¹ Eyi mẹ ni, di ọdọvidi arụfa nin ọnri azẹkụ nin shọma a mẹ vaa zi Ijesu doti a wụọ. ² Ẹẹ zaa, dẹ sụọ, dẹ siọ ne chire Ipairẹti ọna vi gomina ụvọ. ³ Ijudasi ọna siọ chire wa ụvọ mẹ re ka a jivi isụ yọ da, do rinẹ varama, dọ si ẹkẹshi isiriva ofurẹwụ ọnọ dọ, dọọ varama yi ọdọvidi arufa ọnri azẹkụ nini, ⁴ dọ ka, "Maa chamayi ini ka ma si ọza ọna ra zi ̣nyi ivị chire wụ nin ụvọ." Ama dẹ ka, "Yere ọna gẹ yi tuọ? Na mẹ ene re zeweyị. ⁵ Do ne ẹkẹshi ọnọ tẹtẹ ini itẹmpụrụ, dọ jinẹ na ne doro ẹngwu aani. ⁶ Ọdọvidi arụfa nini ẹẹ si ẹkẹshi ọnọ, dẹ ka, "Ofi ̣ọ zi zẹ ka ẹnẹ va ẹkẹshi ọnọ bẹri ẹkẹshi ana si tẹ, fụvọka ẹkẹshi anya ọnọ vi." ⁷ Dẹ gẹ shọma ka asi ẹkẹshi ọnọ na shi ẹtẹ, ọne ve zụ ne oku ọzọga tụ. ⁸ Fụvavọ ọna si shi ẹtẹ ọnọ "Ẹtẹ Anya" ve tụ rajini. ⁹ Ụmavọ di irẹyi ọni Ijeremaya ọkisẹ ka tụrama va si sẹ; ka, "Ẹsi ẹkẹshi isiriva ofụrẹwụ ana vi irishi, ọ ni ani Isrẹni ji tụraa, ¹⁰ dẹ ka siọ shi ẹtẹ, enee noku ọzọga tụ vene ụmọ ọni Ananyiyi si yi mi." ¹¹ Ijesu mẹ dinẹ tụọvidi Igomina, di igomina fọọ ka, "Ẹwụ ọnọ wa vi oshinọyi ani Ijụ nini?" Di Ijesu voshi ka, "Wa kavọ." ¹² Ama arụfa ọbani nin shi azẹkụ nini mẹ kaa yọ ka, ọọ mẹ anazi sẹrẹ, ọ zi tụ wa oshi. ¹³ Di Ipairẹti fo ̣ọ ka, "Wa zi wụ isẹna kashi wụ bo aani?" ¹⁴ Ama ọ zi voshi ọchi ọnya, dọ vi isẹnẹ shi igomina eyi. ¹⁵ Ọmimẹ oshẹtẹ ayi igomina ọnọvi ka, aa mani aa rụpe, dọ kaa yi aza ọkọni ka ẹ ni ̣ani ijaaru ọnya, ene ve si ka fụrụvọ yi ẹ̣ni. ¹⁶ Ụmavọ, ọ nyi ani ijaarụ ọshimi ọnya anaa shi Ibarabasi. ¹⁷ Fụvavọ, e me peregụ da, di Ipairẹti fọ wa ka, "Ẹnụ we si ki ma fụrụvọ yụ wụ nini? Ibarabasi wa yọ, navẹki Ijesu ọnaa shi Ikristi? ¹⁸ Ọ yẹ ki ẹ si Ijesu ve chire ọni ụvọ ini ayamkụ. ¹⁹ Ọmẹ yi yatụ tụ izọnọ yaa jishi, di ose aani tụ vetụo ka, "Asụụ nyi ụvọ tụni irẹyi ọnọrụ ọna ra zi nyi ivi aa vọọ. Fụvọki maa rụya kokorọ ini ụra ọnim ra inọpạti aani rajini." ²⁰ Ọmẹyani di ọdọvidi arụfa ọbani nin shi azẹkụ nini, shi aza ọkọni ẹnẹ, dẹ kụ shụwa inẹ, ki ẹ ka ki ene si Ibarabasi doti e roze wụ Ijesu. ²¹ Di Igomina fọọ wa ka, "Ẹni we si kaa fụrụvọ yụ wụ nini ini enẹ viva?" Dẹ ka, "Ibarabasi." ²² Di Ipairẹti ka, "Sẹnụ ki ma si mi Ijesu ọnaa shi Ikristi?" De voshi ka, "Kaniọ za ọchi-avashi." ²³ Umavọ dọ fọọ ka, "Ọmẹzi, yere ọshimi ọnọ mẹ kẹ?" De nowu fụavọ, dẹ ka, "Kaniọ za ọchi-avashi." ²⁴ Ipairẹti me re ka ọzi nyi isa ọnọni va zu mẹ, ama, akikọnọ, di efura ava ngwọ, do si enyi, dọ nyina avọ aani, inọvidi aza ọkọni ẹnẹ, dọ ka, "Ma zi nyi ivi ini anya ọza ana ra zi nyi ivi aani. Ree tụọ yẹngwụ nini." ²⁵ Di aza ọkọni ẹnẹ ka, "Anya aani vaa yini irẹsu ayi, shi ezi rama ayi. ²⁶ "Ụmavọ dọ fụri Ibarabasi ụvọ yụ wa, ama dọ ka asi ijampa tụ Ijesu, dọ vaa si ọ chire wa ụvọ, ka ẹ na kaniọ zọchi-avashị. ²⁷ Ụmavọ di ashoja igomina zaa Ijesu nangwụ ni ọba ayi ijọva, de pere ashoja boo gụ. ²⁸ Dẹ va tụọ afụafụ, dẹ si aụrụ ovivi chiree. ²⁹ Dẹ si amụ-ikeyi kụo irẹ̵sụ, dẹ si ọchi-ọkẹtẹ tụọ ụvọ. De kuẹtẹ tụọvidi aani, dẹ mẹẹ isiya ka, "Oshinọyi Ijụụ nini yi!" ³⁰ Ẹẹ jatẹ kụo, dẹ va dọọ ọchi-ọkẹtẹ ọnọ, de fuo yọ inẹsụ ụpẹrika. ³¹ Ẹ mẹ mẹẹ isiya da, dẹ tụ aụrụ ọnọ fụrẹ ọbẹ, dẹ si aụrụ ayani, de chire yọ, dẹ vaa tụọvidi ka, ana kani ọ za ọchi avashi. ³² Ẹ mẹ jinẹ tụẹshẹ, de re ọzẹnyi ọna fụrẹ Isaireni, ọni irẹsha aani vi Isimoni, ọni ẹnẹ si ẹkẹka za, ko chema ọchi-avashi aani. ³³ De ne tụ irẹkụra ana shi Igọrigọta, ana yẹ tụni, "Irasha ọchụkụ rẹsụ." ³⁴ Dẹ si eche ana nyirẹyi yọ ko fụo. Ama ọ mẹ daare, ọ zi zẹ fu o. ³⁵ Ẹ mẹ kaniọ zọchi-avashi da, dẹ chi pẹmpẹmpẹ, dẹ siọ ga aụrụ aani shẹngwụ avọ, ³⁶ dẹ yatụ, de seree. ³⁷ Dẹ chẹrẹ irẹka ẹnẹ kụzaa tụni ẹbẹẹba rẹsu aani ka, "Ọnọni ọnọ vi Ijesu oshinọyi Ijụ nini." ³⁸ Oyi ẹẹva ana kani zọchị bẹrẹẹ, ọnya yi akụvọri, di ọfụva yi akụvọfa. ³⁹ Di ẹnẹnaa parafụ aa kụọ ụfụ, dẹ sheni irẹsụ, ⁴⁰ dẹ ka, "Ẹwụ yị, ẹwụ ọna ka kụ ve wụ itẹmpụrụ, dụ si ẹkụshi ẹẹta daa varama, ji ẹngwụ ụ tụ kẹ! Aavika Ozi Oshomoshi ọnụ vi, chi fini ọchi-avashi ọnọ!" ⁴¹ Avọ ọni ọdọvidi arufa ọbani nin vaberi oyofi nin, shi azẹkụ nin ma mẹ isiya ka, ⁴² "Ọ dọ azẹnẹsa tụ, ama ọizụ dọ ẹngwụ aani tụ, ọnọvi oshinọyi ani Isrẹni. Navọ doti o chi fini ọchi-avashi, ụmavọ ọni va dọọwụ. ⁴³ Ọ kụeyi tụra Oshomoshi, navọ doti Oshomoshi ọ va jọọ tụ ọmẹyani, aavika Oshomoshi o si ka ọna fụre ụvọ. Fụvọki ọ vana kaa ka, 'Ẹ ma vi Ozi Oshomoshi.''' ⁴⁴ Avọ ọni oyi ana kani zọchi bẹrẹ mẹ za kụọ ụfụ. ⁴⁵ Ọmẹyani, fini iwakati ọfụ shinọnyi, di oozi shi