1
Vhaa yele wẹ khi e chi egbe kpiale ni eni e kpeda na wẹ, e suọ esọ a na wẹ, e nwuno egbe khi e rhọ kee gbe ikanya aghyie.
2
Imhẹli e zẹ onobe ọgbọ, e na ni epfuasẹ, e pfọmhẹ, e chi egbe a kpiale rhọ khali ọgbọ kwu.
3
Ẹrhẹghẹ o la ni eyẹ rhọ nyele waa eyẹ khyiẹli umhasuesọ. Ẹtsẹkẹ ọdọdọda e nwuno eyẹ vhi igwhumha e lieliẹ eyẹ alo odẹa. Eyẹ nyele elemhi ingmobe eyẹ dobẹ ẹtsẹkẹ ọgbọ ẹẹ to eyẹ vhi egbe. eyẹ rhi ingme egbe ee shi elemhi, eyẹ bishi elemhi egbe.
4
Ama abhi isomhelemhi ali ighọli Ishinẹgba ni otsumhi eyẹ o ke rhọ bhẹ,
5
a khi ikanya ipfuasẹ ni eyẹ gbe, ama rhọ te ikpa ivhẹlemhi ọ li ọ te tsumhi eyẹ. Te ikpa ikhyiẹlẹ vyia irhọ kyili onogbọ te ikpa Ayẹmhẹ ni o pfuasẹ li ọ te tsumhi eyẹ.
6
Rhẹmhi Ishinẹgba ọ rhọ te obọ Ijesu Ikiristi ni otsumhi kwu Ayẹmhẹ ni o Pfuasẹ rhugwhu eyẹ.
7
Ishọyọ abhi ọ ke rhọ rhi eyẹ kyili eni e vha lue te ikpa izọtena ọli, eyẹ kẹ dobẹ mhọli obọ shi irhegbeda ni o kyili agbọ ẹlẹnagbọagbọ.
8
Ọni usomhi ona o tẹ ni a rhi egbe a nya. Mhia nono khi u kee rhi izezudu ngme eni ingmemhi ena, ishọyọ eni e rhi egbe nya Ishinẹgba e kẹ pfi ẹgbue shi ikanya aghyie ni a rhọ na wẹ khi e gbe. Ena kwu e ti abagwhoyọ e gwe kyili elele ni iọgbọ kwu.
9
Ama vha chi epfuasẹ iyẹghẹyẹghẹ le ali amama ni ọ to vhẹ ekẹ le ali iwola ali okwhẹ obobẹ ishi. Ena kwu ikanya apfuẹ ni elele e vha li e kyia.
10
Vha khyie ekẹ ba eni e pfi okemhi a shi vhẹ iteteva, ni vha chi wẹ esọ utogwho ọa liyọ iteva,
11
Vha yẹsẹ khi ọgbọ ọyọyọ ọ she rhọ te odẹ aghyie vu je odẹ obe ọ pfuse egbe ọlia.
12
Mhi kha ghyie Atẹmasi ọa liyọ Itachisọsi bhuli vhẹ, vha nyanya bhale a vhẹ mhẹ vhi Inikapolisi, na mhi laa la ẹrhẹghẹ okasẹ.
13
Vha nyakwa ghyie Izẹnasi, ni ọ nwemaa gwẹ ishi, ali Apolosi, odẹ ni ẹtsẹkẹ o vha te laa to wẹ pẹẹ.
14
Iọgbọ eyẹ e nwemaa wẹna abhi e kee li gbe ikanya aghyie khi e kẹ ke dobẹ khyiẹli emeni e to wẹ khi anya o ke gbe wẹ.
15
Agbọ kwu ni e nu mhẹ la ea tsẹ vhẹ. vha tsẹ eni e mhọli ighọli eyẹ elemhi imyiesuọ. Izọtena khi uwẹ vhẹ.