¹ Ini ọikọta, ẹẹnyara yi, ya tụ wụ nin ụkata ọnri dụwa sikamarenụ ini Ananyiyi Ijesu. Venebiri imẹ bidi ka yụ wụ nin. ọmẹ vọrọ kụ wa zụsẹ, doti wa mẹ inẹ Oshomoshi shine, vọọ vatụra oze ọnọ, doti wa zụ mẹ fụnavọ nin. ² Fụvọki waa yẹ ụmọ oni zirẹngwụ Ananyiyi Ijesu si yụ wụ nin. ³ Fụvọki osisi Oshomoshi yi, ki ọzọzọ mẹ ẹngwụani ọnini, doti azi gọdọ yi irẹka-ọsisẹ, ⁴ di ọzọzọ yẹ ọmẹ vọrọ kọ si ose aani inoze ọnini ọnri oze ụbani. ⁵ Aivi isa ọshimi ọni ẹchẹngwụ eesi venebiri ani Ijẹntairi nin ana razi yẹ Oshomoshi. ⁶ Asi ọ nyi ẹzẹna mivi shi ọnọfụva aani ini irẹyi ọnọni. Fụvọki Ananyiyi ono siatọ isẹnẹni bo, vene imẹ bidi tụwụ nin aje, di zẹ divenụ da. ⁷ Oshiomoshi ọzi shi yi tụni arimani, ama tụni ọnini. ⁸ Fụvavọ, ezene re yi irẹyi ọnọni tẹtẹ, ọzi vi ọza ono yi tẹtẹ, ama Oshomoshi ana si ifẹ ọnini aani yụ wụ. ⁹ Inọpati osisi irẹyi ẹngwụ ẹẹnyara, ọikụ zẹ sẹrẹ ki ọzọnyọnyi ọ chẹriwe tụ shụ wụ nin, fụvọki Oshomoshi ọvidi zụ wụ nin da, kụ we sirẹyi ẹngwụ nini. ¹⁰ Ini irẹiza, waa mọnọni yi ẹẹnyara yi boo ana yi Imasidoniya. Ama ẹwụ nin ẹẹnyara yi, sikamarenụ dụwa mẹ fụnavọ nin. ¹¹ Yaa zẹ kika wụ nin, kụwa mẹ shẹshẹ nin, si eyi pe ayawụ nin, dụwa sụvọ awụ nin mụkọrọ venebiri imẹ si ụmọ kaa yụ wụ nini, ¹² doti we roze zụsẹ ẹtẹrẹ inọvidi azẹnẹsa inẹshẹshẹ, dasi ọ na nyi isẹnẹ zụọ wụ nini. ¹³ Ẹwụ nin ẹnyarayi, yezi si kụ wa ini arimayẹ inọpati ẹnẹna sụara, fụvọ asi inẹ awụ nin dụ, venebiri ẹna razi nyi ̣ọkụayitụra ini iramụfọ. ¹⁴ Aaviki yaa dọwụ ki Ijesu oo su, dọ sha kwetẹ, aavọ ọni Oshomoshi mẹzẹ vaa shi sha ẹnẹna suara ini Ijesu kwẹtẹ bẹri Ijesu. ¹⁵ Fụvavọ, ọna si kaa yụ wụ nin zirẹngwụ irẹyi Ananyiyi ka, ẹyi ana yi inẹshẹ, anavọ tụ inaama, ini ọvivẹ Ananyiyi, ya zaa dọvidi ẹnẹ nọviki ee suara da. ¹⁶ Kaa Ananyiyi nyẹmbẹ vee chi fi ineekụ vẹ. Ọ vaa vẹ bẹri owụ-ọna, vabẹri ọngwẹ oshirẹsụ angẹni, ọnri ọpani Oshomoshi, di enene su da ini Ikristi bidi sha kwẹtẹ. ¹⁷ Ụmavọ, eyi anavọ tụ nẹshẹ vaa vabẹrẹ wa ini egụshi netụ Ananyiyi ẹbẹẹba. Inoze ọnọni, di kụ ya pe Ananyiyi inẹfi bo. ¹⁸ Fụvavọ, waa si irẹyi ẹnẹni fufu ẹngwụ inẹ nini.