yẹrẹ ba na ẹpan. ¹² Biya nyen ba ka a ma wa bi iwu ẹka bè e gu ne, àmà nẹ ẹka, ọgbọna nẹnẹ abẹ nene à á wasun ẹ̵̵̵̵̵̵pefan oboro à á ga ẹkẹnẹ ẹnanẹ nẹ nọ na , Ẹfunwẹnfunwen Ọnwọnwọn uùba ọrẹ nẹnẹ bi file kaba ososi ṣa na-epẹn abẹ nẹnẹ angẹli abẹ ni ka be yọrẹ anyẹn gba na. ¹³ Ọnẹbẹ uùba ni gbe ni iwu ẹyẹ. Ni sọlọn. Nẹ fọ nọ ọfanyẹnyẹrẹ fẹnyan yere ese ayẹ nẹnẹ bà áka fọ ṣa ọ́gba nẹnẹ bà àka fọ Ijesu Ikristi nyẹn na. ¹⁴ Akọ egbẹn nà wo otọn na, ni ma kọ ni iwu ge inini nẹnẹ nà a yẹrẹ ọ̀gba nẹnẹ ni wo imedin na. ¹⁵ má kpẹnẹkpẹnẹ akọ onẹ nẹnẹ ye nu siye wa onwọnwọn na, ka anọ ẹbẹba nẹ da onwonwon í ni iwa. ¹⁶ Ubaka e wọ ẹwọrẹ ka, "Da ọnwọnwọn, ubaka ẹ wa ọnwọnwọn". ¹⁷ Ọnẹbẹ uùba nè e ye "Ẹdẹda" ọnẹ nẹnẹ à á sẹnẹ karẹ ọsẹrẹ na kpẹnẹkpẹnẹ akọ ororo ubutun siye wa na, jen wẹ ẹrọ ọgba eèjen òkurunọ. ¹⁸ din ka a ma wa akọ ẹfadaka akà iwura nẹnẹ de fu na ayẹ biyẹ nyin nu pila abẹ iìwa nẹnẹ ni kpiya ì nẹ ẹda abẹ ùba na. ¹⁹ Akonẹbẹ ì, bi nyin nu pila akà Ijesu eènyọn ọnyẹnẹkẹ, ẹfẹna è é wẹ akọ ududogben nẹnẹ e è mẹ su ẹbẹfuwa ṣa asẹrẹ na. ²⁰ Ṣana bẹ fọ ẹro ọnẹ à á kpa ayẹ bi wẹ tiyẹ Ikristi nẹ, amá akana bẹ fọ e nyẹn ọ̀gba ọnanẹ. ²¹ Ì yu uba nẹ yẹrẹ din Osibina, nẹnẹ sọma ẹ palẹsa fọra ekporo e mi fo ugbugbodi ne ya, kpẹnẹkpẹnẹ ka nọ ọnawọ akà ofanyẹrẹrẹ e di wo Osibina. ²² Nẹ wọrẹ ka nẹ ẹyẹ a nwon ì nọ ọwọtọn ni ikuwa ọnẹ wa nẹ ẹdagben uùnini ikuwa ẹka uùba; Ọnẹbẹ uùba ni ni abẹn ikuwikuwa ẹka ìbẹ ṣa. ²³ Bi fọ nu ba, a ma wa òbirẹ nẹnẹ diyẹ fu, àmá òbirẹ nẹnẹ e è diyẹ fọ na, Osibina ẹẹga ni wamo nẹnẹ diyẹ jọmọ na. ²⁴ Ubaka, "Iwukpe fẹnyan e wa àko ẹmẹ na, akà yu ugbugbodi fẹnyan akọẹmẹ iìfofoni ohula. Ẹmẹ dẹ yẹyi, yi ifofoni dẹ mi wulẹ fuwa, ²⁵ Àmá Osibina ẹga jọmọ nọ ọtutun". Ẹga ọnẹ ayẹ a wa ẹpẹnpanọbọrọ nẹ bẹ kpọ nẹ nẹ na.