Ikhomhi 3 Ipitẹ ni ikyiatsolo
1
Vhẹvhẹ eni ikposo, vha chiegbe kpiale ni igwhẹ vhẹ, ishọyọ khi ọni ọ vha lama shi ingme ni a gwu a khasẹ ọ, inyele vhẹ o dobẹ laa rhẹ wẹ myie suọ.
2
Ni e ke mẹ inyele aghyie ali ekpẹ vhẹ.
3
Isomhote vhẹ imhẹli o kyili uwi ofiegbe, nabhi iba itsu ali isọnọ igolu shi egbe ali ede ni e ghalẹ.
4
Onochi, o kyili uwi ekelemhi, isomhote ni o vhaa takwa ni o kyili ayẹmhẹ ni o pfọmhẹ, ni o ghalẹ ukpẹloe Ishinẹgba.
5
Odẹ ni eni ikpotso nẹlẹ ni e pfuasẹ ni e rhi egbe nya Ishinẹgba e li rhi egbe wẹ somhote. Rhẹmhi e rhi ekpẹ ni igwhẹ wẹ.
6
Nabhi Isera, ni ọ suesọ ni Ebulahamu, ọ lu ọli onomhuẹmhẹ. Imyi ọli vha kyila ni vha nyele inyele aghyie ni vhavha rhi egbe ni ulishi ukpokpomhẹ nwu.
7
Abagwhoyọ vhẹvhẹ eni emọse vha nu igwhẹ vhẹ nyelẹ inyele aghyie, vha nwu ekpẹ shi wẹ egbe abhi akhe ni o vha womhẹ ali ọni ọ laa nu vhẹ le isomhopfa ikiki ukwhu, khi aa ke mẹ emeni e nwu vhẹ olema gba.
8
A rhọ gbe oni ingme kwu ukhomhi, vhẹvhẹ kwu vha rhi ọpfọmhẹ nu egbe nyele, vha kee vala elemhi egbe, vha mhọli ighọli egbe abhi inyọgwho, vha mhọli ikẹkẹidua ni egbe ali ichiegbekpiale.
9
Imhẹ vha rhi onọbe wali onobe, ọa liyọ irhi ẹnwẹ wali ẹnwẹ, ama rhi ivọsẹna sọ ẹnwẹ, rharhi ona li a te nyalu vhẹ khi vha kẹ le ivọsẹna ukwhu.
11
Rharhi, ‘’Ọni ọa nono khi lẹ le agbọ aghyie lẹ nyele tẹsẹ ọ nwu unu ọ vhi ijajamhi ingme ali ingme ighagha.
10
Ọọ nwemaa chi onobe le ọa khyiẹlẹ onaghyie; ọọ nwemaa nono ọfọmhẹ ọ na kwhu ọli.
12
Rharhi khi Ishinẹgba ọ rhi ukpẹloe a shi eni e gwagha gbe vhi egbe ọ rhi esọ shi wẹ vhi olema, ama ọ rhi ukpẹloe kpẹ elingmobe egbe.’’
13
Ọgwho ọ dobẹ laa khyiẹlẹ vhẹ ingme ni vhaa khyiẹlẹ onaghyie?
14
Ama vha kha mẹ ẹchọ a shi ongaghyie ni vha khyiẹ, ivọsẹna na lọ. ‘’Imhẹ vha nu ulishi emeni ea nu ulishi; wẹ khi rhemhi vha kpokpok egbe.’’
15
Ama vha rhi idu vhẹ shi ikpọda ni Ikiristi abhi Ọnọmhọli. Nwunegbe khi vha rhọ dobẹ kee sọ ọni ọ laa mhila vhẹ emeni e zẹ khi vha mhọli irhẹgbenya Ishinẹgba. Ama rhi ọpfọmẹ ali ekpẹ sọ wẹ vhọ.
16
mhọli idu aghyie ishọyọ khi eni ea zẹ onobe vhẹ omama o kẹ nwu wẹ shi onobe vhẹ ni ea zẹ.
17
Ọgbọ ọ kha mẹ ẹchọ a shi ikhyiẹlẹ onaghyie li o somhi dala ni ọgbọ ọ mẹ osue a shi onobe ni ọ khyiẹ.
18
Rharhi utogwho li IKiristi ọ gwhua ni iọgbọ kwu, lẹ ni ọ gwabha gbe ọ gwhua ni eni e vha gwaha gbe, khi lẹ rhọ nwu vhẹ bhuli Ishinẹgba le. Aa gbe ijegbe ọlia ama ayẹmhẹ ọli o nyele,
19
Lẹ li ọọ laa ngme ingmemhi Ishinẹgba khasẹ iyẹmhẹ ni e la ogba igwhuma
20
eni e ke khyiẹlẹ omhasuesọ ẹrhẹghẹ ni o dọsẹ ni Ishinẹgba ọ ke rhọ rhi obọ gbanidu mugha ẹrhẹghẹ Inowa ni a rhọ tọ ọkọ. Ikwhumhi ọlale ikwukwu iọgbọ li e lee pfue oni amẹ oyọ le,
21
Ona amẹ ona li a rhọ khọkhọ ibatizimhi ni o tsumhi vhẹ, a khi a rhọ rhue ọgbọ ijiommhi egbea ama khi a rhọ shi obọ khi a laa rhi udu aghyie rhọ khali Ishinẹgba.
22
Ọo tsumhi vhẹ te ikpa itiegwhivule ni IJesu Ikiristi ọ vule. Ni o kyila khi ọ she shele je obọ obita Ishinẹgba ali ighyiukọ, afu ali izemhi e nyẹsẹ egbe a nali.