¹ Ijesu mẹ karẹyi ẹnẹni da, dọ fụri Iganini nangwu ọkakoro ayi Ijụdiya ana yi akajinẹ okụfa Ijọdani. ² Aza ọkọni ẹ vatụraa, dọ fụ wa ikụ sha. ³ Ifarisi nini e vetụo, dẹ moore, dẹ kaa yọ ka, "Ọọ wa vọrọ ka ọza o yi ose aani, dọ diwe yọ ka ọnọ zi kụ nyi?" ⁴ Di Ijesu voshi ka, "Ụ wee re zi re kaa ki, ọza ana mẹ wa fini ivẹrẹ, ọ mẹ wa ọnọrụ ọnri ọnyẹnẹ?" ⁵ Ọza ana mẹ wa vana kaa ki, 'Fụvọ ọnọni ọni ọnọrụ vaa navọ ada aani bẹrẹ ọnya aani, dọ na vabẹrẹ ose aani, dẹnẹ viva si vi ọnya ini ụpẹngwụ?' ⁶ Fụvavọ ẹzi kụa vẹva, ama dẹ si vara ọnya ini ụpẹngwụ. Fụvavọ, isẹni Oshomoshi ra za vaabẹ da, a sọ nyi ọzẹna shawa shi." ⁷ Dẹ kaa yọ ka, "Sẹnẹve di Imosisi si ụmọ yiyi ki ya diwe yose ayi, doti ya zẹ dụ wa na kẹẹ?" ⁸ Di Ijesu kaa yụ wa ka, "fụvi ọtụtụrụma ọkata ọnụ nyi nin ọnọ mẹ ki Imosisi ọ kaa yụ wụ nini ka, u ve zụ yi ose awụ nin, ama ọzi vavọ mẹ vi fini ivẹrẹ. ⁹ Maa kaa yụ wụ ka, ọza ana re yi ose aani, dọ zivi fụvi irẹka ọsisẹ, dọ na si ọnẹẹ ọsa, vana sẹrẹka; ọnọrụ ọna ra zẹ na si ọnẹẹ ene yi tẹtẹ da, vana zẹ si sẹrẹkạ." ¹⁰ Di eziafu Ijesu kaa yọ ka, "Aavika avọ mẹ viyi ọnọrụ ọnri ose aani, ozi zoza ki ọza ọ nyi onẹẹ. ¹¹ Ama di Ijesu kaa yụ wa ka, "Ọzi vi aza bo ẹnẹ va zụ dọ ọzizụ ọnọni, ọchishi ẹnẹna soze yi, ẹnẹ va zụ dọ. ¹² Fụvọka ọ nyi osụretụ ẹna vọvọ ya fi ininẹ ọnya anini vẹ, ama dọ nyi osụretụ ẹnyi, ọnọ vika aza ẹnẹ vọvọ mẹ wa, dọ zẹ nyi ẹnẹna mẹngwa anini osụretụ fụvọ ijọva ineeku. Ọza ana ra zụ dọ ọzizụ ọnọni, navọ doti ọ dọọ." ¹³ Umavọ da ku ezoweyi vetụo doti ọ sụvọ tụra wa, dotị o tụozụrenụ yụ wa, ama di eziafụ aani ee dụ wa ẹngwụ. ¹⁴ Di Ijesu ka, "Navọ di ezeweyi ẹnẹni ẹ vi idami, asa jiwa-oze, fụvọka ijọva ineekụ vi ayanini." ¹⁵ Ọmẹ sụvọ tụra ezi ẹnẹ da, dọ fi izọ, dọọ na. ¹⁶ Ọnọrụ ọnyi o vetu Ijesu, dọ kaa yọ ka,"Ọzụọzisa, yere isa ọiza onim bẹdọ va mẹ doti ma nyi ẹshẹ poro-pooro?" ¹⁷ Di Ijesu kaa yọ ka, "Ọmẹ zi dụ fọ mi inọpati isene zoza? Isa ọnya kẹnẹ ono zoza, ama, we ve si kụ wa ngwụ ini ẹshẹ poro-pooro, wa si ụmọ aani mụkọrọ." ¹⁸ Di ọnọrụ ọnọ ka, "Yere ụmọ ọnovi?" Di Ijesu kaa yọ ka,"Asụụ wụ ọza, asụụ sẹrẹka, asụụ yi ụyi, asụụ divenụ apinẹ, ¹⁹ si ụbani yi ada awụ ọnri ọnya awụ, sirẹyi ọzọfụva awụ vene ẹngwụ awụ." ²⁰ Di ọnọrụ ọnọ kaa yọ ka, "Isẹnẹni bo vọnim vatụra. Sẹnẹ kụ vọ mi kẹ?" ²¹ Di Ijesu kaa yọ ka, "Wee si kụwa gụ, na dụ wa na nogụ ọnụ ra nyi, doti wa gaa yi ọniriwa nini, ụva nyi ogụ ineeku; dụ wa va vatụra mi." ²² Ama, ọmụsha ọnọ mẹ wụ isa ọni Ijesu ka, dọ si ayiodụ fizọ, fuvọka ọ nyi ogu ọrụrụ. ²³ Di Ijesu kaa yi eziafụ aani ka, "Ini irẹiza ọnim ka yụ wụ, ọ vaa ngwụẹngwụ ka ọpisa nin ẹ ngwụ ini ijọva ineekụ-ọiza. ²⁴ Maa zẹ kaa yụ wụ ka, Ọọ rọ engwụ yi irankụmi ka ọzi iri ọrishi jinẹ fụni ka opisa nin ẹ ngwụ ijọva Oshomoshi." ²⁵ Eziafụ aani mẹ wụ, dọ vi isẹne shụweyi, "Ẹna va zụ dọ tu aavọ kẹ? ²⁶ Ijesu o re wa, dọ ka, "Aa si tụni ayi aza, ọzi vi isa anạ va zụ mẹ, ama aa si tụni ayi Oshomoshi, isa bo vi ọmimẹ." ²⁷ Ụmavọ di Ipita voshi dọ kaa yọ ka, "Ree ya navọ isabo di vatụra wụ. Sẹni vaa nyi aavọ kẹ?" ²⁸ Di Ijesu kaa yụ wa ka, "Ini ireiza ma kaa yụ wụ nin ka, inẹshẹ ọwọọwa, efi ọni Ozi Ọza va yatụ tụni ogede aani, ẹwu nin ọnọvi kọ vatụra mi, va yatụ tụri ogede ẹwụrẹva, ini ụmẹ ishọji ayi irẹkụra ẹwụrẹva ayi Isrẹni. ²⁹ Aza bo ọnọvi kẹ navọ ireshi, ẹnyara anẹrụ, ẹnyara anyẹnẹ, ada, ọnyi, ezi navẹki ẹtẹ fụvọ irẹsha ami, ẹ vaa dọ ini oze ẹchẹshi, dẹ zẹ riọgụ ẹshẹ poro-pooro. ³⁰ Ama, ẹrụrụ ana vi ọzi ipaapa, vavi ọza ene keke, ene keke, vavi ọza ipaapa.