¹ Mɓa, vie nǝ Nǝngbungam ɓǝ ɓai tsing tangsǝ le nǝngni hyui'iu avai nwõn nǝ, nǝngɓǝng ng li tangsǝ le nǝng ni hũhũrǝ ni nang'nya nabi ɓai wui ɓaman ganvǝu a, "Awu!" ² Mɓǝ, nǝnɓǝ bua ka la kavǝu. Yivanǝ pĩ bua nǝ kantãun la naun, ei dǝu nǝngmuaku. U wu un yivǝnǝ ciku kǝu cikuu. ³ Nǝngbungam ɓǝ ɓai nǝngvai nwa a na'iu, ng li nǝng a hũhũrǝ a na'iu na a, "Awu!" ⁴ Bua kala i kahyĩ (red). Yivǝnǝ dǝ arǝ ai dǝu nwa u ɗǝ larǝ fangwam, yangkǝ zaivǝ hyia ha. Yivǝnǝ dǝ arǝ ei dǝu gwang gãfang. ⁵ Nǝngbungam ɓǝ ɓai nǝngvai nwa a nata, nǝngɓǝng li nǝng a hũhũrǝ a nata na a, "Awu!" mɓa bua ɓi, yivǝnǝ dǝ arǝ mua le kwang na'iu kanau. ⁶ Nli nǝng'akala ihala ɓai wui tangsǝ le nǝng ni nang'nya hũhũrǝ nǝ na a, "Nǝng'nyi alkama ku dinari tsǝng, ɓa le nǝng'nyi nǝng barli nata ku dinari. Bie ɓa nauni nuĩ ɓai mǝngka. ⁷ Nǝngbungam ɓǝ ɓai nǝngvai nwa a nanya, nǝngɓǝng li nǝng a hũhũrǝ a nanya na a, "Awu!" ⁸ Nǝngɓǝng ɓǝ bua ɓǝla sǝu vyĩvyĩrǝ. Yivǝnǝ dǝ a bua bǝnǝ iung Bwa, Hade muakǝ cwu. Ei dǝ le tsarǝ ku fangwam bǝ nang'nya, ai hyia bǝ ɓai hyium, ɓa vuom ɓai nǝngzhĩ ɓa le hyiam ɓǝngvu fangwam. ⁹ Nǝngbungam ɓǝ ɓai nǝngvai nwa a nahyĩ, mɓa ɓwanyi bagadi hũrǝ vaivǝ nǝ ei hyia bi bivǝ Fi ɓai bi bǝ nabi vai nǝ ei mua. ¹⁰ Ei tata ɓai wui, "Nkem ɗau, Yicueva kunəng kpam, garangrang ɓai ka'gang, sai na cue kita kǝ levǝnǝ la ku fangwam ni kǝ wa fa nwahem hwyĩ ɓi? ¹¹ Kon wa ha tangsə le ei dǝu nǝng'yasǝ'ǝ vau, ei nale la ai'mi nala cuani sai nyile hyile le muangsam ɓale hyile levǝnǝ ei hyile bi Fi nǝ ne hyiale ɗakǝni. ¹² Nǝngbungam ɓǝ ɓai nǝngvai nwa a hwĩtsung nǝngɓǝng ɓa hyua yǝu ɓai tsa. Fie ʤ‌ũrə mem kaɓi ɓaman zanǝng bazhĩ, fihwĩm mem ɓaman hwyĩ. ¹³ Le ‌ʣǝng nǝ ɗuiye ni o hyua ɓaman ka vai ei yanka nǝ ɗuanglǝu kǝta daidenǝ yua dǝ wõrǝnǝ. ¹⁴ Ɗuiye kwam ɓaman kwangʣua nǝ ei kwam-kwamrə nǝ.Le tai ha ɓalai gwam nwam yibənə le la nə. ¹⁵ Nəngɓə le yiva fangwam, ɓale vanga, ɓale gwa le soja, levǝ nǝngcinǝng, ɓa levǝnǝ tsatsarǝnǝ, ɓai kon waha, le mongtsǝm ɓa levǝ ei yilei na nǝ ei yue bwa tai ɓa le ɓǝng tai, ¹⁶ ei nakə le tai la ɓa le ɓamtai a, "Ɓa o ku ɓi! Ɓa lam ɓi nǝng yivǝ ni ku kukai ni ɓai bǝ bwaci vǝ Nǝng'bungam. ¹⁷ Fi bǝ bwaci vai wung. Nwang ban dzirǝ?"