¹ Cwa nǝng ni nǝngɓeng li nǝng aka wa ɓaman wui dzung zaivǝ ɗuiye dǝ na a, "Haliluya. Yuangrǝ, ngãrǝ, bai tsarǝ avǝ Fi ɓi. ² Nǝngnǝu na nǝ hyĩ'ing, agang. U cue kita kǝ gwang yihai cueyua ne la ɓangkǝ fangwam ɓai neng'aɓai vau. U fa nwãhem hwyĩ le muangsǝm vau nǝ ei aikǝta." ³ Ei na nǝng na'iu, "Halliluya! Hwyĩɗua i ɓwa ka'ing ka'ing." ⁴ Le vangã nǝ hũngtsǝng iriu nan'nya ɓa le nǝng'nǝ hũhũrǝ nan'nya nǝ fa bai hyua ei hyĩau Fi nǝ ku ku kakurǝ ni. Dei narǝ a, "Halliluya! Amin." ⁵ Nǝngɓǝ wui kǝ i kukai ɓi a, "Ɓi nkã Fi ɓi ɓa le muangsǝm vau, ɓa levǝ nǝ dǝ ɓiɓi vau nǝ le vangã ɓa le muahang. ⁶ Nǝngɓǝng li wui ka ɓaman wui leva kpãla, ɓaman vǝm mǝng, ɓaman gamvau dǝ gbamrǝ a, "Halliluya! Fi lue vang, u mua fangwam kpam. ⁷ Ɓi li larǝ ɓi gbãin ɓi dǝ ngãrǝ bi mimɗuayihai vǝ Yinǝngbungam wung, hǝu masǝu yang. ⁸ Ei dǝu na yang u yanǝng linin kavau hwĩm-hwĩmre" (linin ɓǝ nǝngɓǝ kǝ nwãtsum a hyĩrǝ vaivǝ vǝ Fi). ⁹ Malaika ɓa namla a, "A vyĩĩ nǝ: Levǝ larǝ, levǝ nǝ ei ɗuba le sǝ mimɗuayihai vǝ Yinǝngbungam." U namla a, "Le bi vǝ Fi a gang nǝ." ¹⁰ Ng fang bai ciu ta min hyĩaurǝ, nǝngɓǝ u na a, "Bie cue nǝngnǝng ka! Ming muangsǝm kǝ nwãma ɓai hwĩ ma nǝ dǝ nabi Yeso nǝ. A hyĩau Fi, bi nǝ naku Yeso nǝngɓǝ kǝ kwang na'nwã bi ¹¹ Nǝngɓǝng ɓa ɗuiye ɓai, ng ɓa bua ka la kavǝu. Yivǝnǝ dǝ arǝ nǝ dei ɗu kǝ Yiva cue gang ɓai Yiva bǝgang. Ka'gang, u cue kita u takǝ ɓui. ¹² Nǝung ɓaman liem ɗua, le nǝng muaku la ku kpãla. U la ɓai ing nǝ ei vyĩ ku ni, yivaka yaun ibǝ sai u ɓai kukǝ u ibǝ. ¹³ U yanǝng sǝu ei ba nǝng'yasǝ tangsǝ hwyĩ. De ɗu ing'u ke Bi vǝ Fi. ¹⁴ Le soja ɗuiye dǝ mucua ɓa le bua vau, ei ya linin bemla, kavau, hyĩla. ¹⁵ Tangsa nwã gãfain la lemla, nǝ dǝu hyia ka le zaivǝ nǝ, yang un mua le na. Un tam le sǝ bǝ kãmrǝ ci vǝ Fi Angã. ¹⁶ Ula ɓai ing nǝ ei vyĩ sǝ nǝng'yasǝ vau ɓai sǝ tsǝu: "Yiva vai yiva ɓa Yicueva vai yicueva." ¹⁷ Mɓa malaika dji tangsǝ fi. U ɗubǝ ɓai wui angã kǝ le yi hyuĩ nǝ dǝ yarǝ ye ni, "Ɓa wu ɓa gam cuahai ɓi tang nǝng'tang vǝ Fi. ¹⁸ Ɓa wu ɓa tang hyĩamsǝ le yiva, sǝ le vangã soja, le vangã, sǝ le bua ɓa le arǝu, sǝ levǝ kpam, le muangsǝm ɓa le ɓa levǝ nǝ ei ile nanǝ, le vangã ɓa le muahang." ¹⁹ Mɓa le hyĩamɓǝngvu ɓa le yiva fangwam ɓa le soja. De gamrǝ bǝ ta ɓui ɓa yivǝ nǝ dǝ a bua nǝ ɓa le soja vau. ²⁰ Ei mua hyĩamɓǝngvu ɓǝ ɓa le na'nwã'iu nǝ cue le nǝngɓisǝ nǝ ciu ni. Ɓa le nǝngɓisǝ ɓǝ nǝngɓǝ u fǝm nwã levǝnǝ mua nǝngtamnǝng vǝ hyĩamɓǝngvu ɓa levǝ nǝ hyĩau kwang ɓǝ nǝ. Le ɓǝ na'iu vai e ei le ɓai hũrǝkǝ tang nwãm ɗua dǝ li ɓai ci nǝ. ²¹ Nyiu le ei hyia le ɓai ngãfãn nǝ i nwã yivǝ ni dǝ a bua nǝ. Le yihwĩ ha tang hĩam