¹ Ini ẹfi ọnọ, eziafụ aani de vee tụ Ijesu, dẹ fọọ ka "Ene fụ kẹ ini ijọva ọi ineekụ?" ² Di Ijesu shi ozoweyi ọnya pẹngwụ aani, dọ siọ tụni akaakana anini, ³ dọ ka, "Ini irẹiza, ọọ zivi ka ii vene ezeweyi nin, wai zụa ngwụ ijọva ineekụ. ⁴ Fụvavọ, ẹzẹna ra vẹngwụ shẹtẹ vene ozoweyi ọnọni, ono fụ kekere ini ijọva ineekụ. ⁵ Ẹzẹ ne re si ẹngwụ ozoweyi ọnọni ọzọga ini irẹsha mi, vene ze si si mi ọzọga. ⁶ Ama ẹzẹna ra mẹ ki ọnya ini ezeweyi ẹnẹ ana dọ mi wụ ka ẹ chamai, ọ dashi fu ke zu irẹta ọkwọsẹ gẹ ọbẹ, dee ne ngwụ ini irefụ. ⁷ Ẹshẹ, oodụ ụ kụ fụvọ umẹ ọsisẹdụ ọni yaa. Aa yẹ ka ụmẹ ọshimi ọnọni vaa vẹ, ama oodụ ọzọnọ kụ, ọni ụmẹ ọshimi ọnọni va zirẹngwu aani vẹ. ⁸ Ụvọ awụ navẹki ụfụ awụ raa mẹ ki wa mi isa ọshimi, daa neta. Ọọ dashi kụ wa ngwụ ini ẹshẹ poro-pooro rụvọ ọnri ufu irẹjiji, funi ka si ụvọ ẹviva ọnri afụ ẹviva nangwụ ineekụ ọrọkọtọ. ⁹ Iri awụ raa mẹ, kụ wa mẹ isa ọshimi, tụọ nẹta. Oo dashi kụ wa ngwụ ini ẹshẹ poro-pooro bẹri iri ọnya fụni ka ne wụ ngwụ ini ira ana za poro-poorọ bẹri iri awụ ẹviva. ¹⁰ Navọ dụ we re kụ wa zi seyi wụ ezeweyi ẹnẹni. Maa ka wụ angẹni anini ọnitụ Oshomoshi, va naa veyi shirẹ ẹfi boo re Ada mi ana yi ineekụ. ¹¹ Fụvọki ozi ọza vana vẹ va ji aza ene vụ tụ. ¹² Ụme roo tụ kẹ? Ọza raa nyi atẹmẹ ẹchẹshi, dọ ọnya inaani vụ, ọ wa ra za navọ ẹchẹshi ọ fụrẹ ọnya ana vọ tụni irẹsụfa, do si ọnya ene vụ na? ¹³ Aavika o re ọnya ọnọ, ọ va jụjẹ aani fụni ẹchẹshi ọ furẹ ọnya ene re zi vụ. ¹⁴ Ini oze ọnyọnya, ọzivi Ada awụ ana yi ineekụ, ki ọnya ini ezeweyi ẹnẹni, ọ vara ovivụ. ¹⁵ Ọnyara awụ, raa mẹ ọshimi ka wụ vẹ, na dụ wee ne tụo, ẹwụ riọ anava, dụ wa kaa yọ ọshimi ọnọ ra mẹ ka wụ vẹ, aiviki o bewatọ, ọnọvi kụ waa dọ ọnyara awụ ọnọ varama da. ¹⁶ Ama, aaviki ọ zi bewatọ, si ọza ọnya navẹki ẹẹva bẹrẹ ẹngwụ awụ, fụvọki ini irenụ onivenụ ẹẹva navẹki ẹẹta ana va ya yẹ irẹiza irẹyi. ¹⁷ Aaviki ọ zi bewatọ, ka yi ichọọchi, ọ zi ve be ichọọchi nin atọ, ụmavọ dụ kụ siọ venebiri Ijẹntaini ọnri ọdimaana. ¹⁸ Ini irẹiza, ma kaa yụ wụ nin, isatụrisa ọnụ ra sụ inẹshẹ, vana vaa su ineeku. Isatụrisa ọnu ra ngwara inẹshẹ, vana vaa ngwara ineekụ. ¹⁹ Di ma zẹ ki ka yụ wụ nin ka, aaviki ẹẹva ini awụ nini, ẹẹ si ọma vọnya ini isẹne re fisụe, Ada mi ana yi ineeku vana va mẹẹ yụ wa. ²⁰ Izẹni aza ra gụ ẹẹva navẹki ẹẹta peregụ ini irẹsha ami, mva vini akaakana anini. ²¹ Ụmavọ, di Ipita vẹ va fi Ijesu ka, "Ananyimi" ụpẹrika ya ọni ọnyara ami va chamai yi mi, di ma va tangwa si aichama aani vayani kẹ? Ụpẹ shimba wayọ? ²² Di Ijesu voshi ka, "Maa zi ka yụ wụ ki ụpẹ shimba, ama otu ụpẹ ẹbẹrẹta-rẹwụ inoze shimba." ²³ Fụvavọ, ijọva ineekụ o vene oshinọyi ọnya one si ka ọna bere ezida aani aa mi ishuro ẹkẹshi ọnọ si yi wa. ²⁴ Ọmẹ vẹrẹ kẹnẹ dọ siọzu, da si ozida ọnya vetụo ana riọ ụta itarẹnti ampo ẹbẹrẹva-rẹwụ. ²⁵ Ọmẹ ra zi nyi ẹkẹshi ve sụta, di ọga aani ka na ọnri ose aani, shi ezi, vabẹri isa ọnọ ra nyi bo doti o sio sụta ọnọ ri. ²⁶ Inaani, dị ozida aani nyima, dọ va kụẹtẹ, dọ ka, "Ẹwụ ọga mi nyi ayụva yi mi, mve sụta ọnim rụ ụ boo." ²⁷ Inaani, di ọga aani sụta ọnọ riọ vayani, dọ fụrẹ ụvọ kọọ na. ²⁸ Ozida ọnyọnya ọnọ mẹ va nẹshẹ, do re ọza ọni ọnri ọ gẹ vi ozida, ana riọ ụta idinari ẹchẹshi, dọ sụvọ shio ọbẹ, dọ ka, 'Si mi ụta ọnụ ri mi.' ²⁹ Ama di ozida ọfụva ọnọ kụẹtẹ dọ dipẹ ka, "Nyi ayụva yi mi, mve sụta ọnim rụ ụ." ³⁰ Ama, di ozida ipaapa ọnọ yii. Akikọnọ do nee ngwu ijaarụ netụ ụmẹ ọnọ ve zụ sụta ọnọ riọ. ³¹ Ụmọni ezida anavọ re isa ọnọ mẹ, di ayi kụ wa. Dẹ na kaa yi ọga anini isa boo ọnọ mẹ. ³² Inaani, di ọga ozida ọnọ shiọ, dọ ka,"Ẹwụ ozida ọshimi ọnọni, maa sụta ọnụri boo vayawụ fụvọki wa dipẹ yi mi. ³³ Dọviki, waizụ vayi ọzọfụva awụ vene mmẹ vaya wụ?" ³⁴ Di ayi kụọ ọga aani, dọ siọ chire ẹnẹna sụya ri ọza ụvọ netụ ụmẹ ono ve si sụta ọnọri boo. ³⁵ Avọ ọni Ada ami ana yi ineekụ mẹ zẹ va mimẹ yụ wụ nini aaviki ọzọnyọnya awụ nini ọzi si aichama ọnyara aani vayani fini ọtụtụrụma aani."