Ikanya eni ighyiusomhi ikhomhi 4
1
Ina li iọgbọ e lia yẹsẹ khi egamhẹ Ikiristi li eyẹ kyia ali eni ẹtsẹkẹ ogbhagbha Ishinẹgba e la obọ.
2
Emeni a nono obọ ọni akanya Ishinẹgba o la obọ khi ọ kyili ọni a rhi egbe a da.
3
O vha nwu mhẹ ẹloe ni vha rhẹ lia gwu mhẹ ẹzọ ọa liyọ vha rhẹ mhẹ je owẹzọ agbọ, ingmaghyie, a khi mhẹmhẹ mhia sọ egbe mhẹ unu ẹzọ.
4
Imha yẹsẹ ememeni vha gwu kwu mhẹ egbe, ama a khi rhẹmhi ẹẹ khi imha lue, Ishinẹgba li ọa sọ mhẹ unu ẹzọ.
5
Iyọ Imhẹ sọ unu ẹzọ neni igwẹzọ o rhamhi, neni Ọnọmhuẹyẹ ọ bhẹ. Ọ laa rhi ẹtsẹkẹ ebili ni e gbhagbha ali emeni e la idu kwu khasẹ vhi ufulọ. ishọyọ Ishinẹgba ọ chichi ọgbọgbọ.
6
Nenaa, inyọgwho mhẹ ni ikpotso ali emọse, irhẹmhi rhi egbe mhẹ ali Apolọsi khyiẹlẹ irhọkhasẹ khasẹ vhẹ, khi vha kẹ te ikpa eyẹ wẹna emeni eni ingme ena e ngme, “Imhẹ vha talase emeni a kẹkẹ shi ekẹ. “Irhẹmhi o kyia yọ khi aa ke mẹ ọni ọ rhue egbe ọli fu dala ọni ọ kpọẹ,
7
Ọgwho ọ rhẹ vhẹ degbea shi iọgbọ ni e kpọẹ vhi egbe? Elọ vha mhuẹ ni o vha kyia khi a khi rhẹmhi a rhẹ wẹ somhi vhẹ opfa apfuẹ? O kha kyia khi ingmaghyie khi irhẹmhi a rhẹ wẹ somhi vhẹ ọpfa apfua, elọ vha ke chichiegbe a shi abhizẹzẹ khi akanya obọ vhẹ lọ?
8
Vha she mhọli emeni e gwhẹ vhẹ! Vha she pfue! Vha lee eghyiele---vha chi eyẹ vhi egbe lẹẹ, Ingmaghyie lọ, o gwhẹ mhẹ khi vha le eghyiele, ishọyọ eyẹ ke li nu vhẹ le eghyiele.
9
Rharhi khi mhi sa khi irhẹmhi Ishinẹgba ọ rhi eyẹ ighyiusomhi kpe oshimhi ni eni e gbhẹ ogwhẹ abhi eni a laa gboloa. Eyẹ she kyili irhọkhasẹ ni agbọ ali ighyiukọ.
10
Rharhi Ikiristi idẹkẹ li eyẹ ke kyia, vhẹvhẹ vha kyili etsẹgbhẹ vhi elemhi Ikiristi. O lọsẹ eyẹ, ama vhẹvhẹ vha ze, Vha she la asha eghọghọ, ama eyẹ la omama.
11
Apfishi nena okyiamhi ali okyiamẹ e kyhie lia gbe eyẹ, eyẹ rhi ede na chẹchẹ kwuegbe, a rhi ofu shi elemhi gbe eyẹ, eyẹ vha mhuẹ apfẹ.
12
Eyẹ rhi abọ eyẹ a gbe ikanya ni e zezeze. A zẹnọ ẹnwẹ ni eyẹ, eyẹ kwu itsẹ a na wẹ. A kha kwhu eyẹ ukhomhi, ukhomhi, eyẹ rhi egbe myie.
13
A kha ka eyẹ, eyẹ rhi isomhelemhi sọ wẹ vhọ. A she rhi eyẹ mela ichikwa ali asha ni o gaa nwu ijomhi nẹẹ kwu
14
A khi rhẹmhi kẹkẹ ena ghyi vhẹ khi e kẹ kwu omama rhugwhu vhẹ, ama rhẹmhi rhi ọli sheshe vhẹ abhi imyi mhẹ ni e gwhẹ mhẹ.
15
Vha kha rhẹ mhuẹ ewẹnagbọ agbẹlẹ egbhọ igbe asha igbe vhi elemhi Ikiristi, vhavha mhuẹ ita nebu. Rharhi ita vhẹ mhi ke kyia eyọ elemhi Ijesu Ikiristi te ikpa oni ingmemhi Ishinẹgba.
16
Mhi lema vhẹ khi vha ke khọlia mhẹ.
17
Li o rhẹ mhẹ ghyie Itimoti ni ọ gwhẹ mhẹ ni ọ gwe kyili egbegbe omyi mhẹ vhi elemhi Ọnọmhuẹyẹ bhuli vhẹ. Ọ la yele vhẹ abhi mhi li la vhọ elemhi Ikiristi, abhi mhi le li wẹna wẹ ashakasha kwu ali elemhi ika kwu eyọ.
18
Ebubu vhẹ e shee mhuẹ ofu, abhizẹzẹ khi imha gwe lẹẹ bhẹ.
19
Ama o kha ghọli Ishinẹgba, mhi lee kẹlẹ a bhẹ bhuli vhẹ le nena, nena. Oni ẹrhẹghẹ mhi ke rha yẹsẹ a khi ingmemhi apfuẹ ni eni ea chichiegbe ea ngme ena, ama mhi laa mẹ izemhi wẹ.
20
Rharhi ingmemhi eghyiele Ishinẹgba o vha kyili ingmemhi unu lọgwho o le kyia, ama izemhi.
21
vhaa nono Khi mhi rhue utele mhọ obọ bhẹ bhuli vhẹ le laa khi mhi rhi ighọli ali ayẹmhẹ ọpfọmhẹ bhẹ?