¹ Ama ghyiẹ, Kee wẹna wẹ owẹna aghyie ni o de shiọ. ² Eni e womhẹ emọse e nwemaa pfọmhẹ, e nwu ekpẹ a shi egbe wẹ vhi egbe, e mhọli ẹgbhẹ, imyiesuọ o ga wẹ egbe, elemhi ighọli ali irhegbemyie tẹsẹ. ³ Abagwhoyọ eni e womhẹ ikpotso e kee nwu ekpẹ ẹ shi egbe wẹ egbe, imhẹli eye opfuẹpfuẹ iọgbọ. Imhẹli e kyili edenyọ. E kee wẹna iọgbọ ewẹna aghyie ⁴ ishọyọ e kẹ dobẹ wẹna ikpotso ikpeghenu shele abhi e kha li mhọli ighọli igwhẹ wẹ ni emọse ali imyi wẹ. ⁵ E wẹna wẹ khi e mhọli egbhẹ, e pfuasẹ, e gwabha kee gbe e rhi ẹloli a kwhu apfẹ, ea suesọ ni igwhẹ wẹ ni emọse. E kee lina khi a ke nwu ingmemhi Ishinẹgba alo wu ekẹa. ⁶ Abagwhoyọ, vha ngme khase eni inọghọdọ khi e rhi ẹgbhẹ kyia. ⁷ Odẹ kyi odẹ kwu vha rhi egbe vhẹ kyili unu na fẹli a shishi unua obodẹ ikanya aghyie; U khaa wẹna, rhi ingmaghyie ali ekpẹ kee khasẹ. ⁸ Kee ngme ingmemhi Ishinẹgba ni o gba pfuse ali ni o vha mhọli ikhọkhọ, ishọyọ ọnọni ọ kee zẹnọ ẹnwẹ a shiọ omama o laa nwu ọ, rharhi khi ọ vha laa mẹ ingme nwu ni eyẹ. ⁹ Wẹna igwhumha khi e kee suọ esọ ni ega wẹ e rhi egbe a nwu wẹ odẹ khi odẹ kwu, imhẹ vha nu ega vhẹ zọlọ. ¹⁰ Imhẹli e do wẹ ighyiatọ onochi, e kyili iọgbọ aghyie e kyili eni a rhi egbe a nya, khi e kẹ rhi ekpẹ shi oni ewẹna Ishinẹgba ni otsumhi eyẹ emeni ea khyiẹ kwu. ¹¹ Rharhi khi izọtena Ishinẹgba o she rhi egbe ọli khasẹ ọgbọ kwu. ¹² Rhẹmhi o wẹna eyẹ khi eyẹ chi ẹtsẹkẹ umhamyiesuọ ali ọgwhẹmhẹ agbọ le. Rhẹmhi o wẹna eyẹ khi eyẹ rhọ shi ẹgbhẹ, eyẹ gwabha nyele, ali eyẹ nyele inyele odẹ Ishinẹgba oni agbona ¹³ Eyẹ rhi ukpẹloe shi ekẹ a ke khẹ oni ogbẹlẹ irhegbeda eyẹ, abhi ikiki Ishinẹgba eyẹ ni ọtọgbe ali otsumhi eyẹ ni Ijesu Ikiristi o li laa bhẹ. ¹⁴ Rhẹmhi Ijesu ọ rhi egbe ọli bhẹ khi lẹẹ rhọ te umhasuesọ pfa eyẹ shi ekẹ khi lẹẹ kẹ rhi eyẹ shi ipfuasẹ ni egbe ọli, abhi iọgbọ ni a kẹẹ ni ea nono abhi wẹwẹ e li gbe ikanya aghyie. ¹⁵ Kee ngme eni ingmemhi ena khi u rhọ kee zeze wẹ idu khi e kee khyiẹli ẹtsẹkẹ enana. Rhi afu ni u mhuẹ kee sheshe agbọ. Imhẹ rhi egbe ni ọgbọ rhi ẹloe gbe ẹ.