irasha bo nangwụ iwakati ọfụ shinna. ⁴⁶ Inọpati iwakati shinna ọnọ, di Ijesu nowu tụẹshẹ, dọ ka, "Eri, Eri rama isabachitani?" ọnọ vi ka "Oshomoshi ami, Oshomoshi ami, ọ mẹ zi du varama ka mi kẹ?" ⁴⁷ Ụmọni azẹnyi ẹnẹ na dinẹ tụ zọ, dẹ wụ, dẹ ka, "Ọọ shi Enaija." ⁴⁸ Inafụ ọnọ, di ozenya anini zụechi na si ikanka, dọ jọọ ngwụ ineche ọna si vẹrẹyi, dọ jọchi ngwụọ, dọ tanaa yọ ko fụo. ⁴⁹ Di ẹnẹna vọọ ka, "Navọ di ye re aavika Enaija vaa vẹ va jọọ tụ." ⁵⁰ Ụmavọ di Ijesu zẹ varama nowu tụẹshẹ, dọ va fụrẹ ifẹ aani ụvọ. ⁵¹ Di ita ana si ji itẹmpụrụ sha tụoze ẹẹva fụri ẹbẹẹba netu ẹtẹ, di ẹtẹ sheni, di ida nin sha vasha. ⁵² Di irikụta nini sharenụ, aza Oshomoshi bo ana sụara ini isụ, dẹ sha kwẹtẹ. ⁵³ Dẹ jinẹ vẹ fini irikụta ọ mẹ sha kwẹtẹ da, dẹ ngwụ irẹkụra ọnini, dẹ sẹngwụ zụ aza ẹrụrụ. ⁵⁴ Umọni ọga ashoja ẹchẹshi nin ọ̣nri enene sere Ijesu me re ẹtẹ me zizi, ọnri isa bo ana mẹ, di angwa shụwa kokoro, dẹ ka, "Ini irẹiza, Ozi Oshomoshi ọnọvi." ⁵⁵ Anyẹnẹ ẹrụrụ ẹna vatụra Ijesu fụri Iganini, ka ẹnẹna mi osisieyipe aani ana izọ, taneyi ere fụri irasha ọgọdọ. ⁵⁶ Imeri Imagidareni, Imeri ọnyi Ijemisi ọnri Ijosẹfụ vabẹri ọnyi ezi anẹrụ Izebede, vana bẹrẹ wa. ⁵⁷ Orụva me tụ, di opisa ọnọrụ ọnyi fụri Arimatiya, ọni rẹsha aani vi Ijosẹfụ, dọ zẹ vi vi oziafụ Ijesu vẹ, ⁵⁸ Ọ ve tụ Ipairẹti, do fisụe oku Ijesu. Di Ipairẹti kaa yụ wa ka, a fụrẹ ụvọ yọ. ⁵⁹ Ijosẹfụ ọ si okụ ọnọ, dọ si ita ọvụọvụ, ọna nii, dọ si chire okụma, ⁶⁰ do nee tụni irikụta ọwọọwa, ọnọ chi tụni irẹta yẹngwa aani. Do zina irẹta ọbani kụoze irikụta ọnọ, dọ fizọ. ⁶¹ Imeri Imagidareni ọnri Imeri ọsa vana yị izọ, de yatụ veyi ki irikụta ọnọ. ⁶² Ini eyinẹshẹ aani ana vi ọkụshi Isabatti, di ọdọvidi arụfa ọbani nin shi Ifarisi nin, pere ẹngwu netụ Ipairẹti. ⁶³ Dẹ ka, "Ọga, ya tamayi ka anapẹ ọnọ mẹ yẹshẹ, ọ kaa ka, 'Inaama ẹkụshi ẹẹta, mva sha kwẹtẹ,' ⁶⁴ Fụvavọ, mi ụmọ doti e re ka irikụta aani vana yini osisere nangwụ ụmọni ẹkụshi ọfụta. Ọọzivavọ, eziafụ aani va zụ ne yi okụ aani, ̣'dẹ ka yi aza kọ sha fini isụ da' ọnọ vika apẹ ọikọta ono ve dụvi fụ ọi paapa." ⁶⁵ Di Ipairẹti kaa yụ wa ka, "Si oserẹtẹ, do ne sere izọ." ⁶⁶ Dẹ na, de sere izọ. Dẹ mẹ ami tụni irẹta ọnọ, ki asọ nyi ẹzẹna kani ọ.