Ikhomhi 8 Ikọritiansi ni ozeva
1
Eyẹ a nono khi vha yẹsẹ, inyọgwho mhẹ ni ikpotso ali emọse, obodẹ ivhẹlẹmhi ni Ishinẹgba ọ rhọ ni ika ni e la Imẹsẹdonia.
2
Ẹrhẹghẹ ni a rhọ mẹ ikpokpomhi imhasẹfẹ ali osoli, ukpokpomhi osoli ni ee mẹ, ali asha ni anya o gbe wẹ rhamhi, o she pfi ukpokpomhi ẹpfue irhueobọa na wẹ.
3
Mhi myie ọtsẹ shi vhọ khi ee lẹẹ rhue obọa rhamhi asha ni e dobẹ, ee gwe li rhue obọa ẹẹ dala asha ni e mhuẹ rhamhi. Irhẹmhi ee rhue obọa abhi o pfo ọgbọgbọ udu.
4
Irẹmhi ee gaa ẹẹ lema eyẹ, khi eyẹ dobẹ wẹwẹ mhọli obọ shi oni akanya Ishinẹgba wẹwẹ e rhọ ke li kpaghyiẹ eni e myiesuọ obọ.
5
A khi abhi eyẹ khọkhọ li a li mẹ ọ. Ama, rhẹmhi e kpọ kyiatsolo rhi egbe wẹ ni Ọnọmhuẹyẹ. E chigbe ji egbe wẹ abọa rhọ khali eyẹ te abhi o ghọli Ishinẹgba.
6
Iyọ rhẹmhi eyẹ lema Itatọsi, ni ọ she kpọ gbe oni akanya ona, khi ọ bhuli vhẹ a nu vhẹ gbe oni akanya irhueobua pfuse.
7
Ama vha rhi egbe myie ẹtsẹkẹ kwu---nabhi irhọshiọ, ingmemhi unu vhẹ, iyẹsẹ, ali ikwegbea, ali ighọli ni vha mhọli ni eyẹ. Iyọ vha liyọ nyakwa shi oni akanya irhuobọa ona kee je alo.
8
A khi rhẹmhi rhi izemhi mhasẹ na vhẹ shi ona, ama irhẹmhi ngme ona khi mhi rhọ yẹsẹ ni egbegbe ighọli vha mhuẹ ni a rhọ khọkhọ ọnwegbe ni iọgbọ evhese mhuẹ.
9
Vha yẹsẹ ivhẹlemhi Ọnọmhuẹyẹ Ijesu Ikiristi. Ni ọ rhẹrhẹ pfue, rharhi vhẹvhẹ ọ mela onanyaa, ishọyọ te ikpa anya li vha ke te pfue.
10
Elemhi oni ngme ona, mhi laa rhi ẹghẹ na vhẹ ni o laa kpaghyiẹ vhẹ. Ukpe khi ona, a khi rhẹmhi vha lee gbasẹ khyiẹlẹ ẹtsẹkẹ, ama irhẹmhi o lee li ghọli vhẹ khi vha kee khyiẹlẹ ẹtsẹkẹ.
11
Nenaa vha gbe ọli pfuse. abhi vha ke lee li mhọli ọnwegbe eyọ ali ighọli khi vha rhọ khyiẹlẹ ọli, mhi pfi olema khi vha liyọ dobẹ gbe ọli pfuse, asha ni vha laa dobẹ rhamhi.
12
Rharhi o kha nwu vhẹ egbe khi vha khyiẹlẹ ẹtsẹkẹ enana, akanya aghyie li o kyila na vhẹ gbe nabhi a nono. O kyila asha ni ọgbọgbọ mhọli rhamhi, ama a ke ẹẹ khi emeni ọgbọ ọ vha mhuẹ.
13
Oni akanya ona o vha kyia khi a rhọ myie egwho itsua zẹa a ke khyiolo itsua nyanọ egwho ike o ke a kyili ọkphakphamhẹ. Onochi, a gaa li abagwho.
14
Ama rhẹmhi o lee gbe akanya khi imhọli kpọegbele vhẹ o dobẹ a kpaghyiẹ wẹ obọ, imhọli kpọẹgbele wẹ o dobẹ a kpaghyiẹ vhẹ obọ.
15
Abhi a li kẹkẹ ọli shi ekẹ eyọ, “Khi ọni ọ mhuẹ enebu ọ vha gwe mhuẹ kpọegbele, ama ọni ọ mhuẹ ukwukwu, rhẹmhi ọ ke a mhuẹ kpọẹgbele.”
16
Ama mhi kphẹmhi ni Ishinẹgba, ni ọ rhi ọli shi Itatọsi udu khi ọ pfi ẹgbue shi vhẹ egbe abhi mhẹmhẹ.
17
A khi rharhi khi ọ lama shi eyẹ vhi olema, ama khi o maa li nwu ọli egbe. Rhẹmhi o lee pfo ọli vhi udu khi lẹ lee li kọ a fẹẹ vhẹ.
18
Eyẹ she ghyie inyọgwho eyẹ ọvhese rhọ khali ọli a bhẹ ni a nwemaa chichi elemhi iteteva eni ika kwu rharhi ikanya ingme ingmemhi Ishinẹgba ni ọa gbe.
19
A khi ona lọgwho, ama eni e myiesuọ e li zẹ ọli ma eyẹ vhi egbe a ye asha khi eyẹ kaa gbe oni akanya irhueobọa ona. Ifumhi Ishinẹgba li ona o kyila ali ọnwegbe ni eyẹ mhọli khi eyẹ rhọ kpaghyiẹobọ.
20
Eyẹ vha nono khi ọgbọ nwu ingme oni akanya isomopfa ona ni eyẹ a gbe ena gba.
21
eyẹ rhọ shi inyakwa khi eyẹ gbe akanya ekpẹ, a khi ukpẹloe Ọnọmhuẹyẹ lọgwho, ama li shi ukpẹloe agbọ.
22
Eyẹ she gwe ghyie inyọgwho eyẹ ọvhese rhọ khẹ wẹ a bhẹ. Eyẹ she nwemaa nwu ọli fẹẹ, eyẹ mẹ khi ọ mhọli ọnwegbe shi ikanya nebu. Irhẹmhi ọ ke gwe mhọli ọnwegbe shi vhọ rharhi ukpokpomhi irhegbenya ni ọ mhuẹ vhi obodẹ vhẹ.
23
A khẹ li uwi Itatọsi, ọzeva mhẹ ali ọni eyẹ gaa gbe akanya kwugbe li ọ kyia. Eni inyọgwho eyẹ, eni ika li e ghyie wẹ. Eghọghọ li e kyila ni Ikiristi.
24
Vha rhi ighọli khasẹ wẹ abhagwhoyọ, vha rhọ khasẹ eni eyuka emeni e zẹ khi eyẹ rhẹ vhẹ a gha.