nbtt-igb-x-etuno_1th_text

Irẹsụ 5

¹ Ẹwụ nin ẹẹnyara yi, ọikụ zẹ nyi kima chẹri isọnyọnyi tụshụ wụ nin inọpati ẹfi ọnri ụmẹ. ² Fụvọki ẹwụ nin nyẹmbẹ ọọ yẹ kokoro ka, ọkụshi ọni Ananyiyi vaa vẹ, vee veni oyi inaafụ. ³ Ụmẹ ana raka kaa, "Ẹngwọrọ ọnri ki arimanyi ayọtụnẹ," ẹfiavọ, ovivụri asigiri vee tụwa. Oo vee vene ọnyẹnẹ ana barẹyẹ. Ẹizụa javọ inoze ọnyọnyi. ⁴ Ama, ẹwụ nin ẹnyarayi, wazi yi ini oozi ọnọviki ọkụshi ọnọ vee tụwụ nin asigiri vene oyi. ⁵ Fụvọki ozi ẹtofei ọnri ozi ọọdụ ọnụvi nin. Yazi vi ezi irafụ navẹki ezi oozi. ⁶ Fụvavọ, asụ sụara vene aza ẹnavọ. Akikọnọ, anavọ diya sieyipetẹ, diya zẹ nyi ọvivẹngwụ nẹtẹ. ⁷ Fụvọka, ẹnẹna sụara, vanaa suara inafụ, ẹnẹna mẹrẹ eche, vanaa mẹẹ inafụ. ⁸ Ama, ọmẹ viki ozi ọọdụ ọnivi, ibẹdọ vaa nyi ọvivẹngwụ shẹtẹ, di si ọdọwụ ọnri osisi mi okụrachi, di zẹ vasi ọkikụeyitụra ini ọjijitụ iramụfụọ, ana razi nyi ọjirẹka, di siọ mi akọkọ kụ irẹsụ. ⁹ Fụvọki Oshomoshi ọzi mẹ yi, ki ọni vasi ọikụ vụyi iri, ama, diya nyi ọdidọtụ zirẹngwụ Ananyiyi Ijesu Ikristi. ¹⁰ Ọni ono sụ yiyi, diye zụ pee mẹshẹ ini ọshisha navẹki ini ara. ¹¹ Fụvavọ, wa si ọnọni fufu ẹngwụ inẹ nini, dụwa sụvọ pẹngwụ vẹnẹbiri ụmẹ bidi aa mimẹ nin. ¹² Yee fisụe ẹwụ nin ẹẹnyara yi, kụwa si eyi zaa, ẹnẹna mụkọrọ inakaankana awụ nin, dẹ si eyi pewụ ini Ananyiyi, dẹ si ajụwe yụ wụ nin. ¹³ Yee ze fisụe kụwa sụbani yụ wa kokoro ini osisi, fụvi ụkọrọ anini. Si ẹngwọrọ pe ẹngwụ ra nini. ¹⁴ Ẹwụ nin ẹẹnyarayi: yaa ji zụwụ nin ka, ẹnẹna mẹ vazi-vazi, tuwaaje ẹnẹno si dụeyi, nụwa ẹngwụyaa. Mọgụvọ yi ọkụmi nini, nyi ọsẹngwụdọ yi aza bo. ¹⁵ Ree kụ wazi si ọshimi sụta ọshimi yi ọzọnyọnyi, ama, waa dụ isene zoza yẹngwụ nin, ọnri yi aza bo. ¹⁶ Waa jụjẹ inẹfi bo nin. ¹⁷ Waa tụ ozụrenụ inẹfi bo. ¹⁸ Ini ọnbo, si avọkụ yi Oshomoshi, ọnọni ọni Oshomoshi ee si ini Ijesu Ikristi yụ wụ nini. ¹⁹ Asụ mira Ifẹ Ọnini. ²⁰ Asụ si eyi wụ ọkisẹ nin. ²¹ Zami isa boo re. Dụwa sụvọ za ana ra vi ozoza. ²² Tụvọ fini isọshimi ana ra si ẹngwụ zụ. ²³ Oshomoshi ẹngwọrọ ọ vara wụ nin ọnini bo. Yaa tụozụrenụ ka, ọtụtụrụma awụ nin, ifẹ awụ nin, ọnri ẹchẹngwụ awụ nini, ọọtẹ ini arimanyivi netu ọkụshi ọvivẹ Ananyiyi Ijesu Ikristi. ²⁴ Ọzẹna shụwụ nin, vi ọnirẹiza, ọni ọnọ zẹ vaa mii mẹẹ. ²⁵ Ẹẹnyara yi, waa tụozụrenụ yiyi nin. ²⁶ Kụ ẹẹnyara yi ini ọshishara ẹngwụ ọnini. ²⁷ Maa si Ananyiyi dipẹ kụwa kiwe ọnọni yi ẹẹnyara yi bo. ²⁸ Ọiza-ọọfẹ Ananyiyi Ijesu Ikristi, ọvi ayawụ nini.