¹ Ci cwasǝu, mɓa le malaika nang'nya dzi nwa le lungrǝ fangwam nag'nya, ei mua le yua ni nang'nya yang bi le yua ɓǝ wang ku nwãm ko ku ka kai. ² Nɓa malaika ka la i nyi dǝ wurǝ, u mua nǝngvai'nwa vǝ Fi nǝ hũhũrǝ nǝ. U tata'a ɓai wuie tsarǝ kǝ le malaika nǝ nang'nya levǝnǝ ei dǝ le nwa ei nauni hyua ɓai nwam ka nǝ: ³ "Ɓi ɓa nauni hyua ɓai nwam ɓa le ka kǝ, sai ne tam nǝng nwangpwaci le mongsǝm vǝ Fi ɓi. ⁴ Ng li pkarǝ vai vǝ nǝ ei tam nəng nwapwaci ni: 144,000 ei tamǝng nwapwaci le nwakava vai Israila ha pkam. ⁵ hunhwĩ hyua hyua irǝu na'iu (12,000) tang nwaka va vai Juda ei van nwapwaci le, hunhwĩ hyua hyua irǝu na'iu (12,000) tang nwaka va vai Ruben ei van nwapwaci le, hunhwĩ hyua hyua irǝu na'iu (12,000) tang nwaka va vai Gad ei van nwapwaci le, ⁶ hunhwĩ hyua hyua irǝu na'iu (12,000) tang nwaka va vai Asher ei van nwapwaci le, hunhwĩ hyua hyua irǝu na'iu (12,000) tang nwaka va vai Naftali ei van nwapwaci le, hunhwĩ hyua hyua irǝu na'iu (12,000) tang nwaka va vai Manassa ei van nwapwaci le, ⁷ hunhwĩ hyua hyua irǝu na'iu (12,000) tang nwaka va vai Simion, hunhwĩ hyua hyua irǝu na'iu (12,000) tang nwaka va vai Levi, hunhwĩ hyua hyua irǝu na'iu (12,000) tang nwaka va vai Issaka, ⁸ hunhwĩ hyua hyua irǝu na'iu (12,000) tang nwaka va vai Zebulun, 12,000 tang nwaka va vai Yisu, hunhwĩ hyua hyua irǝu na'iu (12,000) tang nwaka va vai Benjami ei van nwapwaci le. ⁹ Cua le nǝngni nǝngɓǝng ɓa, gwang ʣung zaivǝ kpala nǝ yivǝ nǝ ban zamrǝ nǝ yaung tangsǝ le ku yua, le nwakava, zaivǝ ɓa le nwa dzi ci kakurǝ vǝ Nǝngbungam. Ei ya nǝng'yasǝ'ǝ vau ɓa le yanka dibino le, ¹⁰ de ɗubǝ ɓai wui tsa a, "Yuangrǝng a Fi ɓi nǝ ku kukakuri ni ɓai Yinǝngbungam!" ¹¹ Le malaika ʤi bapi ɓai kakurǝ nǝ ɓai bapi ɓa le vang'ngã ɓa le nǝngnǝ hũhrǝ nang'nya, nǝngɓ ei bǝi hyua ɓai nwaku le ci kakurǝ ɓi. Ei hwĩun Fi ¹² a, "Dzing mangɓǝ! nkãrǝ, yiurǝ, bǝ dǝ nkãrǝ, hyĩrǝ, tsarǝ ɓai samɓai a vǝ Fi ɓi ka'ing ka'ing! "Dzing mangɓǝ! ¹³ Yivaka tangsǝ le vang'nga ɓi ɓim a "Lewa yanǝng kavau ne, ei i lampa? ¹⁴ Ng nau la, "Baba, ma ibǝ," nəngɓəu namla a, "Leɓi kə levənə wu tangsə yiɓai ang'nga ni. Ei lo le nǝng'yasǝ vai mem kavǝu ɓai hwyĩ Nǝngbungam. ¹⁵ Nǝngnǝ cue ei ji ci kakurǝ vǝ Fi de nkãurǝ ingvĩ ɓsi ɗuafi nwakom Fi. Yivǝnǝ ku kakurǝ ni un lamble bai ngãrǝ vo. ¹⁶ Vom ɓai ling'mǝng mua le kau. Fie djũrǝ ɓai ɗuaka gbale wa. ¹⁷ Nǝngbungam nǝ ku ɓǝng kakurǝ ni, ung memkǝ yivǝ gbã le rǝ. Ung olekǝci, ung ta le kǝ bǝ nǝ mǝng hũrǝ dǝ ɓula nǝ. Fi n'fii le nǝngmǝng nǝng le fi ha kpam.