Ikhomhi 2 Ikọritiasi ni ikyiatsolo 2
1
Abhi mhi rhọ bhẹ bhuli vhẹ le, inyọgwho mhẹ ni ikpotso ali emọse, a khi eta ọlẹlẹ ọa liyọ ingmemhi alẹ mhi rhọ bhẹ bhuli vhẹ le abhi mhi li rhi ingmaghyie Ishinẹgba ni a rhọ gbhagbha a tsabọ eyọ.
2
Imha pfi ẹgbue shi vhọ khi mhi rhọ yẹsẹ ẹtsẹkẹ ovhese dala Ijesu, ali itanọmanọ ni a tanọ ọli manọ ukhomhi ọgbagala.
3
Ọlọsẹmhẹ mhi rhọ bhẹ bhuli vhẹ le ali ulishi ali ibamhijẹjẹjẹ.
4
Ingmemhi Ishinẹgba na mhi ngme a khasẹ vhẹ, a khi iyi etọlẹlẹ ali ingmemhi alẹ. Ama e tsua lzemhi Ayẹmhẹ,
5
ishọyọ irhọshiọ vhẹ oo ke kyili ẹgbhẹli otsonagbọ, ama o kyili izemhi Ishinẹgba.
6
Nenaa, Irhẹmhi eyẹ ke a ngme Ingmemhi ẹgbhẹ vhi Iteteva eni e womhẹ, ama a khi ẹgbhẹli agbọ, ọa liyọ ẹgbhẹli eni ea mhasẹ ni iọgbọ ni e la oni ẹrhẹghẹ ni a la ena, ni o kyila khi o dọsẹ la lẹẹ.
7
Ama Irhemhi eyẹ a ngme Ingmemhi ẹgbhẹ ni o gbhagbha, ẹgbhẹ ni a she rhọ gbhagbha ni Ishinẹgba ọ she kpọ le lee rhọ shi ekẹ shi ni eyẹ neni a tue agbọ ekẹ le.
8
A vha mẹ eni ea mhasẹ ni e la agbọ amo ni e mhọli oni ẹgbhẹli ona, rharhi khi e kha yẹsẹ ọli oni ẹrhẹghẹ oyọ lọ, e vha kha gbe Ọnọmhọli kikia.
9
Ama abhi o li la akẹkẹshekẹ khi “Emeni ẹloe o vha mẹ nee, ni esọ o vha suọ nee, ni udu o vha sa nee, ni Ishinẹgba ọ nwuno egbe shi ni eni e mhọli ighọli oli.”
10
Ena khi ẹtsẹkẹ ni Ishinẹgba ọ she te ikpa oni Ayẹmhẹ rhọ khasẹ eyẹ. Rharhi khi ọni Ayẹmhẹ li ọa gwanọ ẹtsẹkẹ kwu, orhọgbe ẹtsẹkẹ Ishinẹgba ni e limhi, limhi.
11
A vha mẹ ọni ọ yẹsẹ emeni e la ọgbọ udu ina khi ayẹmhẹ ọli lọgwho? Abhagwhoyọ, a vha mẹ ọni ọ yẹsẹ ẹtsẹkẹ Ishinẹgba ni e limhi limhi ina khi oni Ayẹmhẹ Ishinẹgba.
12
Ama eyẹ vha mhọli ayẹmhẹ oni agbona. Ama oni Ayẹmhẹ ni o te obọ Ishinẹgba bhẹ, khi eyẹ kẹ dobẹ yẹsẹ emeni Ishinegba ọ rhọ ni eyẹ apfuẹ.
13
Emeni eyẹ ngme a khasẹ vhẹ, a khi emeni a rhi ẹgbhẹli agbọ wẹna khasẹ eyẹ ama ingmemhi ni Ayẹmhẹ o khọli khasẹ eyẹ lọ, ọ rhi ingmaghyie gwu ingmemhi Ayẹmhẹ a khasẹ.
14
Ọni ọ la ẹlamhijegbe ẹtsẹkẹ Ayẹmhẹ Ishinẹgba o vha ghọli ọ, rharhi khi Ingmemhi iyẹyẹ li e kyila nali. Ọ vha laa yẹsẹ wẹ rharhi khi ayẹmhẹ li oo ngme wẹ.
15
Ọni ọ la Ayẹmhẹ li ọ dobẹ a sọ ẹtsẹkẹ kwu unu ẹzọ, ama khi lẹ obọ ọli, a vha mẹ ọni ọ dobẹ a sọ ọli unu ẹzọ.
16
“Ọgwho ọ dobẹa yẹsẹ udu Onomhuẹyẹ, ni ọ dobẹ rhi ẹgbhẹ a nali?” Ama eyẹ ena eyẹ mholi Ayẹmhẹ Ikiristi.