¹ Isabatti mẹ zẹtẹ da, ini ajụvenị ọkushi ipaapa ọsẹ, di Imeri Imagidareni ọnri Imeri ọsa vẹ, de ve re irikuta ọnọ. ² Ree, ẹtẹ o jụdụdo, fụvọki angeni ayi Ananyiyi ọnya o chi fụrẹ ẹbẹẹba vẹ, do ve zina irẹta ene si kụ irikụta ọnọ fi naani, dọ yatụ tụra a. ³ Ọsisi ẹngwụzụ aani, o venebiri inyanya, di aụrụ aani aa vụẹtẹ bẹnẹ-bẹnẹ. ⁴ Angwa do shi oserẹtẹ ẹna yizọ, dẹ bani, dẹ sẹdụ nyẹtẹ, dẹ si mẹ ezene sụ da. ⁵ Di angẹni ọnọ kaa yi anyẹnẹ ẹnẹ ka, "Asi angwa shụ ụ nini, ma yẹ ki Ijesu, ana kani za ọchi-avashi ọnụ we si nini. ⁶ Ọ zi kụ yi izọni, fụvọki ọ sha kwẹtẹ da, venebiri ọ mẹ ka gẹdẹ-gẹdẹ. Waa vẹ nin, ve ree izi Ananyiyi bidi sụ tẹtẹ tụ. ⁷ Jantụ na ka yi ẹziafu aani, 'Ọọ sha kwẹtẹ fini akaakana ẹni ne su da. Ree, ọ tụọvidi awu nini a ni Iganini. Izọ ọnụ ve ye ree nini, "Ree ma ka yụ wụ nini da." ⁸ Di anyẹnẹ ẹnẹ sẹsẹ fini irikụta aani ini angwashi ọnri ụjẹ zụe na ka yi eziafụ aani. ⁹ Ree, di Ijesu ne tụ wa, dọ kaa, "Ma kụ nini." Di anyẹnẹ ẹnẹ vẹ, dẹ za afụ Ijesu, dẹ vakụẹtẹ kụọ. ¹⁰ Di Ijesu kaa yụ wa ka, "Asụ kụ shangwa nini. Naa ka yi ẹnyarami nini, ka ẹẹ ni Iganini. Izọ ene ve ye re mi." ¹¹ Anyẹnẹ ẹnẹ ma na, di ẹnyi ini oserẹtẹ ẹnẹ, ngwụ ini irẹkụra na, dẹ na ka yi arụfa ọbani Oshomoshi nini, isẹnẹ mẹ bo. ¹² Ụmọni arụfa ọbani Oshomoshi ne tu azẹkụ nin, dẹ geyi inọpati irẹyi ọnọ, dẹ si ẹkẹshi ọbani yi oserẹtẹ ẹnẹ, ¹³ dẹ kaa yụ wa ka, "Ka yi aza nini ka, 'eziafụ Ijesu e vee yi okụ aani inafụ, imaa sụara.' ¹⁴ Igomina raa wụ irẹyi ọnọni, iva mẹ ka ọ dọzẹ, di kụ isene shụ wa angwa kụra." ¹⁵ Di oserẹtẹ ẹnẹ dẹ ẹkẹshi ọnọ, dẹ mi isa ana kẹ mẹẹ. Irẹyi ọnọni ọ vaa garashi ini akaakana ani Ijụụ, dọ yi inaani vetụ rajini. ¹⁶ Di eziafụ Ijesu ẹwụrọnya ni Iganini, dẹ shirẹ irẹsụfa ọni Ijesu ka yụ wa ka ẹ nọ. ¹⁷ Ụmẹ ene re, dẹ fẹkẹẹ ama, dẹ ẹnyi aa jọọ irẹka. ¹⁸ Ijesu o ve tu wa, dọ kaa yụ wa ka,. "A si ụmọ bo ineekụ ọnri inẹshẹ yi mi da. ¹⁹ Fụvavọ, ngwụ irẹkụravabẹ bo na, dụ wa kụ eziafụ va yi mi nini. Dụ wa mi isami yụ wa, ini irẹsha Ada ọnri Ozi ọnri Ifẹ Ọnini. ²⁰ Waa zụ wa ka ẹ vatụra isa bo ọnim ka yụ wụ nini. Ree, ma ya bẹrẹ wụ nini pooro, nangwụ inaama ẹshẹ."