¹ Mhẹmhẹ Ipọlu khi ọna ni aghyiusomhi. Imha kyili aghyiusomhi ni ọ te obọ ọgbọ bhale wẹ khi ikpa ọgbọ mhi te bhẹ, ama te obọ Ijesu Ikiristi ali Ishinẹgba ni ita, ni ọ rhi ọli te egwhi vule. ² Gboghyiẹ eni inyọgwho eyẹ kwu ni emọse ni e nu mhẹ la li eyẹ gba kẹkẹ oni ebe ona ghyi uka nẹ Iglitiasi. ³ Ivhẹlemhi ali ọpfọmhẹ Ishinẹgba ni Ita eyẹ ali Ọnọmhuẹyẹ Ijesu Ikiristi o nu vhẹ la. ⁴ Ni ọ rhi egbe ọli somhi eyẹ opfa shi ingmobe eyẹ khi lẹ kẹ tsumhi eyẹ vhi ingmobe ni a mẹ amo ena le, abhi o ghọli Ishinẹgba ni Ita eyẹ. ⁵ Ikiki o kyili uwi ọli ẹlẹnagbọagbọ apfishi ẹlẹnagbọagbọ. ⁶ Oo kyili emeni e nwu mhẹ ẹloe na vhẹ ni vha rhọ liyọ nyanya liegbe je odẹ ughamhi ovhese. Oo nwu mhẹ ẹloe khi vhaa lieliẹgbe vhi obhoni ọni ọ rhi ivhẹlemhi Ikiristi nyalu vhẹ ọ la le. ⁷ A vha mẹ odẹ ingmemhi Ishinẹgba ovhese, ama iọgbọ egwho e la ni ea kphakpha vhẹ ni ea pfi ozugwhu shi oni usomhi Ikiristi. ⁸ Ama o kha rhẹ kyia eyẹ, ọa liyọ o kyili aghyiukọ ni ọ te idane kpiale li ọ ngme ingmemhi Ishinẹgba ovhese khasẹ vhẹ, epfua ọ kyia uwi ọ. ⁹ Abhi eyẹ ke kpọọ ngme, iyọ mhi gwe ngme ena, A kha mẹ ọgbọ ni ọ ngme ingmemhi Ishinẹgba ovhese ina khi oni vha kpọ lama shi, epfua khi uwi ọ. ¹⁰ Rhẹmhi ke laa kee mhila agbọ kee ngme naa? Laa rhẹmhi ke laa kee khyiẹlẹ emeni e rhi egbe a nwu agbọ ena? Mhi kha nono khi mhi rhi egbe kee nwu agbọ lọ, Imha kha kyili ọgamhẹ Ikiristi. ¹¹ Rharhi khi mhia nono khi vha yẹsẹ, inyọgwho mhẹ, khi oni usomhi na mhi tsua kyia ena, o vha kyili uwi otsonagbọ. ¹² Imha te obọ ọgbọ mẹ ọli, wẹ khi rhẹmhi a wẹna mhẹ lẹ. Ama, irhọkhasẹ li o kyila ni o te obọ Ikiristi bhẹ bhuli mẹ le. ¹³ Vha she kpọ suọ abhi mhi kpọ li la obodẹ agbaa Ijudeizi, abhi mhi li mẹ eyuka Ishinẹgba ẹchọ ni a vha dobẹ a khọkhọ ni o tsua opfu. ¹⁴ Rhẹmhi wẹna limhi, limhi, obodẹ Ijudeizi dala ibolo mhẹ ni e kyili Ijusi. Rhẹmhi o nwu mhẹ egbe onaghyie, onagyhie, rharhi khi itushi ita mhẹ lọ. ¹⁵ Ama o ghọli Ishinẹgba ni ọ rhọ te elemhi inyọ mhẹ zẹ mhe lase. Ọọ rhi ivhẹlemhi ọli nyalu mhẹ. ¹⁶ Khi ọ rhọ te ikpa mhẹ rhi Omyi ọli khasẹ, ishọyọ khi mhi rhọ tsabọ vhi iteteva Ijẹtasi. Imha mhila ọgbọkhọgbọ a ngme. ¹⁷ Wẹ khi rhẹmhi shele je Ijerusalemu bhuli eni e kpọ kyili igyhiusomhi kpọ khẹ mhẹ. Onchi rhẹmhi ye Arebia mhi te obholọ jele vhi Idamaskọsi. ¹⁸ O she gbe ikpe esẹ nena na mhi shele je Ijerusalemu kọ a fẹli Ikẹfasi, mhi nu ọli la elemhi ẹlẹ igbe ali ishie. ¹⁹ Ama imha mẹ aghyiusomhi ọvhese ina khi Ijemhisi, ni inyọgwho Ọnọmhuẹyẹ. ²⁰ Ghe, ghe, ukpẹloe Ishinẹgba mhi la ena, a khi rhẹmhi pfi olẹmhi a shi emena mhi kẹkẹ ghyi vhẹ. ²¹ Mhi ke je aloekẹ Isiria ali Isilicia. ²² Eni e myie Ishinẹgba suọ ni e la ika ni e la Ijudea e vha yẹsẹ mhẹ. ²³ Ama e le lee suọ, khi ọni ọ kpọ ẹẹ pfuẹchẹ ni ọ zẹ okwhẹ kpẹsẹ eyẹ li ọ ke a ngme ingmemhi imyiesuọ ena ni ọọ kee pfuse iọgbọa eyọ.” ²⁴ Rhẹmhi ee chichi Ishinẹgba shi ingme mhẹ.