¹ Nǝngɓǝng ɓa malaika dǝ wurǝ ɗuiye. Ula ɓai nǝngɓai'nwakom bua nǝ bǝ tǝngrǝun yaun nǝ, u la ɓai sarka naun. ² U mua djǝu ɓǝ, djǝu kwii, uɓa ke yivǝneng aɓai ko mungkulum, u tsǝu le ha hũng'hwĩ i hyua. ³ U wo tangsǝ ɓua ni bǝ tǝngrǝu yaun nǝ, u lam u vai nwõ. Anǝ yang, u fǝm levǝ akau sai nǝ ha hũng'hwĩ i hyua pai ɗǝ kǝ ni. Cua sǝu yang ein yauna yi cuani. ⁴ Nǝngɓǝng ɓa le kakurǝ. Levǝnǝ ku ku ni, levǝnǝ ei dǝ le tsarǝ cue kita nǝ. Ng ɓa levǝ nǝ ei cum kule bivǝ bi Fi nǝ ɓai bi bǝ nabi vǝ Yeso. Ei hyĩau hyĩamɓǝngvu ɓai kwan'u ɓa ei la bǝ mau nǝngtamna ko nwãku le ko kana le. Nǝng le ga, eing memke yiva cuahai ɓai Kristi. ⁵ Nyi levǝ nǝ ɓui nǝ i lau lada sai le ha hũng'hwĩ i hyua tǝng dǝ. Nǝngɓǝ kǝ irǝ a na'nwaci. ⁶ Larǝ ɓai hyĩrǝ a vǝ yivǝ nǝ ta tangsǝ levǝne i na nwaci nǝ! Ku levǝ ni, ɓua na'iu yaung ci tsa ku le wa. Eing memkǝ le kunlau vǝ Fi ɓai Kristi kǝ, ei muabǝ cuahai ɓai Kristi kǝ le ha hũng'hwĩ i hyua. ⁷ Nǝ le ha hũng'hwĩ i hyua wu bǝ tǝngrǝu yang, ei yina kǝ mungkulum tang prisǝna vau. ⁸ Unta un yiu levǝ le nwã'yua fangwam na'nya, God ɓai Magog, yang kai wule kǝ bǝ ta ɓui. Eing mem kpãla ɓaman hyuan'hwĩ nwããm. ⁹ Ei ta nǝngfavu fangwam ei kwam bǝ gamrǝ vai muacua Fi ɓai va nǝ dei yiɗi nǝ. Ɗua wu ɗuiye wu li le. ¹⁰ Mungkulum nǝ djǝ nwale nǝ, ei wo kǝta tang nwãm ɗua nǝ dǝ lirǝ nǝ bǝ nǝ hyĩamɓǝngvu ɓǝ la ɓa le na'nwã'iu ei e le tang ɗua ɓi. Eing dǝ le yiɓai ingvyĩ ɓai ɗuafi ka'ing ka'ing. ¹¹ Nǝngɓǝng ɓa kakura ka kavau, yivǝnǝ ku ku ni, nǝngɓǝ ɗuiye ɓai hyua ga yeu bǝ ciu, baka yaun ein talarǝ. ¹² Mɓa levǝnǝ ɓui le vangã ɓa le muahang dji ci kakuri, nǝngɓa ei ɓai le kwangdua ɓǝ la. Ei cue kita kǝ levǝne la ɓui nǝ ku nǝngni ei vyĩ tang le kwangdjua ɓi ni, ku nwacum vai nǝ ei cue kǝ nǝ. ¹³ Nwãm dǝ levǝnǝ tang nǝ. Bwai ɓai Hade dǝ levǝ nǝ ɓui tangsǝu ni. Ei cue kita kǝ levǝnǝ bwa hyĩa nǝ ku nǝngni ei cue nǝ. ¹⁴ Bwa ɓai Hade kǝ e ei le nwã-ɗua. Nǝngɓǝ kǝ ɓuirǝ na'iu, nwãm ɗua. ¹⁵ Yivǝnǝ ei ci iung ei vyĩ tang Kwangdjua a Hũrǝ lau ei wau tang nwãm ɗua.