Ukhomhi 1 Ikọritiasi ni ikyiatsolo
1
Mhẹmhẹ Ipọlu, ni Ijesu Ikiristi ọ nyalu khi ọ kyili aghyiusomhi abhi o ghọli ọli, ali Isostẹnẹsi ni inyọgwho eyẹ.
2
Li e gba kẹkẹ oni ebe ona ghyi uka Ishinẹgba ni o la Ikọriti, ali eni a she rhọ shi ikpọda ni Ijesu Ikiristi, ni a she nyalu khi e kyili eni e pfuasẹ. Ali eni e la ashakhasha a nyalu eva Ijesu Ọnọmhuẹyẹ ali Ọnọmhuẹ wẹ.
3
Ivhẹlemhi ali ọpfọmhẹ ni o te obọ Ishinẹgba ni Ita eyẹ ali Ọnọmhuẹyẹ Ijesu Ikiristi bhẹ o kyili uwẹ vhẹ.
4
Ẹrhẹghẹ kwu lẹ mhi rha tsẹ Ishinẹgba Uwegbe na vhẹ, Rharhi Ivhẹlemhi Ishinẹgba ni Ijesu Ikiristi Ọ rhọ na vhẹ.
5
Ọ Shẹ rhẹ vhẹ Pfue odẹ khi odẹ kwu, Shi obodẹ ingmemhi unu ali Iyẹsẹ vhẹ.
6
Rharhi ingmemhi Ikiristi ni eyẹ gwu a khasẹ vhẹ a she mẹ vhẹ lẹ vhi egbe.
7
Iyọ Isomhopfa ayẹmhẹ ọ vha ke gwe to vhẹ, abhi vha li mugha khi ibhale Ọnọmhuẹyẹ Ijesu Ikiristi ena.
8
Ọọ gwe laa zise vhẹ la pfishi ukpẹsẹ, Khi ẹzọ o ke gbe vhẹ ogbẹlẹ Ọnọmhuẹyẹ Ijesu Ikiristi.
9
Ishinẹgba ni ọ nyalu vhẹ bhẹ vhi alekwugbe Omyi ọ ni Ijesu Ikiristi Ọnọmhuẹyẹ, ọ tẹ ni a rhi egbe a nya
10
Nenena, mhi rhi eva Ọnọmhuẹyẹ Ijesu Ikiristi lema vhẹ Inyọgwho mhẹ ni ikpotso ali emose, khi vha mhuẹ alamanegbe, khi a ke mẹ Ovala vhi Iteteva vhe. Mhi lema vhẹ khi vha toma, elemhi udu ogwho ali Omhasẹ ogwho.
11
Ama Iọgbọ Ichiloẹ e she gwu khasẹ mhẹ khi okemhi o she a vẹgba vhi Iteteva vhẹ.
12
Emena mhi rhọ ngme khi ona; Egwho eẹ khi, ‘’Uwi Ipọlu mhi kyila,” evhese eẹ li, ‘’Apolosi mhi rhọ khẹ” evhese eẹ li, ‘’Ikẹfasi mhi rhọ khẹ” a khyie mẹ eni eẹ khi “Ikiristi wẹwẹ e rhọ khẹ.”
13
Rhẹmhi Ikiristi ọ mẹẹ kemhi? Ipọlu la mẹ gbea na vhẹ la khi eva Ipọlu la rhọ batazi vhẹ?
14
Mhi kphẹmhi khi Imha batazi onyiẹ vhẹ sẹkẹnẹ khi Ikirispọsi ali Gayọsi.
15
Rharhi ona a vha mẹ onyiẹ vhẹ ni ọ laa li ẹẹ khi eva mhẹ li a rhọ batazi lẹ.
16
Ina khi apfẹ Isitifanasi na mhi le batazi, A rhi obọ gbe eyọ shi Imha sa khi mhi gwe batazi iọgbọ ọvhese.
17
Rharhi khi Ikiristi ọ vha ghyie mhẹ khi mhi kaa batazi agbọ ama khi mhi rhọ ngme oni ngmemhi lẹẹ. a khi ẹgbhẹli agbọ li ọ mhẹ khi mhi rhọ ngme ingmẹmhi lẹẹ, rharhi khi izemhi ni o la oni ọgbagala Ikiristi oo ke mela apfuẹa.
18
Rharhi khi oni usomhi obodẹ oni ogbagala Iyẹyẹ li o kyia ni eni ea li opfua, ama eyẹ ena ni a she tsumhi, izemhi ishinẹgba li o kyia ni eyẹ.
19
O la akẹkẹshekẹ, “Mhi laa pfuse ẹgbhẹli etsẹgbhẹa. Mhi rhi abọ sha iyẹsẹ etsẹgbhẹ.”
20
Mhi gyhi eni etsegbhẹ? Mhi gyhi eni e ye owẹna? Mhi gyhi eni ea le epfuasẹ obodẹ otsonagbọ ni e la agbọ nena? Ishinẹgba ọ vha mẹ nwu ẹgbhẹli oni agbona mela iyẹyẹa nenaa?
21
Abhi o ke rhọ kyia khi ẹgbhẹ oni agbona khi ọ vha rhẹ wẹ dobẹ yẹsẹ Ishinẹgba, oo ghọli Ishinẹgba khi ọ rho te ikpa Iyẹyẹ oni ingmemhi ọli tsumhi eni e lama shi vhọ.
22
Rharhi khi Ijusi e lẹẹ nono Inyaloa, Igiriki e nono ẹgbhẹ.
23
Ama itanọmanọ Ikiristi li eyẹ ngme a khasẹ vhẹ, o kyili ọzuode ni Ijusi o kyili iyẹyẹ ni Igiriki.
24
Ama Eni Ishinẹgba ọ she nyalu, shi Ijusi ali Igiriki, Ikiristi li eyẹ a ngme ingmemhi ọli khi ọ kyili izemhi ali ẹgbhẹli Ishinẹgba.
25
Rharhi khi idẹkẹ Ishinẹgba o tsua ẹgbhẹ dala ẹgbhẹli agbọ, abagwhoyọ, ọlọsẹmhẹ Ishinẹgba o ze dala izemhi agbọ.
26
Vha dọ ẹloe Inyalu Ishinẹgba ni o la vhẹ agbọ, Inyọgwho mhẹ ni ikpotso ali emose. A khi vhẹvhẹ kwu vha yẹsẹ ingme rhamhi asha ni agbọ e yẹsẹ ingme rhamhi. A khi vhẹvhẹ kwu vha mholi Izemhi. A khi vhẹvhẹ kwu la vyia ekhẹmhuẹ.
27
Ama Ishinẹgba li ọ zẹ ẹtsẹkẹ iyẹyẹ oni agbona khi lẹ rhọ rhi omana nwu eni etsẹgbhẹ. Ishinẹgba li ọ zẹ emeni o lọsẹ khi lẹ rho rhi omama nwu eni e ze.
28
Ishinẹgba li ọ zẹ emeni e vha nwuẹloe na rhi ẹloe gbe ukhomhi ekẹ agbọ. Li ọ gwe rhi emeni a rhọ nwuẹloe mela afuẹa, khi lẹ rhọ rhue emeni a rhọ nwẹloe kyili apfuẹ.
29
Irhẹmhi ọ khyiẹlẹ ena khi a ke mẹ ọni ọ mẹ emeni e rhi ọli nyanọ khasẹ ọli.
30
Rharhi emeni Ishinẹgba ọ khyiẹlẹ, nenaa elemhi Ijesu Ikiristi li u ke la ena, ni ọ ke kyili ẹgbhẹ ni o te obọ Ishinẹgba bhẹ bhui ẹyẹ le. Li ọ ke gwe kyili igwabhagbe ali ipfuasẹ ali imyiepfuese eyẹ.
31
Rharhi ona, li Ibabo o te ngme, ọọ li, “Ọnọni ọa nyanọ, ọ rhi eva Ọnọmhuẹyẹ kee nyanọ.